لاہور: ٹی ٹوئنٹی ورلڈکپ 2021میں پاکستان اور بھارت کےدرمیان میچ کےتمام ٹکٹ چند گھنٹوں میں فروخت ہوگئے۔

رواں ماہ ٹی 20 ورلڈ کپ میں روایتی حریف پاکستان اور بھارت کے درمیان ہونے والے میچ کے ٹکٹ آن لائن فروخت کئے گئے، ویب سائٹ پر خریداری کے لیے ونڈو کھلتے ہی ہزاروں کی تعداد میں شائقین ٹکٹ کے حصول کے لیے کوشاں تھے۔

گزشتہ رات 1500 درہم کے پریمیئم اور2600 درہم کے پلاٹینم ٹکٹ ہی باقی رہ گئے تھے تاہم آج صبح تک یہ بھی ختم ہوگئے، شائقین کی بڑی تعداد سوشل میڈیا پربلیک میں ٹکٹ حاصل کرنے کے لیے کوشاں نظر آتی ہے۔

واضح رہے کہ ورلڈ کپ میں پاکستان اور بھارت کا میچ 24 اکتوبر کو کھیلا جائے گا۔