لاہور: وزیراعلیٰ پنجاب سردار عثمان بزدار نے انسداد پولیو کے لیے فعال ومتحرک انداز میں بھرپور مہم چلانے کی ہدایت کی ہے۔

 

وزیراعلیٰ پنجاب نے کہا کہ پنجاب میں انسداد پولیو کے لیے مربوط انداز میں موثر اقدامات کیے جا رہے ہیں۔ انہوں نے کہا کہ انسداد پولیو مہم کے لیے وضع کردہ پلان پر100 فیصد عملدرآمد یقینی بنایا جائے اور فیلڈ میں موجود انسداد پولیو ٹیموں کی موثر مانیٹرنگ کی جائے۔

 

سردار عثمان بزدار نے کہا کہ انسداد پولیو کے لیے اقدامات میں غفلت برداشت نہیں کروں گا، وضع کردہ پلان پر عملدرآمد میں تساہل کی کوئی گنجائش نہیں اور جہاں کوتاہی نظر آئی وہاں پر سخت ایکشن لیا جائے گا۔

 

وزیراعلیٰ پنجاب نے کہا کہ پولیو کے خلاف جنگ کو ہر قیمت پر جیتنا ہے، ہم اپنے بچوں کو پولیو کے موذی مرض سے ہر صورت بچائیں گے۔

 

انہوں نے کہا کہ والدین بچوں کو انسداد پولیو قطرے لازمی پلائیں، مشترکہ کاوشوں سے مرض کا خاتمہ کریں گے کیونکہ یہ ہمارا قومی مسئلہ ہے اور اس سے نمٹنے کے لیے سب کو مل کر کام کرنا ہوگا۔

 

 

یاد رہے کہ گزشتہ روز وزیراعظم کے فوکل پرسن برائے انسداد پولیو مہم بابر بن عطا کا کہنا تھا کہ اپنے بچوں کو پولیو سے بچانا ہر شہری کی قومی ذمے داری ہے۔