ایمزٹی وی (تجارت) وزارت پوسٹل سروسز نے اصلاحاتی ایجنڈے کے تحت لاجسٹکس کمپنی پوسٹ لاگ کی رجسٹریشن کا عمل مکمل کر لیا۔ لاجسٹک کمپنی کے قیام کے لیے 6کمپنیوں کی شارٹ لسٹنگ کر لی گئی جو حتمی منظوری کے لیے ستمبر میں اسٹیئرنگ کمیٹی میں پیش کی جائے گی۔ منظوری کے بعد کمپنی کو پائلٹ پروجیکٹ کے طور پر پیش کیا جائے گا۔ بعد ازاں اس کا دائرہ کار بڑھایا جائے گا۔ پوسٹ لاگ کمپنی کے قیام سے پاکستان پوسٹل سروسز کو 10سال کے دوران 12ارب روپے کا اضافی ریونیو حاصل ہوگا۔ سابق وزیر اعظم میاں محمد نواز شریف کے دور میں پاکستان پوسٹ کو خسارے کے پیش نظر اس میں اصلاحات لانے کا فیصلہ کیا گیا تھا جس کے تحت پاکستان پوسٹ کی ری برانڈ نگ
موبائل منی سلیوشن اور لاجسٹک کمپنی کے قیام عمل میں لایا جانا تھا۔ میڈیا کو موصول دستاویز کے مطابق اس منصوبے پر عملدرآمد کرتے ہوئے وزارت پوسٹل سروسز نے لاجسٹک کمپنی سیکیورٹیز اینڈ ایکسچینج کمیشن آف پاکستان (ایس ای سی پی) میں رجسٹر کروالی ہے۔ اس لاجسٹک کمپنی کا نام پوسٹ لاگ رکھا گیا ہے اور پوسٹل سروسز کی جانب سے لاجسٹک کمپنی کا نام اور لوگوآئی پی او (انٹیلکچوئل پراپرٹی آرگنائزیشن) میں رجسٹرڈ بھی کروا لیا گیا۔ دستاویز کے مطابق پاکستان پوسٹ کے اصلاحاتی ایجنڈے کے تحت پوسٹل سروسز کی جانب سے اس منصوبے کی فزیبلٹی اسٹڈی مکمل کر لی گئی ہے۔
پوسٹ لاگ کمپنی نجی شراکت (جوائنٹ وینچر) کے تحت قائم کی جائے گی جس کے لیے پاکستان پوسٹ کی جانب سے 6کمپنیوں کو شارٹ لسٹ کیا گیا ہے۔ اس کمپنی کے قیام سے پاکستان پوسٹل سروسز کو 10سال کے دوران 12ارب روپے سے زائد کا اضافی ریونیو حاصل ہو گا۔ واضح رہے کہ پوسٹ لاگ لاجسٹک کمپنی کے ذریعے پاکستان کے دور دراز علاقے بھی مستفید ہو سکیں گے۔ مذکورہ کمپنی کے قیام کے لیے کام مکمل کرنے کے بعد ستمبر2017 اسٹیئرنگ کمیٹی میں منصوبہ عملدرآمد کے لیے پیش کیا جائے گا جس کے بعد کمپنی کا پائلٹ پروجیکٹ شروع کیا جائے گا۔ بعد ازاں اس کا دائرہ کار بڑھا دیاجائے گا۔