لاہور: پنجاب ایجوکیشن فائونڈیشن کئی سالوں سے نئے اسکول قائم نہ کرسکا۔

محکمہ اسکول ایجوکیشن پنجاب کے دعوے دھرے کے دھرے رہ گئے۔نئے اسکولز قائم نہ ہونے کے باعث اسکولوں سے باہرکی تعداد 70 لاکھ سے تجاوز کرگئی مگر دوسری طرف نئے اسکولز بھی قائم نہ کرسکا۔فنڈز کی کمی کی وجہ سے اسکول قائم نہ ہوسکے ، پنجاب ایجوکیشن فائونڈیشن ان علاقوں میںاسکول قائم کرتاہے جہاں سرکاری اسکول نہیں ہوتے ۔چار سال قبل پیف پنجاب بھر میں نئے اسکول فارم وصول کرنے کی درخواست طلب کرتاتھا ۔

واضح رہےاِس وقت پنجاب میں پیف کے سات ہزار سے زائد اسکول قائم ہیں ، ترجمان کا کہناہے کہ منسوخ اسکولوں کی جگہ نئےاسکول قائم کررہے ہیں جبکہ چولستان اور تھل میں بھی چند اسکول قا ئم کرنے جارہے ہیں۔

پاکستان کے سابق وکٹ کیپر بیٹر کامران اکمل کا کہنا ہے کہ کپتان بابر اعظم اور ان کی ٹیم کو پاکستانی شائقین کی جانب سے بے حد سپورٹ ملتی ہے۔

کراچی میں ایک تقریب میں پاکستان کے لیجنڈ سابق کرکٹرز نے شرکت کی جن میں شاہد آفریدی،مصباح الحق،کامران اکمل، عمر گل، سعید اجمل، راشد لطیف اور شعیب ملک شامل تھے۔

تقریب سے خطاب کرتے ہوئے کامران اکمل نے کہا بابر اعظم اور ان کی ٹیم کو تین سال جتنا سپورٹ آپ لوگوں کی طرف سے پاکستان کی عوام کی طرف سے انہیں ملا اگر یہ ہی سپورٹ یونس بھائی، شاہد بھائی اور مصباح کو ملا ہوتا تو یہ بھی کوئی ورلڈکپ یا بڑا ایونٹ اپنے نام کرتے

کامران اکمل نے کہا پاکستان ٹیم جیتنے کے ارادے سے کھیلی ہی نہیں جس کی وجہ سے اس ورلڈکپ میں نقصان اٹھانا پڑا، آپ ٹی ٹوئنٹی کی سلیکشن ختم کریں، ٹیم کا انتخاب ون ڈے کے طور پر کریں گے تو ہمیں ایسے بڑے ایونٹ میں مار نہیں کھانی پڑے گی'۔

انہوں نے یہ بھی کہا کہ بابر کو کپتانی کے چار سال ملے ہیں، میں بھائی کے طور پر بات کررہا ہوں ، سب جانتے ہیں میرا اس سے کیا رشتہ ہے، اگر سب چاہتے ہیں کہ بابر 24،25 ہزار رنز کرے تو اسے دباؤ ہٹانے کے لیے کپتانی ایک طرف کرنی پڑے گی ، جب ایسا ہوگا تو وہ بطور کھلاڑی اور اچھا پرفارم کرے گا۔

سابق وکٹ کیپر بیٹر نے مسکراتے ہوئے آل راؤنڈر افتخار احمد کو کپتانی کے لیے بہترین آپشن قرار دیا۔

کراچی: نگراں وزیر تعلیم سندھ رعنا حسین کی زیر صدارت اسٹیرنگ کمیٹی کی ذیلی کمیٹی کا اجلاس ہوا

اجلاس میں سیکریٹری اسکول ایجوکیشن سندھ اور دیگر میمبران نےشرکت کی۔

جلاس میں تعلیمی سال کی شروعات، امتحانات کا شیڈول، چھٹیوں اور دیگر اہم فیصلوں پربحث ہوئی۔اجلاس میں فیصلہ کیا گیا کہ سندھ بھر کے اسکولز میں نیا تعلیمی سال 15 اپریل سے شروع ہوگا جبکہ سندھ بھر کے کالجز میں نیا تعلیمی سال یکم اگست سے شروع کرنے پر اتفاق کیا گیا ہے۔

اجلاس میںمشاورت کے بعدفیصلہ کیا گیاہے کہ صوبے بھر میں موسم سرما اور گرما کی تعطیلات پرانے شیڈول کے مطابق ہونگے ۔جبکہ بورڈز کے سالانہ امتحانات کے حوالے سےبتایا گیا ہے کہ میٹرک کےامتحانات مئی کے پہلے ہفتے اور انٹر امتحانات مئی کے آخری ہفتے سے شروع ہونگے۔

میٹرک کے سالانہ امتحانات کے نتائج 31جولائی اور انٹرمیڈیٹ کے سالانہ نتائج اگست کے دوسرے ہفتے تک جاری کیے جائیں گے۔

کراچی:  ثانوی تعلیمی بورڈکراچی نے15نومبر سے ضمنی امتحانات 2023کیلئے امتحانی فارم جمع کرانے کی تاریخ کا اعلان کر دیا ہے۔

چیئرمین میٹرک بورڈ سید شرف علی شاہ کی خصوصی ہدایت پر قائم مقام ناظم امتحانات خالد احسان نے بتایا کہ میٹرک سائنس اور جنرل گروپ ریگولر وپرائیویٹ سالانہ امتحانات 2023 کے پرچوں میں فیل ہو جانے والے طلباء و طالبات ضمنی امتحانات کیلئے فارم بغیر لیٹ فیس کے 15نومبرسے30 نومبر 2023ء تک جمع کرا سکتے ہیں۔

تفصیلات کے مطابق تمام ریگولر طلباء و طالبات اپنے امتحانی فارم اپنے تعلیمی ادارے کے توسط سے جمع کرائیں گے،تاہم پرائیویٹ طلباء وطالبات اپنے فارم متعلقہ بینکوں میں ذاتی طور پر جمع کرا سکتے ہیں۔ اس کے بعد شیڈول کے مطابق لیٹ فیس کے ساتھ امتحانی فارم یکم دسمبر سے8دسمبر تک200روپے،11دسمبر سے15دسمبر تک 800روپے اورامتحانی فارم کی تاریخ ختم ہونے کے بعد 2500روپے لیٹ فیس کے ساتھ جمع کرا سکتے ہیں۔

ورلڈ کپ میں پاکستان کی بدترین کارکردگی کے بعد جنوبی افریقہ سے تعلق رکھنے والے قومی ٹیم کے بولنگ کوچ مورنی مورکل نے پی سی بی سے راہیں جدا کر لیں۔

 ورلڈ کپ میں پاکستان کا سفر ناکامی کے ساتھ ختم ہوتے ہی قومی ٹیم کے بولنگ کوچ مورنی مورکل نے پی سی بی کے ساتھ اپنا سفر ختم کر دیا۔

مورنی مورکل نے پاکستان کرکٹ بورڈ کواپنے فیصلے سے آگاہ کر دیا ہے اور وہ قومی ٹیم کی ذمے داریوں سے علیحدہ ہو کر اپنے ملک جنوبی افریقہ ٹی ٹوئنٹی لیگ میں مصروف ہو گئے ہیں۔

جنوبی افریقہ کے سابق فاسٹ بولر مورنی مورکل کا پی سی بی کے ساتھ رواں سال جون میں 6 ماہ کا کوچنگ معاہدہ ہوا تھا۔

ذرائع کا کہنا ہے کہ پاکستان ٹیم کے بولنگ کوچ کے لیے سابق پاکستانی پیسر عمر گل مضبوط امیدوار ہیں۔

واضح رہے کہ مورنی مورکل کی کوچنگ کے دوران پاکستانی بولرز کی کارکردگی عروج سے زوال کی جانب گامزن ہوئی اور گزشتہ دو ماہ کے دوران ایشیا کپ کے بعد کرکٹ کے سب سے بڑے عالمی میلے ورلڈ کپ میں بھی پاکستانی بولنگ اٹیک کا پول کھل گیا۔

قومی ٹیم کے سابق آل راؤنڈر عبدالرزاق کا کہنا ہے کہ پاکستانی ٹیم کا اگلا کپتان آپ فخر زمان اور شاہین شاہ آفریدی کو بناسکتے ہیں۔

کرکٹر عبدالرزاق نے کہا کہ اگر بابر اعظم افغانستان سے شکست کے بعد کپتانی چھوڑ دیتے تو فخر زمان کپتان بن سکتے تھے اگر اس سے اچھا کرنا تھا تو شاہین شاہ آفریدی سے کپتانی کروا سکتے تھے۔

انہوں نے کہا کہ شاہین آفریدی لاہور قلندرز سے بھی کپتانی کرچکے ہیں وہ اچھے کپتان ہوسکتے ہیں۔
عبدالرزاق نے کہا کہ جب ملک کی بات ہوتی ہے تو مشکل فیصلے کرنے پڑتے ہیں، ٹیمیں وہ جیتتی ہیں جن کی نیت اچھی ہوتی ہے اگر بابر وہاں پر کپتانی چھوڑ دیتے تو میں سمجھتا ہوں تو پاکستان کے لیے اچھا ہوتا۔

انہوں نے کہا کہ پاکستانی ٹیم میں نائب کپتان کا اتنا اثر و رسوخ نہیں ہوتا ہے، کپتان کا مطلب ایک ٹیم ہوتا ہے۔

عبدالرزاق نے کہا کہ مینجمنٹ میں بھی ایسے لوگ آنے چاہیئں جنہوں نے کرکٹ کھیلی ہو اور اسے سمجھتے ہوں، کپتان جس کو مرضی بنادیں جب وہ اس کو ساتھ لے کر چلیں گے مسئلے حل ہوجائیں گے۔

ورلڈ کپ کے 44ویں میچ میں انگلینڈ نے پاکستان کو باآسانی 93 رنز سے شکست دی اور پاکستان کا ورلڈ کپ کا سفر پانچویں پوزیشن پر ختم ہوا۔

کولکتہ کے ایڈن گارڈن اسٹیڈیم میں کھیلے گئے میچ میں پاکستان کی ٹیم انگلینڈ کی جانب سے دیے گئے 338 رنز کے تعاقب میں 244 رنز پر ڈھیر ہوگئی۔

واضح رہے کہ پاکستانی ٹیم ورلڈ کپ میں صرف چار میچ جیت سکی، قومی ٹیم نے بنگلہ دیش، سری لنکا، نیدرلینڈز، نیوزی لینڈ کو ہرایا، بھارت، آسٹریلیا، جنوبی افریقہ، افغانستان، انگلینڈ کیخلاف ٹیم ناکام رہی۔

پاکستانی اداکارہ فضا علی کا کہنا ہے کہ علیحدگی کے باوجود وہ سابق شوہر فواد کی برائی نہیں برداشت کرسکتیں۔

اداکارہ فضا علی حال ہی میں ایک نجی شو کی مہمان بنی تھیں جس دوران انہوں نے اپنی ناکام ازدواجی زندگی کے کچھ پہلوؤں پر بھی بات کی۔

انہوں نے بتایا کہ ’میں نے بیٹی کی پیدائش کے تیسرے دن ہی کام کرنا شروع کردیا تھا اور جب سے روزانہ باقاعدگی سے شوٹ پر ہوتی ہوں لیکن سیٹ پر کئی لوگوں کا رویہ ناگوار گزرتا تھا اور کچھ لوگوں کی وجہ سے تو ڈراموں سے کنارہ کشی بھی اختیار کرنا پڑی‘۔
فضا علی نے کہا کہ ’میں نے شوبز سے کنارہ کشی سابق شوہر فواد کی وجہ سے کی کیوں کہ علیحدگی کے بعد جب میں کام کیلئے سیٹ پر آئی تو لوگ مجھ سے ہمدردی کے اظہار کیلئے فواد کی برائی کرتے تھے، ان میں وہ لوگ بھی شامل تھے جو فواد کے دوست تھے لیکن یہ سب مجھے پسند نہیں تھا نہ ہی مجھ سے فواد کی برائی برداشت ہوتی تھی جس کی وجہ سے میں نے ڈراموں میں کام کرنا بھی چھوڑدیا‘۔

فضا علی کا کہنا تھا ’آپ اس شخص کی برائی نہیں سن سکتے جس نے آپ کے ساتھ کچھ برا کیا ہی نہ ہو سابق شوہر نے کبھی مجھے مارا پیٹا نہیں نہ ہی گالم گلوچ کی انہیں پتا ہی نہیں تھا کہ گالی کیا ہوتی ہے، وہ بہت اچھے انسان ہیں‘۔




اداکارہ نے مزید کہا کہ ’کسی بھی دو افراد میں علیحدگی کیلئے دوسری وجوہات بھی ہوسکتی ہیں لیکن مجھے پتا ہے کہ اس شو کے بعد تبصروں میں لوگ مجھ پر تنقید کریں گے کہ اگر اچھا تو چھوڑا کیوں؟

خیال رہے کہ فضا علی نے 2007 میں فواد فاروق سے شادی کی تھی اور دونوں کی ایک بیٹی بھی ہے۔

پولیو کا شکار پاکستانی نوجوان نوید بٹ نے امریکا میں ہونے والے مسٹر اولمپیا مقابلوں میں گولڈ میڈل جیت لیا۔

امریکا کے لاس ویگاس میں مسٹر او لمپیا کے مقابلے کا اہتمام کیا گیا جس میں فزیکل چیلنج کیٹیگری میں پاکستان کے نوید بٹ نے گولڈ میڈل اپنے نام کیا۔

نوید بٹ بچپن میں پولیو کا شکار ہوئے لیکن انہوں نے اپنی معذوری کو مجبوری نہیں بننے دیا اور تن سازی میں محنت کرکے نام کمایا۔

اس موقع پر نوید بٹ نے اپنی خوشی کا اظہار کرتے ہوئے کہا کہ میں نے پانچویں مرتبہ مسٹر اولمپیا میں میڈل جیتا ہے۔

نوید بٹ نے کہا کہ میں نے انفرادی طور پر محنت کی اور ملک کا نام روشن کیا جس کی بہت خوشی ہے، مستقبل میں بھی ملک کا نام روشن کرتا رہوں گا۔

ورلڈ کپ کے 44 ویں میچ میں انگلینڈ کی پاکستان کے خلاف بیٹنگ جاری ہے۔

دونوں ٹیموں کے درمیان یہ میچ ایڈن گارڈنز کولکتہ میں کھیلا جارہا ہے جہاں انگلینڈ نے پاکستان کے خلاف ٹاس جیت کر بیٹنگ کا فیصلہ کیا۔

انگلینڈ کی دوسری وکٹ 108 رنز پر گری، پہلے افتخار احمد نے ڈیوڈ ملان کو 31 رنز پر آؤٹ کیا، بعدازاں حارث رؤف نے جونی بیئر اسٹو کو 59 رنز پر پویلین لوٹایا۔

ٹاس کے موقع پر گفتگو کرتے ہوئے پاکستان ٹیم کے کپتان بابر اعظم نے کہا کہ ٹاس جیت کر پہلے بیٹنگ کا ارادہ تھا، ٹیم میں ایک تبدیلی ہے، حسن علی کی جگہ شاداب خان شامل ہیں۔

دوسری جانب انگلش کپتان جوز بٹلر بولے کہ وکٹ بیٹنگ کےلیے اچھی ہے، زیادہ سے زیادہ اسکورکرنے کی کوشش کریں گے۔

ورلڈ کپ کے پہلے مرحلے میں دونوں ٹیموں کا یہ آخری میچ ہے، پاکستان اور انگلینڈ دونوں نے اب تک آٹھ آٹھ میچز کھیلے ہیں، پاکستان نے اپنے 4 اور انگلینڈ نے اپنے 2 میچز جیتے ہیں۔

پوائنٹس ٹیبل پر پاکستان پانچویں اور انگلینڈ ساتویں نمبر پر ہے۔

وفاقی حکومت کا ٹوبیکو کنٹرول سیل سفید ہاتھی بن گیا ہے، کنٹرول سیل کی نااہلی سے سگریٹ ساز کمپنیاں بے لگام ہو گئیں۔

ذرائع کے مطابق سگریٹ ساز کمپنیوں نے وزارت قومی صحت کے احکامات ہوا میں اڑا دیے ہیں، اور ٹوبیکو کنٹرول سیل سگریٹ ساز کمپنیوں سے قوانین کی پابندی کرانے میں ناکام ہو گیا۔

وزارت قومی صحت کے ذرائع کا کہنا ہے کہ نیشنل ٹوبیکو کنٹرول سیل نے 10 سگریٹ ساز کمپنیوں کو شوکاز جاری کیے تھے، یہ کمپنیاں تمباکو تشہیری قوانین کی خلاف ورزی میں ملوث تھیں جس پر انھیں ٹی سی سی نے تین ماہ قبل شوکاز کا اجرا کیا تھا۔

ذرائع کا کہنا ہے کہ ٹوبیکو کنٹرول سیل نے سگریٹ ساز کمپنیوں سے 10 روز میں جواب طلب کیا تھا، لیکن بیش تر سگریٹ ساز کمپنیوں نے ٹی سی سی کو شوکاز کا جواب ہی نہیں دیا، عدم تعمیل والی سگریٹ ساز کمپنیوں کو یاد دہانی نوٹسز کا اجرا بھی کیا گیا، اور قانون شکن کمپنیوں کے خلاف مقدمات اندراج کا فیصلہ بھی ہوا، تاہم ٹوبیکو کنٹرول سیل سگریٹ ساز کمپنیوں کے خلاف مقدمات اندراج میں تاحال ناکام ہے۔