جمعہ, 29 مارچ 2024


آرتھرائٹس کے حوا لے سے آگاہی سیمینار

 

ایمز ٹی وی (صحت) فارمیسی گریجویٹس ایسوسی ایشن اور سایہ ویلفیئر آرگنائزیشن کے مشترکہ تعاون سے " آرتھرائٹس سے بچاؤ۔آپ کے اپنے ہاتھ میں" کے عنوان سے منعقدہ آگہی سیمینار سے خطاب کرتے ہوئے چیف پیٹرن فارمیسی گریجویٹس ایسوسی ایشن ڈاکٹرزین الحسنین نے کہاکہ آرتھرائیٹس جسے عرف عام میں گٹھیا کا مرض کہا جاتا ہے، جس میں ہڈیوں اور جوڑوں کو پہنچنے والے نقصان کی بدولت جوڑوں پرسوزش اور ورم آجاتا ہے نتیجتاً جوڑوں کو حرکت دینے میں بھی شدید درد ہوتا ہے ،چنانچہ فارماسسٹ عوام میں کمیونٹی فارمیسی پریکٹس کے ذریعے شعوراجاگر کریں کہ جسمانی معذوری سے محفوظ رہنے کے لیے باقاعدگی سے ورزش کرنا، وزن کنٹرول کرنا، متوازن غذا کا استعمال، وٹامن ڈی کے حصول کے لیے جسم کودھوپ لگانا وغیرہ انتہائی ضروری ہیں۔
ماہرامراض ہڈی وجوڑ ڈاکٹررضوان حیدر نے کہاکہ آرتھرائیٹس کے مرض کی کئی اقسام ہیں جن میں سیپٹک آرتھرائیٹس ، جووینائل آرتھرائیٹس، رہیوماٹائیڈ آرتھرائیٹس شامل ہیں جبکہ اوسٹوآرتھرائیٹس یا جوڑوں کے جھڑنے کی بیماری کا شمار سب سے عام قسم میں کیا جاتا ہے سیکریٹری فارمیسی کونسل سندھ ڈاکٹرتنویراحمد صدیقی نے صدارتی خطاب میں کہاکہ اس بیماری میں مریضوں کے ہاتھ، پیروں، کندھے، کولہے، گٹھنے ، ریڑھ کی ہڈی، گردن اور پست والے جوڑ متاثر ہوتے ہیں جسے پیچیدہ ہونے سے قبل ہی محفوظ رکھا جاسکتا ہے۔
چیئرمین سایہ ویلفیئرآرگنائزیشن ڈاکٹرتسنیم زیدی نے کہاکہ موٹے افراد میں گھٹنے کے آسٹیوآرتھرائیٹس میں مبتلا ہونے کے امکانات بڑھ جاتے ہیں۔ صدر پی جی اے ڈاکٹر امرعلی نے کہاکہ گٹھیا کا مرض زیادہ ترپچاس سال سے زائد عمر کے افراد خصوصاً خواتین کو سب سے زیادہ متاثر کرتا ہے۔ آرتھرائیٹس کی مختلف اقسام میں فزیشن اور فارماسسٹ مختلف نوعیت کی ادویات تجویز درد کی شدت کے لحاظ سے کرتے ہیں۔ زیادہ خراب جوڑ کی آپریشن کے ذریعے تبدیلی سے مریض دردسے نجات پالیتا ہے۔

 

 

پرنٹ یا ایمیل کریں

Leave a comment