اسلام آباد: پاکستان پیپلز پارٹی کے چیئرمین بلاول بھٹو زرداری نے واقعے کی مذمت اور شہیدوں کے لواحقین سے افسوس کا اظہار کیا ہے، انہوں نے اپنے بیان میں کہا کہ آج پھر بلوچستان میں معصوم انسانوں کا خون بہایا گیا،
حکومت دہشت گردوں کو کنٹرول کرنے میں ناکام ہو گئی ہے۔ کیسے ممکن ہے کہ حکومت دہشت گردی کی نرسریوں سے لاعلم ہو،حکومت دہشت گردی کے منصوبہ سازوں کو قانون کی گرفت میں لائے
اسلام آباد: وفاقی وزیر اطلاعات فواد چوہدری کا کہنا ہے کہ پیپلز پارٹی اور (ن) لیگ زرداری اور شریف سے باہر نکلیں۔
سماجی رابطے کی سائٹ ٹوئٹر پر وفاقی وزیر اطلاعات فواد چوہدری کا کہنا تھا کہ پیپلز پارٹی اور (ن) لیگ زرداری اور شریف سے باہر نکلیں اور نئے سیاسی بیانیے پر توجہ دیں، کرپشن کیسز سے گھبرائی ہوئی لیڈر شپ دونوں پارٹیوں کا مستقبل تاریک کر چکی ہے۔
وفاقی وزیر اطلاعات نے کہا کہ کبھی اٹھارویں ترمیم میں تبدیلی اور کبھی صدارتی نظام جیسی غیر سنجیدہ بحث کرتے ہیں، دونوں چاہتے ہیں کہ کسی طرح مقدمات سے توجہ ہٹے مگر ایسا نہیں ہوگا۔
اسلام آباد:وزیرخارجہ شاہ محمود قریشی کا کہنا ہے کہ پاکستان پرامن ملک ہے اورہمسایوں سے اچھے تعلقات چاہتا ہے۔
وزیرخارجہ شاہ محمود قریشی نے تقریب سے خطاب کرتے ہوئے کہا کہ پاکستان پرامن ملک ہے جو ہمسایوں سے اچھے تعلقات چاہتا ہے، خطے میں امن و استحکام کے لیے پاکستان کا اپنا کردارادا کررہا ہے، مسئلہ کشمیرکا پرامن حل چاہتے ہیں جب کہ بھارت کشمیریوں پرمظالم، انسانی حقوق کی خلاف ورزی کررہا ہے۔
وزیر خارجہ نے کہا کہ پاکستان نے بھارت کو نیوکلیئرمیزائل کے حوالے سے تجویز دے رکھی ہے، تجویزکا بنیادی مقصد ہی ہتھیاروں کی دوڑ روکنا ہے، بھارت نے ابھی تک اس کا جواب نہیں دیا، پاکستان خطے میں ہتھیاروں کی دوڑ میں شامل نہیں، بھارت کی جانب سے ایس 400 بیلاسٹک میزائل خطے میں عدم توازن کا باعث بنے گا۔
کراچی :وزیر بلدیات سندھ سعید غنی نے کہا ہے کہ نیب حکومت کی ایما پر کام کررہا ہے جس شخص کو ایم کیو ایم کے لوگوں کا یہ نہیں پتا کہ وہ کتنے نفیس ہیں اس کو کیا کہا جائےپیپلزپارٹی کی قیادت نہ کبھی پہلے مقدموں سے ڈری ہے نہ اب ڈرے گی۔جس طرح فریال تالپور کے خلاف نیب کا قانون استعمال ہوتا ہے ویسے ہی علیمہ خان کے لیے ہونا چاہئے۔
نیب ایک غیر جانبدرا ادارہ نہیں رہا۔اس ملک کی سالمیت ضروری ہے یا انتقامی کارروائیاں، فیصلہ حکومت کو کرنا چاہئے۔صوبائی وزیر بلدیات کے اعزاز میں سوات چار باغ پی ای سی ایچ ایس بلاک 6 ایکسٹینشن کے علاقہ مکینوں کی جانب سے تقریب منعقد کی گئی تقریب سے چیئرمین ڈی ایم سی ایسٹ معید انور، ایڈوکیٹ قاضی بشیر، ذوالفقار قائمخانی اور دیگر نے بھی خطاب کیا، تقریب میں صوبائی وزیر کا بیگم لئیق علی روڈ کی تعمیر پر شکریہ ادا کیا گیا۔
انہوں نے کہا کہ مراد علی شاہ سے بہتر وزیر اعلیٰ اس صوبے تو کیا کسی اور صوبے میں نہیں ہوسکتا۔ آصف زرداری کو گرفتار کرنا چاہتے ہیں تو کوشش کرلیں۔18ویں ترمیم کے حوالے سے پیپلز پارٹی کا موقف ایک ہی ہے۔ انہوں نے کہا کہ آئین کی آرٹیکل 149 کا نفاذ غیر قانونی اور غیر آئینی ہوگا۔
اسلام آباد: جعلی اکاؤنٹس کیس میں آصف زرداری اور فریال تالپور کی درخواست ضمانت پر سماعت جاری ہے۔
اسلام آباد ہائیکورٹ میں سابق صدر اور شریک چیئرمین پی پی آصف زرداری اور فریال تالپور کی جعلی اکاؤنٹس کیس میں ضمانت قبل از گرفتاری کی درخواست پر سماعت جاری ہے، اس دوران آصف زرداری اور فریال تالپور بھی اپنے وکلاء کے ہمراہ عدالت میں موجود ہیں۔
جعلی اکاؤنٹس کیس میں سابق صدر آصف زرداری کی جانب سے عدالت میں درخواست ضمانت دائر کی گئی ہے جس میں عدالت سے استدعا کی گئی ہے کہ نیب کو گرفتاری سے روکا جائے اور جعلی اکاؤنٹس کیس میں ضمانت قبل از گرفتاری منظور کی جائے۔
نواب شاہ: بلاول بھٹو کی قیادت میں ٹرین مارچ نواب شاہ پہنچ گیا، ایم پی اے طارق مسعود آرائیں کی قیادت میں جیالوں نے ٹرین مارچ کا استقبال کیا۔
تفصیلات کے مطابق حکومت مخالف ٹرین مارچ کے شرکا رات نواب شاہ میں قیام کے بعد صبح 10بجے براستہ سکھراسٹیشن لاڑکانہ جائیں گے۔
چیئرمین پی پی بلاول بھٹو کا ریلوے اسٹیشن پر کارکنان سے خطاب کرتے ہوئے کہنا تھا کہ یہ صرف ٹرین کا سفر ہے، وزیراعظم ہاؤس سے چیخیں آرہی ہیں، 4 اپریل کو قائد عوام کا 40 واں یوم شہاد ت ہے، یہ آج بھی بھٹو شہید کی نظریات سے ڈرتے ہیں، اسمبلی میں بھٹو کا نام لینے پر وزیر جل جاتے ہیں اور چیخیں نکلتی ہیں۔
انہوں نے کہا کہ پنجاب میں ہمارا راستہ روکا گیا، پارٹی رہنماؤں کو نا اہل کیا گیا، الیکشن سے دور رکھا گیا، ہمارے خلاف سارے ہتھکنڈے استعمال کیے گئے، لیاری میں دھاندلی کی گئی، آج بھی فارم 45 لاپتہ ہے، ہم جانتے ہیں نیب کالا قانون ہے، نیب سیاسی انتقام کے لیے مشرف کا بنایا ہوا ادارہ ہے۔
بلاول بھٹو کا کہنا تھا کہ احتساب پر اعتراض نہیں، پر احتساب کے نام پر سیاسی انتقام قبول نہیں، یہ آپ کے حقوق اور وسائل چھیننا چاہتے ہیں، یہ شہید بھٹو کے دیے ہوئے آئین کو ختم کرنا چاہتے ہیں، ہم آئین پر آنچ نہیں آنے دیں گے۔
ان کا مزید کہنا تھا کہ عوام کے حقوق اور وسائل پر سمجھوتا نہیں کریں گے، کس قسم کا وزیراعظم ہے جو مودی کے خلاف کچھ نہیں کرتا، کیا ہوا 50 لاکھ گھر کے وعدے کا؟ یہ کٹھ پتلی حکومت ہے، ہم نہیں مانتے۔
