ایمز ٹی وی(لاہور) پاکستان ریلویز نے ملک بھر میں ٹرینوں کے کرایوں میں 5 سے 10 فیصد تک اضافہ کردیا جس کا اطلاق 15 مارچ 2017 سے ہو گا، راولپنڈی تا لاہور کے کرایوں میں 21 فیصد کمی کر دی گئی۔ پاکستان ریلویز کی جانب سے جاری کردہ نوٹیفکیشن کے مطابق قراقرم ایکسپریس اکانومی کلاس لاہور تا کراچی کرایہ 1500 سے 1650 روپے کر دیا گیا جبکہ اے سی بزنس کا کرایہ 4500 سے 4950 روپے کر دیا گیا۔کراچی اینڈ بزنس ایکسپریس اکانومی کلاس کا لاہور تا کراچی کرایہ 1340 سے 1470 ہو گیا ہے۔
اے سی سٹینڈرڈ کا کرایہ 2810 سے 3100 کر دیا گیا۔ تیز گام راولپنڈی تا کراچی اکانومی کلاس کا کرایہ 1230 سے 1340 روپے جبکہ اے سی سٹینڈرڈ کا کرایہ 3200 سے بڑھ کر 3520 ہو گیا۔ سکھر ایکسپریس اے سی سٹینڈرڈ کا کراچی تا سکھر کا کرایہ 1060 سے 1170 روپے ہو گیا۔ اے سی بزنس کا کرایہ 1380 سے 1520 کر دیا گیا۔ پاکستان ایکسپریس اکانومی کلاس راولپنڈی تا کراچی کا کرایہ 1180 سے 1300 کر دیا گیا۔ پاکستان ایکسپریس کے کرایوں میں کیے جانے والے 10 فیصد اضافے کا اطلاق 25 اپریل سے ہو گا۔ گرین لائن اے سی بزنس کلاس کے اسلام آباد تا کراچی اور لاہور تا کراچی کرائے میں 8.6 فیصد اضافہ کیا گیا تاہم راولپنڈی تا لاہور کے کرایوں میں 21 فیصد کمی کر دی گئی۔
وفاقی وزیر ریلویز خواجہ سعد رفیق نے پاکستان ریلویز کے ہزاروں کلرکس کی اپ گریڈیشن کی منظوری دے دی۔ لوئر ڈویژن کلرک ساتویں گریڈ سے نویں، اپر ڈویژن کلرک نویں گریڈ سے گیارہوں اور ہیڈ کلرک 14 ہویں گریڈ سے 16 ہویں گریڈ میں چلے گئے۔ اپ گریڈیشن کی خبر ملتے ہی ہزاروں ریلوے ملازمین میں خوشی کی لہر دوڑ گئی اور مٹھائیاں تقسیم کی گئیں۔ ملازمین نے ریلوے ہیڈ کوارٹرز میں وزیر ریلویز خواجہ سعد رفیق، چیئرپرسن ریلویز، سی ای او اور دیگر اعلیٰ افسران کے بینرز لگا دئیے