ایمزٹی وی(اسلام آباد)چیئرمین قومی احتساب بیورو جسٹس (ر) جاوید اقبال نے عوام کی بدعنوانی سے متعلق شکایات سننے کیلئے خود متحرک ہونے کا فیصلہ کر لیا اور ہر ماہ خود عوامی شکایات سنیں گے، جبکہ اُن کا کہنا ہے کہ احتساب قانون کے مطابق ہوتا ہوا نظر آئے گا،کسی دبائو اور سفارش کو برداشت نہیں کیاجائے گا۔
چیئرمین نیب جسٹس (ر) جاوید اقبال نے فیصلہ کیا ہے کہ وہ ہر ماہ کی آخری جمعرات کو دوپہر 2 بجے سے لے کر 4 بجے تک عوام کی بدعنوانی سے متعلق شکایات خود نیب ہیڈ کوارٹر اسلام آباد میں سنیں گے۔ انہوں نے تمام شکایت کنند گان سے کہا ہے کہ وہ اپنی مکمل درخواستیں ٹھوس ثبوتوں اور اپنے قومی شناختی کارڈ کے ساتھ لائیں۔ چیئرمین نیب نے اپنے پختہ عزم کا اظہار کرتے ہوئے کہا ہے کہ وہ احتساب کے اصول پر سختی سے عمل درآمد کرائیں گے۔