ایمزٹی وی(انٹرنیشنل) برطانیہ میں موبائل فون پر عربی الفاظ دیکھنے پر تین مسلمان بہن بھائیوں کو داعش سے تعلق کا الزام لگا کر جہاز سے اتار دیا گیا ۔ برطانوی بہن بھائی چوبیس سالہ سکینہ ، انیس سالہ مریم اور اکیس سالہ علی لندن سے اٹلی جانے کے لیے جہاز پر سوار ہوئے ۔ موبائل فون پر عربی زبان دیکھ کر ساتھی مسافر نے انہیں مشکوک قرار دیتے ہوئے جہاز کے عملے کو اطلاع دی ، عملے نے تینوں بہن بھائیوں کو داعش سے تعلق کا الزام لگا کر جہاز سے اتار دیا ۔ خبر ایجنسی کے مطابق ائیر پورٹ پر تینوں سے ایک گھنٹہ تک تفتیش کی گئی ۔ بہن نے خبر ایجنسی کو بتایا کہ وہ عربی زبان بولنا بھی نہیں جانتے ، موبائل میں قرآن پاک کی ایپ تھی جس پر انہیں جہاز سے اتارا گیا ۔ ایک گھنٹے کی تفتیش اور موبائل فون چیک کرنے کے بعد سیکورٹی اہلکاروں نے بہن بھائیوں کو جہاز میں جانے کی اجازت دے دی۔