ایمزٹی وی(تعلیم)سندھ ، بلوچستان اورخیبرپختونخوا میں موسم گرما کی تعطیلات ختم ہونے کے بعد آج سے تعلیمی ادارے کھل گئے۔

میڈیا زرائع کے مطابق ملک کے 3 صوبوں سندھ ، بلوچستان اور خیبر پختونخوا  میں موسم گرما کی تعطیلات ختم ہونے کے بعد تعلیمی ادارے کھل گئے ہیں اور سرکاری، نیم سرکاری اور نجی اسکولوں و کالجز کے طلبہ نے مادر علمی کا رخ کرلیا۔

سندھ میں میٹرک سسٹم کے تحت چلنے والے نجی وسرکاری اسکولوں میں تعلیمی سیشن یکم اپریل سے ہی شروع ہوچکا ہے تاہم کیمبرج سسٹم کے تحت چلنے والے نجی اسکولوں میں نیا تعلیمی سیشن آج سے شروع ہوگیا۔

صوبے میں غیر متوقع شدید گرمیوں کے باعث رواں برس صوبائی حکومت نے گرمیوں کی تعطیلات 15 مئی سے ہی کردی تھیں تاہم عام انتخابات کے باعث اس میں مزید 15 روز کا اضافہ کیا گیا تھا۔ 

بلوچستان کے گرم علاقوں میں واقع 17 اضلاع میں بھی موسم گرما کی تعطیلات ختم ہوچکی ہیں، اسکولوں اور کالجز میں تدریسی عمل کا آغاز بھی ہوچکا ہے۔

خیبرپختونخوا کے پہاڑی علاقوں میں گرمیوں کی تعطیلات آج ختم ہوگئی ہیں جب کہ میدانی علاقوں کے تعلیمی ادارے 31 اگست تک بند رہیں گے۔

واضح رہے کہ پنجاب بھرکے تعلیمی اداروں میں موسم گرما کی چھٹیاں 10 اگست تک ہوں گی۔