ایمزٹی وی(شوال)پاکستان میں تیار کردہ ڈرون ”براق“ کو پاکستانی تاریخ میں آج پہلی مرتبہ استعمال کر لیا گیا ہے اور پہلی ہی کارروائی میں 3دہشت گرد ہلاک ہو گئے۔ تفصیلات کے مطابق پاکستان نے پہلی مرتبہ دہشت گردی کے خلاف جاری آپریشن میں اندرون ملک تیار کردہ ڈرون طیارے براق کا استعمال کیا ہے۔ پاکستان کے اپنے انجینئرز کا تیار کردہ براق ڈرون انتہائی مہارت کے ساتھ نشانہ لگانے کی صلاحیت رکھتا ہے۔ اس پر لگے ہوئے لیزر گائیڈڈ میزائل ہر موسم میں ہدف کو نشانہ بنا سکتے ہیں۔ براق ڈرون مکمل طور پر پاکستان میں تیار کردہ ہے۔ اس کو پاکستان ایئر فورس کے ساتھ ساتھ قومی انجینئرنگ اور سائنسی کمیشن پاکستان کی سول سائنسی تحقیق اور ترقی کی تنظیم نے بنایا۔ اس کو بغیر پائلٹ کے جدید ترین لڑاکا فضائی گاڑی کہا جاسکتا ہے۔ اس کی ایپلی کیشنز انسداد بغاوت کی کارروائیوں میں پاکستان آرمی کی طرف سے استعمال کی گئی ہیں۔ براق کے ذریعے مختلف علاقوں اور مقامات کی منظر کشی اور موشن سنسر کی جاتی ہیں۔ لیزر گائیڈڈ میزائل سے لیس براق سے ساکن اور حرکت کرتے ہوئے اہداف کو کامیابی سے نشانہ بنایا جاسکتا ہے۔