ایمزٹی وی (تعلیم) نئے تعلیمی سال کے آغاز پر سرکاری اسکولوں میں طلبہ کو مفت فراہم کی جانے والی درسی کتب ختم ہو گئیں جبکہ دکانداروں نے قیمتیں بڑھانے کیلئے مارکیٹ میں بھی مصنوعی قلت پیدا کردی۔
تفصِلات کے مطابق صوبائی حکومت کی پالیسی کے تحت محکمہ تعلیم راولپنڈی کی ہدایت پر ضلع بھر کے 1534پرائمری ، مڈل اسکولوں میں ہزاروں نئے بچوں کا مختلف کلاسوں میں داخلہ کیا گیا ۔ ان بچوں کو مفت درسی کتب کی فراہمی محکمہ تعلیم کے ذمہ ہے لیکن راولپنڈی میں نئے داخل ہونے والے بچوں اوران کے والدین کو اس وقت شدید پریشانی کا سامنا کرنا پڑا جب اسکولوں کی انتظامیہ نے انہیں بتایاکہ مطلوبہ تعداد میں درسی کتب نہ ہونے کے باعث بچوں کو درسی کتب بازار سے خود خریدنی ہوں گی جس پر والدین میں تشویش کی لہر دوڑ گئی ،والدین کا کہنا ہے کہ حکومت نے بچوں کو زبردستی داخل کیالیکن اب درسی کتب نہیں دی جارہی ہیں ،والدین نے وزیر اعلیٰ پنجاب سے نوٹس لینے کی اپیل کی ہے ،اس حوالے سے ای ڈی اوایجوکیشن قاضی ظہورالحق نےمیڈیا سے گفتگو کرتے ہوئے بتایاکہ جن اسکولوں کوکتابیں نہیں ملیں انہیں مطلوبہ تعداد کے مطابق کتابیں جلدفراہم کریں گے۔