جمعرات, 21 جون 2018


یونس خان کے 10ہزار رنز مکمل

 

ایمزٹی وی(رپورٹ)عظیم پاکستانی بلے باز یونس خان نے ٹیسٹ کرکٹ میں 10 ہزار رنز بنانے کا اعزاز حاصل کر لیا، جس کے ساتھ ہی وہ یہ اعزاز حاصل کرنے والے پاکستان کے پہلے اور دنیا کے 13ویں کرکٹر بن گئے۔

ویسٹ انڈیز کے خلاف سیریز کے دوسرے ٹیسٹ میچ میں یونس خان نے چوکا لگا کر 10 ہزار رنز بنانے کا اعزاز حاصل کیا۔

پاکستان کے لیے ٹیسٹ کرکٹ میں سب سے زیادہ رنز بنانے والے یونس خان نے 26 فروری کو اپنے کیریئر کا پہلا ٹیسٹ سری لنکا کے خلاف راولپنڈی میں کھیلا اور اپنے پہلے ہی میچ میں سنچری بنا کر اپنے بہترین مستقبل کا اشارہ دیا تھا۔

یونس خان نے اپنی قیادت میں پاکستان کو 2009 میں ٹی ٹوئنٹی کا عالمی چمپیئن بنایا جو 1992 کے ورلڈکپ میں فتح کے بعد پاکستان کرکٹ کا سب سے بڑا اعزاز تھا۔


۔
یونس خان کے 1000رنز مکمل by aimstv_tv

 

یونس خان نے 116 ٹیسٹ میچز میں 34 سنچریوں اور 33 نصف سنچریوں کی بدولت 52.39 کی اوسط سے 10 ہزار رنز کا ہندسہ عبور کیا۔

سوشل میڈیا پر ایک مختصر ویڈیو پیغام میں یونس خان کا کہنا تھا کہ ” یہ کامیابی صرف میری نہیں بلکہ پورے پاکستان کی کامیابی ہے، اپنی اس کامیابی کو اپنی والدہ، مرحوم والد اور باب وولمر کے نام کرتا ہوں۔“ یونس خان نے مزید کہا کہ ” میں اپنے تمام دوستوں اور مداحوں کا تہہ دل سے شکر گزار ہوں جنہوں نے میرے پورے کیریئر کے دوران مجھے بھرپور طریقے سے سپورٹ کیا۔“

وزیراعظم نوازشریف نے مایہ ناز بلے باز یونس خان کو 10 ہزار رنز مکمل کرنے پر مبارکباد دی ہے۔ نوازشریف کا کہنا تھا کہ یونس خان نے یہ سنگ میل عبور کرکے ملک کا نام روشن کیا ہے اور قوم کو ان کے اس اعزار پر فخر ہے۔

انہیں یہ اعزاز حاصل کرنے پر انٹرنیشنل کرکٹ کونسل اور دنیائے کرکٹ کے مایہ ناز سابق کھلاڑیوں نے مبارکباد پیش کی جب کہ پاکستان کرکٹ بورڈ اور پاکستان ٹیم کے سابق ٹیسٹ کرکٹرز میں عمران خان، انضمام الحق، مشتاق احمد، محمدحفیظ، یاسر حمید، محمدعرفان، رمیزراجہ، شاہد آفریدی، شعیب اختر نے یونس خان کو 10ہزار رنز کا سنگ میل عبور کرنے پر مبارکباد پیش کی اور نیک تمناو¿ں کا اظہار کیا۔

ٹیسٹ کرکٹ میں 10 ہزار رنز مکمل کرنے والے یونس خان اپنا بیٹ نیلام کرکے رقم فلاحی ادارے کو عطیہ کریں گے۔
واضح رہے کہ پاکستان کرکٹ ٹیم کے سابق کپتان اور ٹیسٹ کرکٹ میں ملک کے لیے سب سے زیادہ رنز بنانے والے بیٹسمین یونس خان نے ویسٹ انڈیز کے خلاف ٹیسٹ سیریز کے بعد کرکٹ سے ریٹائرمنٹ کا اعلان کردیا ہے۔

 

پرنٹ یا ایمیل کریں

Leave a comment