ایمزٹی وی(انٹرٹینمنٹ)بالی وڈ کے دبنگ اداکار سلمان خان نے حال ہی میں ماضی کے مقبول اداکار دھرمیندر کو سرپرائز دیا اور ان سے ملاقات کے لیے فارم ہاؤس پہنچ گئے، جنہیں دیکھ کر دھرمیندر بہت خوش ہوئے۔
سلمان خان اور دھرمیندر نے ایک ساتھ 1998 میں ریلیز ہونے والی فلم 'پیار کیا تو ڈرنا کیا' میں کام کیا تھا، جس کی کاسٹ میں کاجول بھی شامل تھیں۔
82 سالہ دھرمیندر نے سماجی رابطے کی ویب سائٹ توئٹر پر سلمان خان سے ملاقات کے موقع پر لی گئی تصویر شیئر کی اور ساتھ میں لکھا، 'فارم ہاؤس پر آپ کی سرپرائز آمد نے میرے دل کو چھو لیا ہے، سلمان خان آپ ہمیشہ میرے لیے بیٹے کی طرح رہیں گے'۔
اس تصویر کو سیکڑوں افراد لائیک اور ری ٹوئیٹ کرچکے ہیں۔
دوسری جانب دھرمیندر کے بیٹے بوبی دیول نے بھی یہ تصویر اپنے انسٹاگرام اکاؤنٹ پر شیئر کی، جو سلمان خان کے ساتھ فلم 'ریس 3' میں کام کرتے نظر آئیں گے۔
میڈیا رپورٹ رپورٹ کے مطابق اس سے قبل ایک انٹرویو میں دھرمیندر اس بات کا اظہار کرچکے ہیں کہ ان کی سوانح حیات پر بننے والی فلم میں سلمان خان، ان کا کردار ادا کرسکتے ہیں۔