ایمزٹی وی(اسلام آباد)مسلم لیگ ن کے رہنما دانیال عزیز نے کہاہے کہ مریم نواز پی ٹی آئی والوں کے دماغ پر طاری ہوچکی ہیں ،جبکہ انہوں نے الزامات کی بنیادپرطوفان بد تمیزی برپا کیا ہوا ہے۔
تفصیلات کے مطابق دانیال عزیز کا پریس کانفرنس کرتے ہوئے کہناتھا کہ چیئرمین تحریک انصاف نے جو درخواست پیش کی ہے اس میں مریم نواز کا ذکر تک نہیں ہے، لیکن یہ لوگ عدالت سے باہر آکر مریم نواز پر الزامات لگانا شروع کر دیتے ہیں کہ 31.5 لاکھ کاتحفہ مریم بی بی کے شوہر کے ٹیکس رٹرن میں شامل نہیں ہے۔
انہوں نے کہا کہ عمران خان اپنی ساکھ بچانے کے لیے پتلی گلی تلاش کررہے ہیں تاکہ اپنی بری شکست کو چھپا سکیں اسی لئے پرانے کاغذات کو نئے نئے طریقے سے سوشل میڈیا پر پیش کیا جارہا ہے ۔جبکہ میری میڈیا کے کچھ لوگوں سے اپیل سے جو بہت آگے نکل چکے ہیں ،انہوں نے اس کیس میں کمپین بنا لی ہے اور ہر نیوز بولٹن میں مریم نواز کی طرح طرح کی تصاویر رپورٹ دکھاتے ہیں اس بات سے گریز کریں ۔