مہاراشٹر: ہوم ورک مکمل نہ کرنے پر کم سن طالبہ کو 450 مرتبہ اٹھک بیٹھک کرانے والی ٹیوشن ٹیچر کو پولیس نے گرفتار کرلیا۔

 

یہ واقعہ بھارتی ریاست مہاراشٹرا میں پیش آیا جہاں ٹیوشن پڑھانے والی ٹیچر نے اپنی 8 سالہ طالبہ کو ہوم ورک مکمل نہ کرنے پر سزا دی جس میں ٹیچر نے لڑکی سے 450 مرتبہ اٹھک بیٹھک کرائی۔

 

بھارتی میڈیا کے مطابق تیسری کلاس کی طالبہ نے ٹیچر کی طرف سے کی جانے والی سزا پوری کی لیکن جب وہ گھر پہنچی تو چلنے کے قابل نہیں تھی جس پر بچی کے اہلخانہ نے اسے اسپتال منتقل کیا۔

 

بچی کی والدہ نے ٹیوشن ٹیچر کے خلاف پولیس میں شکایت درج کی جس میں خاتون نے الزام لگایا کہ ان کی بچی پر ٹیچر نے بری طرح تشدد کیا جس سے اس کے پیروں پر سوجن آگئی۔

 

پولیس نے بچی کی والدہ کی شکایت پر ٹیوشن ٹیچر کے خلاف کارروائی کرتے ہوئے خاتون کو گرفتار کرکے حوالات میں بند کردیا۔