ایمز ڑی وی(لاہور) مشرف حملہ کیس کے مجرم عدنان خان کو سزا مکمل ہونے پر رہا کر دیاگیا، لاہور ہائی کورٹ میں محکمہ جیل کے اس بیان کی روشنی میں توہین عدالت کی درخواست نمٹا دی گئی جس پر عدنان خان کی ماں سارہ خان نے کمرہ عدالت میں رونا شروع کردیاکہ بیٹے کو اس کے حوالے نہیں کیا گیا.
جسٹس شاہد حمید ڈار نے مجرم عدنان خان کی والدہ سائرہ خان کی مجاہد وسیم ایڈووکیٹ کی وساطت سے دائر توہین عدالت کی درخواست پر سماعت کی، ہائی سیکیورٹی جیل ساہیوال کی جانب سے عدالت کو بتایا گیا کہ ملزم عدنان کو چار فروری کو سزا مکمل ہونے پر رہا کر دیا گیا تھا لہذا توہین عدالت کی درخواست نمٹائی جائے، درخواست گزار خاتون بیٹے کی حوالگی کے بغیر ہی درخواست نمٹانے پر کمرہ عدالت میں زار و قطار رو پڑی، خاتون نے موقف اختیار کیا کہ اس کا بیٹا ابھی تک اس سے نہیں ملا، جیل حکام جھوٹ بول رہے ہیں، انھوں نے اس کے بیٹے کی رہائی سے قبل اطلاع بھی نہیں دی حالانکہ جیل رولز کے تحت ورثاءکو اطلاع دینا ضروری ہے، درخواست میں موقف اختیار کیا گیا تھا کہ 2003ءمیں ٹرائل کورٹ نے عدنان خان کو سابق آرمی چیف پرویز مشرف پر حملہ کرنے کے الزام میں پندرہ سال قید کی سزا سنائی تھی، عدنان خان قانون کے مطابق سزا میں رعایتیں ملنے کے بعد اپنی سزا مکمل کر چکا ہے لیکن اسے رہا نہیں کیا جا رہا ہے، عدالت نے جیل حکام کے بیان کی روشنی میں درخواست نمٹا دی