پاکستان اسٹیل کیڈٹ کالج کراچی کی جانب 29ویں یوم والدین کی تقریب منعقد کی گئی
تقریب سے خطاب کرتے ہوئے پاک فضائیہ کے ایئر وائس مارشل عباس گھمن نے کہا ہے کہ مجھے فخر ہے کہ میں نے اس کالج سے تعلیم حاصل کی اور آج میں اپنے وطن کی خدمت کر رہا ہوں۔ انہوں طلبہ پر زور دیا کہ وہ یہاں سے تعلیم مکمل کرنے کے بعد ایمانداری، لگن اور حب الوطنی کے جذبے سے کام کریں اور ملک کی ترقی میں اپنا بھرپورکردار ادا کریں۔ انہوں نے کہا کہ تعلیم سے ہی ہم اقوام عالم میں اپنا نام اور وقار بنا سکتے ہیں ۔
تقریب سے خطاب کرتے ہوئے کیڈٹ کالج کے پرنسپل پروفیسر ڈاکٹر عبدالرحمان جسکانی نے کہا کہ اس کالج میں طلبہ کی تعلیم کے ساتھ ان کی شخصیت سازی پر بھرپور توجہ دی جاتی ہے اور یہاں سے تعلیم مکمل کرنے والے طلبہ پاکستان آرمی، پاک فضائیہ اور پاک بحریہ کے ساتھ مختلف اداروں میں کام کر کے ملک کی خدمت کر رہے ہیں جو ہمارے لیے بڑا اعزاز ہے۔
انہوں حکومت سندھ کی جانب سے کالج کے لیے آئی ٹی لیبارٹری اور اسپورٹس پروجیکٹ منظور کرنے اور پاکستان اسٹیل ملز کی انتطامیہ کے خصوصی تعاون پر شکریہ ادا کیا۔
اس موقع پر کالج کے طلبہ نے پریڈ اور پی ٹی کا مظاہرہ پیش کیا ۔ طلبہ نے مختلف غیر نصابی سرگرمیوں کے مقابلوں کے دوران گھڑ سواری، نیزےبازی، جمناسٹک اور مختلف کھیلوں کا شاندار مظاہرہ کیا۔ بعد میں مہمان خصوصی پاک فضائیہ کے ایئر وائس مارشل عباس گھمن نے اچھی کارگردگی کا مظاہرہ کرنے والے طلبہ کو مختلف اعزازات اور شیلڈز دیں۔ کالج کے پرنسپل پروفیسر ڈاکٹر عبدالرحمان جسکانی نے مہمان خاص کو یادگاری شیلڈ پیش کی۔ تقریب میں مختلف اداروں کے افسران اورملک بھر سے طلبہ کے والدین نے شرکت کی۔