راولپنڈی: آرمی چیف جنر ل قمر جاوید باجوہ نے عمرے کی سعادت حاصل کرلی ، ملک کی ترقی اور استحکام کے لیے خصوصی دعا کی، اس سے قبل وزیر اعظم بھی رمضان میں عمرے کی ادائیگی کرچکے ہیں۔

 

پاک فوج کے سپہ سالار عمرے کی ادائیگی کے لیے مکہ مکرمہ کے دورے پر ہیں جہاں ان کی جانب سے عمرے کی ادائیگی کے موقع پر خصوصی طور پر بیت اللہ شریف کے دروازے کھول دیے گئے۔

 

عمرے کی ادائیگی کے بعد بیت اللہ کی اندر سے زیارت کا شرف حاصل کرتے ہوئے انہوں نے پاکستان کی ترقی، خوشحالی ، استحکام اور امن کیلئے خصوصی دعا کی۔

 

یاد رہے کہ وزیراعظم عمران خان نے خاتون اول بشریٰ بی بی ، وزیر اعلیٰ پنجاب عثمان بژدار، وزیر اعلیٰ خیبر پختونخواہ محمود خان اور وزیراعظم کے معاون خصوصی نعیم الحق اور وزیر مملکت برائے مواصلات مراد سعید سمیت اہم شخصیات کے ہمراہ رمضان المبارک میں عمرہ کی سعادت حاصل کی تھی۔

 

یاد رہے کہ وزیراعظم او آئی سی کانفرنس میں شرکت کے لیے تین روزہ دورے پر سعودی عرب پہنچے تھے ۔ عمران خان نے روضہ رسولﷺ پر حاضری دی اور مسجد نبوی میں نوافل بھی ادا کیے تھے ۔

 

عمران خان کی مسجد نبوی آمد کے موقع پر پاکستانیوں کی بڑی تعداد ان کے ارد گرد جمع ہوگئی تھی ، تاہم وزیراعظم نے مسجد نبوی کے احترام میں پاکستانیوں کو نعرے لگانے سے روک دیا تھا۔

 

وزیراعظم عمران نے اس دورے میں او آئی سی کے 14ویں سربراہ اجلاس سے بھی خطاب کیا تھا ، جس میں انہوں نے مسلم امہ میں اتحاد اور یکجہتی پر زور دیا، توہین رسالت کے معاملے کی روک تھام پر مسلم امہ کی کوششیں بڑھانے پر زور دیا جبکہ مسلم دنیا کو مقبوضہ کشمیر کی صورت حال سے بھی آگاہ کیا تھا۔