ایمزٹی وی(انٹرنیشنل) سعودی حکام نے دعویٰ کیا ہے کہ فورسز نے فٹ بال ورلڈ کپ کوالیفائر راؤنڈ کیلئے کھیلے جارہے ایک میچ میں بم دھماکے کی منصوبہ بندی کرنے والے 8 مبینہ دہشت گردوں کو گرفتار کرلیا ہے۔ سعودی وزارت داخلہ نے ایک جاری بیان میں کہا کہ داعش کے دو سیل حملوں کی منصوبہ بندی کررہے تھے اور ہر سیل میں 4 افراد شامل ہیں، جنھیں گرفتار کرلیا گیا۔

وزارت داخلہ کا کہنا تھا کہ دہشت گردوں کے ایک سیل نے 11 اکتوبر کو جدا کے الجواراہ اسٹیڈیم میں ہونے والے سعودی عرب اور متحدہ عرب امارات کے درمیان فٹ بال میچ کے دوران بم دھماکا کرنے کی منصوبہ بندی کر رکھی تھی۔گرفتار ہونے والے مذکورہ سیل میں 2 پاکستانی، ایک سوڈانی اور ایک شامی شہری شامل ہے۔تاہم وزارت داخلہ نے مذکورہ سیل کی گرفتاری کے حوالے سے مزید تفصیلات فراہم نہیں کیں۔

وزارت داخلہ کے جاری بیان میں مزید کہا گیا کہ گرفتار کیے جانے والے دوسرے سیل کے دہشت گردوں نے سیکیورٹی فورسز پر حملوں کی منصوبہ بندی کررکھی تھی اور انھیں شام میں موجود داعش کے رہنما کی جانب سے ہدایات دی جارہی تھیں۔

بیان میں کہا گیا کہ مذکورہ سیل کے تمام افراد کا تعلق سعودی عرب سے ہے اور انھیں ریاض کے شمال مغربی علاقے سے گرفتار کیا گیا، بیان میں دعویٰ کیا گیا کہ گرفتار کیے جانے والے تمام افراد نے اعتراف جرم کرلیا ہے۔