ایمز ٹی وی (کراچی) کراچی کےمختلف علاقوں میں رینجرز نے چھاپے مار کر کالعدم تنظیم کے دو دہشت گرد سمیت 6 ملزمان کو گرفتار کر لیا ۔ شہر قائد میں رینجرز نے ٹارگٹیڈ کارروائی کر کے کالعدم تنظیم کے دو دہشت گرد سمیت 6 ملزمان کو گرفتار کر لیا۔ رینجرز ترجمان کے مطابق چھاپے اورنگی اور بلدیہ میں مارے گئے ۔ گرفتار ملزمان میں دو کالعدم تنظیم کے دہشت گرد بھی شامل ہیں ۔ ملیر میں چھاپے کے دوران تین مشتبہ افراد کو حراست میں لیا گیا ہے۔ دوسری جانب وفاقی پولیس نے اسلام آباد میں سرچ آپریشن کے دوران دو افغان باشندوں سمیت اکیس مشکوک افراد کو گرفتار کر لیا ہے ۔
تھانہ آئی نائن پولیس نے فیض آباد اور ملحقہ علاقوں میں علی الصبح سرچ آپریشن کیا ، آپریشن کے دوران درجنوں ہوٹلز، ہاسٹلز، گیسٹ ہاؤسز اور گھروں کو چیک کیا گیا ۔ سرچ آپریشن کے دوران اکیس مشکوک افراد کو گرفتار کیا گیا ، گرفتار افراد میں دو افغان باشندے بھی شامل ہیں ۔ پولیس کے مطابق گرفتار افراد میں سے اکثریت کے پاس شناختی دستاویزات موجود نہیں تھیں ۔ پولیس نے گرفتار افراد کو تھانے منتقل کر کے تفتیش شروع کر دی ہے۔