ایمزٹی وی(اسلام آباد)وزیر اعظم میاں محمدنواز شریف کے امریکا میں موجود اثاثے منجمد کرنے کے لئے پاکستان انسٹیٹیوٹ آف ہیومن رائٹس کی جانب سے امریکی اٹارنی جنرل کو خط لکھ دیا گیا۔
ذرائع کے مطابق پاکستان انسٹیٹیوٹ آف ہیومن رائٹس کے سربراہ بیرسٹر سید محمد جاوید اقبال جعفری نے امریکی اٹارنی جنرل کو خط لکھ دیا ہے۔ خط میں الزام عائد کیاگیا ہے کہ میاں محمد نواز شریف نے غیر قانونی طور پر منی لانڈرنگ کے ذریعے اربوں ڈالر پاکستان سے امریکا منتقل کئے۔
سید محمد جاوید اقبال جعفری کے خط کے متن میں کہا گیا ہے کہ میاں محمد نواز شریف نے منی لانڈرنگ سے منتقل کی جانے والے رقم سے امریکا میں غیر قانونی اثاثے بنائے جبکہ امریکی قوانین کے تحت منی لانڈرنگ کرنے والے کسی بھی شخص کے خلاف امریکی حکومت کاروائی کا اختیار رکھتی ہے اس لئے میاں محمدنواز شریف کے امریکا میں موجود اثاثوں کو فریز کر کے تحقیقات کی جائیں۔
یاد رہے کہ پاکستان میں بھی سپریم کورٹ نے پاناما لیکس میں وزیراعظم کے بچوں کے نام سامنے آنے پر کیس کی تحقیقات کا آغاز کر رکھا ہے۔