ایمزٹی وی(تعلیم/پنجاب)سرکاری تعلیمی اداروں کے اساتذہ میں گلے ،سانس کی بیماریوں اور بینائی متاثرہونے کی شکایات میں اضافے پر حکومت پنجاب نے راولپنڈی کے تمام تعلیمی اداروں میں بلیک بورڈاور چاک کے استعمال پر پابندی عائد کردی، تعلیمی اداروں میں وائٹ بورڈ لازمی قرار دیدیا گیا۔
ذرائع سے معلوم ہواہے کہ صوبہ بھر میں سرکاری اسکولوں میں مسلسل بلیک بورڈ پر چاک کے استعمال سے اساتذہ نے گلے ، سانس کی بیماری اور بینائی متاثر ہونے کی شکایات کیں جس پر حکومت نے بلیک بورڈاور چاک کے استعمال پر پابندی لگادی۔
ضلعی محکمہ تعلیم کو ہدایت دی گئی ہے کہ پرائمری ،مڈل ،ہائی اورہائیر سیکنڈری اسکولوں میں وائٹ بورڈ کے استعمال کویقینی بنائیں، پابندی کے اقدام کو اسکول ہیڈز ، اساتذہ نے سراہا اورکہاکہ اس سے اساتذہ بہت سی بیماریوں سے محفوظ رہیں گے ،محکمہ تعلیم کے ترجمان کے مطابق احکامات ملنے پر تعلیمی اداروں کو ہدایات دیں گے کہ وہ ایس او پی کے مطابق بلیک بورڈ اورچاک کا استعمال ترک کرکے وائٹ بورڈ کے استعمال کو یقینی بنائیں۔