ایمز ٹی وی (کراچی) کراچی میں نمائش چورنگی پر مذہبی جماعت لبیک یارسول اللہ صلی اللہ علیہ وسلم کے تحت ہونے والا دھرنا پانچویں روزبھی جاری ہے۔ صبح ہوتے ہی دھرنے کے شرکاء گزشتہ روز کی طرح بیچ سڑک سے ہٹ کر ایم اے جناح روڈ کے کنارے بیٹھ کر دھرنا دینے لگے۔ ٹریفک پولیس کا کہنا ہے کہ گرومندر سے نمائش آنے والی سڑک ٹریفک کے لیے کھول دی گئی ہے۔ گزشتہ شام بھی دھرنا مظاہرین نے سڑک کے کنارے سے اٹھ کر سڑک کے درمیان بیٹھ کر دھرنا دے دیا تھا اور سڑک پر ٹریفک کی روانی معطل ہو گئی تھی۔
جس کے بعد اس سڑک سے گزرنے والے ٹریفک کو متصل دیگر متبادل راستے استعمال کرنے پڑے تھے، جبکہ رش ہونے کی وجہ سے کئی علاقوں میں ٹریفک جام کی صورت حال بھی دیکھنے میں آئی تھی۔
کراچی میں مظاہرین نے اسلام آباد میں ہونے والے تحریک لبیک کے دھرنے کے شرکاءسے خیرسگالی کے تحت پانچ روز سے دھرنا دے رکھا ہے۔ ان کا کہنا ہے کہ مطالبات کی منظوری تک دھرنا جاری رکھیں گے۔