آئی سی سی ون ڈے ورلڈ کپ کے پہلے سیمی فائنل میں نیوزی لینڈ کے خلاف بھارت کی پہلی وکٹ 71 رنز پر گر گئی ہے۔

کرکٹ کے سب سے بڑے میلے آئی سی سی ون ڈے ورلڈ کپ کے ممبئی کے وانکھیڈے اسٹیڈیم میں کھیلے جا رہے پہلے سیمی فائنل میں میزبان بھارت نے ٹاس جیت کر پہلے بیٹنگ کا فیصلہ کیا اور 9 اوورز میں ایک وکٹ کے نقصان پر 78 رنز بنا لیے ہیں۔

بھارت کی جانب سے اننگ کا آغاز کپتان روہت شرما اور شبھمن گل نے کہا۔ بھارتی کپتان نے شروع سے ہی جارحانہ انداز اختیار کیا اور پہلی وکٹ کے لیے 71 رنز کا آغاز فراہم کیا۔

اننگ کے نویں اوور میں روہت شرما 29 گیندوں پر 47 بنانے کے بعد ٹم ساؤتھی کو وکٹ دے بیٹھے۔ ان کی اننگ میں 4 چھکے اور اتنے ہی چوکے شامل تھے۔

اس سے قبل ٹاس کے بعد گفتگو کرتے ہوئے بھارتی قائد روہت شرما نے کہا کہ ہم ورلڈ کپ میں لگاتار 9 میچز جیت کر آئے ہیں لیکن آج نیا دن ہے۔ نیوز لینڈ سے اچھا مقابلہ ہوگا۔ آج کے میچ کے لیے ٹیم میں کوئی تبدیلی نہیں کی گئی ہے۔

کیوی قائد کین ولیمسن نے کہا کہ اگر ٹاس جیتتے تو ہم بھی پہلے بیٹنگ کو ترجیح دیتے۔ انہوں نے غیر ملکی میڈیا کی آج کے میچ کی پچ تبدیل کرنے کے دعوے کی نفی کرتے ہوئے کہا کہ میچ استعمال شدہ پچ پر ہی کرایا گیا ہے۔ ٹیم میں کوئی تبدیلی نہیں کی گئی ہے۔

یاد رہے کہ بھارت آج تک ناک آؤٹ مرحلے میں نیوزی لینڈ کو شکست دینے میں ناکام رہا ہے۔ اس سے قبل آئی سی سی ایونٹس کے ناک آؤٹ مراحل میں بھارت اور نیوزی لینڈ 3 بار مقابل آئے اور تینوں بار بھارت کو منہ کی کھانی پڑی۔ آخری بار آئی سی سی ورلڈکپ 2019 کے سیمی فائنل میں نیوزی لینڈ نے بھارت کو مات دی تھی۔

بڑے مقابلے کے لیے دونوں ٹیمیں ان کھلاڑیوں پر مشتمل ہیں۔

روہت شرما (کپتان)، شبھمن گل، ویرات کوہلی، شریاس ائیر، کے ایل راہول، سوریا کمار یادیو، رویندر جڈیجہ، جسپرت بمراہ، محمد شامی، کلدیپ یادیو اور محمد سراج


کین ولیمسن (کپتان)، ڈیون کانوے، رچن رویندرا، ڈیرل مچل، ٹام لیتھم، گلین فلپس، مارک چپمین، مچل سینٹنر، ٹم ساؤتھی، لوکی فرگوسن اور ٹرینٹ بولٹ۔

ورلڈ کپ کے پہلے سیمی فائنل میں آج بھارت اور نیوزی لینڈ پہلے ٹکرائیں گے اس بڑے مقابلے سے قبل سابق بھارتی بیٹر وریندر سہواگ نے اپنی ٹیم کو قیمتی مشورہ دیا ہے۔

سابق بھارتی اوپنر سہواگ نے بلیو شرٹس اسکواڈ کو مشورہ دیا ہے کہ وہ ممبئی میں نیوزی لینڈ کے خلاف سیمی فائنل میچ میں ہار کا ڈر نکال دیں اور بے خوف ہوکر کرکٹ کھیلیں۔

بھارت جو رواں ورلڈ کپ میں نا قابل شکست رہنے کا ریکارڈ رکھتی ہے تاہم مدمقابل کیویز کو آج تک کسی بھی میگا ایونٹ کے ناک آؤٹ مرحلے میں شکست نہیں دے سکی ہے۔ آخری بار 2019 کے ورلڈ کپ میں نیوزی لینڈ نے بھارتی کو سیمی فائنل میں ہرایا تھا۔

اسی حوالے سے ایک تقریب میں بات کرتے ہوئے سابق لیجنڈ بھارتی اوپنر سہواگ نے کہا کہ نتائج کے بارے میں مت سوچو بلکہ بے خوف ہوکر کھیلو اور اپنا بہترین کھیل پیش کرو۔ اگر 11 کھلاڑی اپنی بہترین کارکردگی کا مظاہرہ کرتے ہیں تو وہ جیت جائیں گے۔

2011 کی ورلڈ چیمپئن ٹیم کے رکن سہواگ نے اس موقع پر 12 سال پرانی فتح کا ذکر کرتے ہوئے اس وقت کے ہیڈ کوچ گیری کرسٹن کو یاد کیا اور کہا کہ اس وقت ناک آؤٹ میچ سے قبل اسی طرح کی بازگشت ہو رہی تھ جب ہم گیمز سے پہلے چیٹ کر رہے تھے تو ہر کوئی ایک دوسرے سے کہہ رہا تھا آپ اپنا بہترین دیں، ڈریسنگ روم میں منفی بات نہ کریں یہ تحریک ہمارے کام آئی اور ہم ورلڈ کپ جیت گئے۔

سابق اوپنر نے موجودہ بھارتی کپتان روہت شرما کی قیادت اور ٹاپ آرڈر پر بلے بازی کی مزید تعریف کی۔ ان کا کہنا تھا کہ وہ کچھ عرصے سے آزادانہ بیٹنگ کر رہے ہیں۔ لیکن اب جب وہ کپتان ہیں، وہ اچھی شروعات کرنے اور بہت زیادہ رنز بنانے کی زیادہ ذمے داری لے رہے ہیں، یہ بھی حیرت انگیز ہے کہ وہ کس طرح شبھمن گل کو ساتھ رکھ کر ان کی ٹریننگ کر رہے ہیں۔

تاہم وریندر سہواگ نے اعتراف کیا کہ ناک آؤٹ مرحلے میں اچھی کرکٹ کھیلنے کے علاوہ قسمت کا بھی عمل دخل ہوتا ہے۔ مجھے یاد ہے کہ 2011 میں پاکستان کے خلاف سیمی فائنل میں ہم نے صرف 260 کے لگ بھگ رنز بنائے تھے، لیکن ہمارے بولرز نے میچ جیتنے کے لیے اچھی بولنگ کی۔ موجودہ بھارتی ٹیم یقینی طور پر اچھا کھیل رہی ہے۔

پاکستان کرکٹ بورڈ نے سابق ٹیسٹ کرکٹر توصیف احمد کی سربراہی میں بنائی گئی عبوری سلیکشن کمیٹی تحلیل کر دی ہے جس کو چند روز قبل ہی تشکیل دیا گیا تھا۔

پاکستان کرکٹ بورڈ (پی سی بی) نے سابق ٹیسٹ کرکٹر توصیف احمد کی سربراہی میں قائم عبوری سلیکشن کمیٹی کو تحلیل کر دیا ہے۔ نئی سلیکشن کمیٹی اور چیف سلیکٹر کا اعلان ایک دور روز میں کیا جائے گا۔

ذرائع کا کہنا ہے کہ پی سی بی نے سابق کپتان محمد حفیظ کو چیف سلیکٹر بنانے پر غور شروع کر دیا ہے اور وہ قومی ٹیم کے اگلے ماہ شروع ہونے والے دورہ آسٹریلیا اور نیوزی لینڈ کے لیے ٹیم کا انتخاب کریں گے۔

پی سی بی منیجمنٹ کمیٹی کے سربراہ ذکا اشرف نے گزشتہ روز سابق کرکٹرز یونس خان، محمد حفیظ، وہاب ریاض اور سہیل تنویر سے بھی ملاقات کی تھی جس میں سابق کرکٹرز نے دورہ آسٹریلیا کے لیے بابر اعظم کو کپتان برقرار رکھنے کا مشورہ دیا تھا۔

دوسری جانب پی سی بی نے ورلڈ کپ میں خراب پرفارمنس کے بعد کپتان اور ٹیم مینجمنٹ کو طلب کر لیا ہے۔ بابر اعظم کی آج چیئرمین ذکا اشرف سے ملاقات متوقع ہے جس میں وہ میگا ایونٹ میں ٹیم کی ناکامی وجوہات پر رپورٹ پیش کریں گے۔

ورلڈ کپ سے باہر ہونے کے بعد سب سے پہلے قومی ٹیم کے بولنگ کوچ مورنی مورکل نے اپنی راہیں پی سی بی سے جدا کیں اور دسمبر تک ہونے والے معاہدے کو ایک ماہ قبل ہی ختم کرتے ہوئے اپنے فیصلے سے پی سی بی کو آگاہ کر دیا تھا۔

واضح رہے کہ چیف سلیکٹر انضمام الحق کے بعد پی سی بی نے گزشتہ ہفتے توصیف احمد کو عبوری چیف سلیکٹر مقرر کیا تھا۔

پاکستان کے سابق آل راؤنڈر عبدالرزاق نے بالی ووڈ کی معروف اداکارہ ایشوریا رائے سے متعلق اپنے متنازع بیان پر ان سے معافی مانگ لی ہے۔

سابق کرکٹر عبدالرزاق کی پروگرام کے دوران بھارتی اداکارہ ایشوریا رائے کا نام لے کرکھلاڑیوں پر تنقید بھاری پڑ گیا اور خود ان پر تنقید کی بارش ہو گئی جس کے بعد عبدالرزاق نے بالی ووڈ اداکارہ سے معذرت کر لی۔

عبدالرزاق گزشتہ دنوں کراچی میں ٹی 20 ورلڈ کپ 2009 کی فاتح ٹیم کے اراکین کے ہمراہ ایک تقریب میں شریک تھے جہاں انہوں نے رواں ورلڈ کپ میں پاکستانی ٹیم کی بدترین کارکردگی پر قومی ٹیم کے کھلاڑیوں پر تنقید کی۔

اسی دوران انہوں نے ٹی ٹوئنٹی ورلڈ کپ 2009 کا حوالہ دیتے ہوئے کہا کہ ہمیں معلوم تھا کہ یونس خان کی نیت صاف ہے جس نے ہمیں بھروسہ دیا جب کہ آج ہماری پالیسی ہی نہیں کہ ہم کھلاڑیوں کو ڈیولپ کریں۔

اس موقع پر عبدالرزاق نے نامناسب مثال پیش کرتے ہوئے کہا تھا کہ اگر ہماری سوچ یہ ہو کہ میں ایشوریا رائے سے شادی کروں اور اُس سے بڑا نیک پرہیزگار بچہ پیدا ہوجائے تو ایسا کبھی نہیں ہوسکتا، اس لیے پہلے آپ کو اپنی نیت ٹھیک کرنی پڑے گی۔

تاہم اس متنازع بیان پر اپنی غلطی کا احساس ہوتے ہی عبدالرزاق نے بالی ووڈ اداکارہ سے معافی مانگ لی۔

انہوں نے اپنے ایک ویڈیو پیغام میں کہا کہ مجھے مثال کچھ اور دینی تھی لیکن میرے منہ سے ایشوریا رائے کا نام نکل گیا جس پر میں اُن سے معذرت خواہ ہوں، میری نیت انکی تضحیک کرنا نہیں تھی۔

لاہورـ ورلڈکپ میں ناقص کارکردگی کی بنیاد پر چیئرمین مینجمنٹ کمیٹی کے سربراہ ذکا اشرف نےسلیکشن کمیٹی کو فارغ کردیا۔

تفصیلات کے مطابق عبوری چیف سلیکٹر توصیف احمد، وجاہت اللہ واسطی اور وسیم حیدر شامل تھے، نئی سلیکشن کمیٹی کا اعلان ایک دو روز میں متوقع ہے۔

نئے چیف سلیکٹر کیلئے پاکستان کرکٹ بورڈ (پی سی بی) نے سابق کرکٹرز سے رابطے بڑھانا شروع کردیئے ہیں۔

دوسری جانب دورہ آسٹریلیا کیلئے عبوری سلیکشن کمیٹی ہی اسکواڈ منتخب کرے گی۔

آئی سی سی ورلڈکپ کے دوران پی سی بی نے ناقص کارکردگی پر انضمام الحق کا استعفی منظور کیا تھا۔

قبل ازیں میگا ایونٹ میں قومی ٹیم کے بالنگ کوچ مورنی مورکل نے پاکستان کرکٹ بورڈ( پی سی بی) سے راہیں جدا کرلیں تھیں جبکہ فاسٹ بولر کا بورڈ کے ساتھ معاہدہ ختم ہونے میں ایک ماہ باقی تھا۔

لاہور: بابراعظم قومی کرکٹ ٹیم کے کپتانی برقرار رکھنے کافیصلہ کل متوقع ہے۔

ذرائع کے مطابق قومی کرکٹ ٹیم کے کپتان بابر اعظم کی بی سی بی مینجمنٹ کمیٹی کے سربراہ ذکا اشرف سے کل ملاقات متوقع ہے۔

ذرائع کا کہنا ہے کہ ملاقات سے قبل بابر اعظم کی مستقبل سے متعلق قریبی لوگوں سے مشاورت جاری ہے ، بابر اپنے مستقبل سے متعلق بڑا اعلان کرنے کے لیے مشاورت کر رہے ہیں۔

ذرائع کاکہنا ہے کہ پی سی بی عہدیداران نے بابر اعظم کو ریڈ بال کا کپتان برقرار رکھنے سے متعلق مشاورت کی ہے۔

ذرائع کے مطابق عہدیداروں کا خیال ہے کہ بابر اعظم کو ریڈ بال کا کپتان برقرار رہنا چاہیے ،کپتان کی تبدیلی کا فیصلہ کرنا ہے تو پہلے وائٹ بال سے متعلق فیصلہ ہو۔

کھٹمنڈو: نیپال کی حکومت نے چین کے سوشل میڈیا پلیٹ فارم ٹک ٹاک پر فوری طور پر پابندی عائد کردی ہے۔

عالمی میڈیا رپورٹس کے مطابق نوجوان نسل میں غلط رجحان پیدا کرنے اور ان پر منفی طور پر اثرانداز ہونے کی وجہ سے نیپال کی حکومت نے ٹک ٹاک پر پابندی اور اسی طرح کے دوسرے پلیٹ فارمز پر قانون سازی کا فیصلہ کیا ہے۔

نیپال کے وزیر برائے مواصلات اور حکومتی ترجمان ریکھا شرما نے کہا کہ کابینہ کے اجلاس میں ٹِک ٹاک پر فوری طور پر پابندی لگانے کا فیصلہ کیا گیا ہے۔

حکومتی ترجمان نے بتایا کہ ایکس اور فیس بک سمیت دیگر پلیٹ فارمز سے متعلق فیصلے زیر التوا ہیں۔ سوشل میڈیا صارفین کے لیے حکومتی ہدایات میں جعلی شناخت کے استعمال اور ہتک آمیز سرگرمیوں میں ملوث ہونے پر پابندی ہے۔ پلیٹ فارمز کو یہ بھی ہدایات دی گئی ہیں کہ وہ صارف کی اصل شناخت ظاہر کریں اور کسی بھی شکایت کی صورت میں تحقیقات میں تعاون کریں۔

پنجاب : حکومتِ پنجاب نے ہونہار و مستحق طلبا کے لئے وضائف کااعلان کردیا۔

میٹرک اور انٹرمیڈیٹ 2023کاامتحان 60 فیصد نمبر کے ساتھ پاس کرنے والے امیدواروں کے لئے حکومت پنجاب نے اسکالر شپ دینے کااعلان کیا ہے۔امیدوارپنجاب ایجوکیشن انڈوومنٹ فنڈ میں آن لائن د رخواستیں جمع کرواسکیں گے۔

اس سنہری موقع سے فائدہ اٹھانے کے لئےیتیم اور 60ہزار سے کم تنخواہ والے گریڈ 1سے4تک کے سرکاری ملازمین کے بچے بھی اہل ہونگے جبکہ اقلیتی مذاہب سے تعلق رکھنے والے طلبہ و طالبات اپلائی کرسکیں گے۔ محکمہ انسانی حقوق و اقلیتی امور کے تحت ہونہاراقلیتی طلبا کو اسکالر شپس دیئے جائیں گے۔

دہشتگردی میں شہید ہونے والے سویلین کے بچے بھی اس اسکالرشپ کے لئے اہل ہونگے۔

کراچی میں آج تیز دھوپ اور موسم خشک رہنے کا امکان ہے۔

محکمہ موسمیات کے مطابق گزشتہ 24 گھنٹوں کے دوران شہر کا کم سے کم درجہ حرارت 19 ڈگری سینٹی گریڈ ریکارڈ کیا گیا۔

محکمہ موسمیات کا کہنا ہےکہ آئندہ 24 گھنٹوں کے دوران شہر کا زیادہ سے زیادہ درجہ حرارت 32 سے 34 ڈگری سینٹی گریڈ تک جانے کا امکان ہے۔

محکمہ موسمیات کے مطابق ہوا میں نمی کا تناسب 54 فیصد ہے اور شمال مشرق سے چلنے والی ہواؤں کی رفتار 3کلو میٹر فی گھنٹہ ہے۔

کراچی: یونیورسٹی آف ہیلتھ سائنسز میں ایم بی بی ایس اور بی ڈی ایس کےایگزامینز کےلئے تعارفی سیمینار کاانعقاد ہوا

سیمینار کی صدارت وائس چانسلر پروفیسر احسن وحید راٹھور نے کی

صدارت سے خطاب کرتے ہوئے وائس چانسلر پروفیسر احسن وحید راٹھورنے کہا میڈیکل کےامتحانات میں بچوں کے 95 فیصد سے زیادہ نمبر آنا سمجھ سے باہر ہےایم سی کیوز پرچوں میں طلبہ 100 فیصد نمبر لے رہے ہیں۔ ایسے نتائج پر بین الاقوامی ادارے پاکستان کے میڈیکل ایجوکیشن کے معیار پر سوال اٹھارہے ہیں۔

ایسے سنگین صورتحال میں میڈیکل کے امتحانی نظام میں اصلاحات کی فوری ضرورت ہے۔ امتحانی اصلاحات کےلئے ماہرین پر مشتمل کمیٹی فارکنڈکٹ آف ایگزامینشنز تشکیل دی گئی۔