ایمزٹی وی (تعلیم/اسلام آباد)یونیورسٹی آف انجینئر نگ اینڈ ٹیکنالوجی ٹیکسلا کے 16 ویں کانووکیشن سے خطاب کرتے ہوئے گورنر پنجاب ملک محمد رفیق رجوانہ نے کہاہے کہ حکومت ملک میں انجینئر نگ ،سائنس و ٹیکنالوجی کی تعلیم پر خصوصی تو جہ دے رہی ہے ، طلبہ ترقی کی دوڑ میں آگے نکلنے کیلئے محنت سے تعلیم حاصل کریں ۔ کانووکیشن میں وا ئس چانسلر پروفیسر ڈاکٹر نیاز احمد اختر،چیئرمین ہیوی مکینیکل ٹیکسلا لیفٹیننٹ جنرل سید واجد حسین ، چیئرمین پنجاب ایجوکیشن فائونڈیشن انجینئر قمر الاسلام ، چیئرمین ہائر ایجوکیشن کمیشن پنجاب ڈاکٹر نظام الدین و دیگر نے شرکت کی ۔
گورنر پنجاب اور یونیورسٹی آف انجینئر نگ اینڈ ٹیکنالوجی ٹیکسلا کے چانسلر نے مزید کہا کہ ٹیکسلا یونیورسٹی اہم صنعتی اداروں میں گھری ہے اور اس ادارے کے طلباء و طالبا ت اپنی تعلیمی قابلیت کا فائدہ اٹھا کر ان اداروں میں خدمات انجام دینے کے مواقع حاصل کر سکتے ہیں۔ گورنر پنجاب نے ڈگریاں اور اعزازات حاصل کرنے والے طلباء و طالبات سے کہاکہ وہ جوش و جذبے اور محنت کے ساتھ کام کرکے ملک و قوم کا نام روشن کریں ۔
وا ئس چانسلر پروفیسر ڈاکٹر نیاز احمد اختر نے بتایا کہ کانووکیشن میں14 شعبوں میں 783 بیچلرز ،گیارہ شعبوں میں 160 ماسٹر ز اور تین پی ایچ ڈی ڈگریاں دی گئیں اس کے علاوہ پانچ چانسلرز گولڈ میڈل، 12 یو ای ٹی گولڈ میڈل اور دیگر ایوارڈ زتقسیم کئے گئے ہیں۔