ایمزٹی وی(اسپورٹس)بھارتی کرکٹ بورڈ نے انڈین پریمیئر لیگ میں اسپاٹ فکسنگ میں ملوث بھارتی کھلاڑی اجیت چنڈیلا پر تاحیات پابندی عائد کر دی.

اجیت چنڈیلا پرتاحیات پابندی لگانے کا فیصلہ گزشتہ روز ممبئی میں بھارتی کرکٹ بورڈ (بی سی سی آئی) کی انضباطی کمیٹی کے اجلاس میں کیا گیا۔ بورڈ کی جانب سے جاری کردہ بیان میں کہا گیا ہے کہ اجیت چنڈیلا پر بورڈ کے اینٹی کرپشن کوڈ کی 7 دفعات کی خلاف ورزی کا الزام ثابت ہوا ہے جس کی وجہ سے ان پر پابندی لگانے کا فیصلہ کیا گیا۔

بھارتی بورڈ کے بیان میں مزید کہا گیا ہے کہ چنڈیلا کے کرکٹ میچوں یا کھیل سے وابستہ کسی سرگرمی میں شرکت اور بورڈ کے معاملات سے کسی بھی قسم کا تعلق رکھنے پر تاحیات پابندی ہو گی۔

واضح رہے کہ بی سی سی آئی نے ستمبر 2013 میں سری سانت اور انکت چوہان پر تاحیات پابندی عائد کر دی تھی اور چنڈیلا پر اب یہ پابندی لگانے کا فیصلہ کیا گیا ہے جب کہ بی سی سی آئی نے چنڈیلا کے علاوہ ایک اور مقامی کھلاڑی ہکن شاہ ہر بھی اینٹی کرپشن کوڈ کی خلاف ورزی پر پانچ سال کی پابندی لگائی ہے۔