ایمز ٹی وی (پشاور) پشاور یونیورسٹی کے سالانہ کانوکیشن کی تقریب کے دوران مہمان خصوصی گورنر خیبر پختونخوا سردار مہتاب خان عباسی سے خیبرایجنسی سے تعلق رکھنے والے طالبعلم اسفندیار نے گولڈ میڈل وصول کرنے سے انکار کرتے ہوئے وائس چانسلر سے استدعا کی کہ وہ انہیں گولڈ میڈل سے نوازیں، وائس چانسلر کے انکار پر اسفندیار نے تمغہ وصول کرنے سے ہی انکار کردیا اور ’’گو نواز گو‘‘ کے نعرے لگائے۔ خیال رہے کہ سردار مہتاب خان عباسی وزیر اعظم نواز شریف کے انتہائی قریب ساتھی ہیں اور وہ ماضی میں مسلم لیگ (ن) کی جانب سے خیبر پختونخوا کے وزیر اعلیٰ بھی رہ چکے ہیں۔
ایمز ٹی وی (کوئٹہ) جماعت اسلامی کے مرکزی امیرسراج الحق نےکہا ہے کہ گر ایک طرف سمندر کی طرف سے طوفان نیلوفرکا خطرہ ہے تو دوسری طرف کراچی اور سندھ میں سیاسی نیلوفرکابھی خطرہ ہے،ان حالات میں ہماری کوشش ہے کہ کوئی اورہنگامہ کھڑا نہ ہو۔ سراج الحق کا یہ بھی کہنا تھا کہ دھرنوں سے پہلے بھی ملک کی معیشت کی صورتحال اچھی نہ تھی، دھرنوں کے بعد بھی یہی صورتحال ہے جس کی وجہ ملک کی معاشی پالیسی کی ناکامی ہے۔ان کا یہ بھی کہنا تھا کہ ہماراپہلے بھی یہی مؤقف تھا کہ تحریک انصاف کےاراکین کے استعفے منظور نہیں کئےجانے چاہئیں، اس سلسلےمیں انہوں نےاسپیکر قومی اسمبلی سےذاتی طور پر اور سیاسی جرگے کے ذریعےبھی اپیل کی کہ تحریک انصاف کے استعفے منظورنہ کئےجائیں کہ اگر استعفے منظور کئے گئے تو سیاسی بحران میں مزید اضافہ ہوگااورجذبات میں تیزی آئے گی جس سے اشتعال بڑھے گا، جس کی وجہ سے قبل ازوقت یا مڈٹرم الیکشن کےلئے ماحول بنےگا اورمیں نہیں چاہتا تھا کہ اس کی وجہ سے ہمارے مسائل میں مزید اضافہ ہوجائے، اس صورتحال سے وزیروں، سیاستدانوں اور دوسرے بڑوں کا توکچھ نہیں بگڑے گا، عوام کا ہی نقصان ہوگا۔
ایمز ٹی وی (پشاور) ذرائع کے مطابق پاکستان کے قبائلی علاقے جنوبی وزیرستان میں ایک مکان پرامریکی جاسوس طیارے سے دو میزائل داغے گئے جس سے وہاں موجود چار شدت پسند ہلاک ہو گئے۔ مقامی ذرائع کے مطابق مرنے والوں میں دو غیر ملکی اور دو مقامی افراد بتائے جاتے ہیں۔ حکام کے مطابق جس مکان کو نشانہ بنایا گیا اسے عسکریت پسند اپنے مرکز کے طور پر استعمال کررہے تھے۔ رواں سال جنوبی اور شمالی وزیرستان میں امریکی ڈرون طیاروں کی طرف سے عسکریت پسندوں کے ٹھکانوں اور گاڑیوں پر کل 15 حملے کیے گئے ہیں جس میں سے دو حملے جنوبی وزیرستان، جبکہ 13 شمالی وزیرستان میں کیے گئے ہیں۔ ان حملوں میں درجنوں شدت پسند مارے جا چکے ہیں۔ واضح رہے کہ شمالی وزیرستان میں رواں برس 15 جون سے جاری پاک فوج کے آپریشن ضرب عضب کے نتیجے میں بیشتر شدت پسند پاک افغان سرحدی علاقوں کی جانب منتقل ہوگئے ہیں۔
ایمز ٹی وی (کراچی) بحیرہ عرب میں تیز ہواؤں کے باعث بننے والے سمندری طوفان نیلوفر کی شدت میں کمی واقع ہونا شروع ہوگئی جس کے بعد وہ پاکستان کے ساحل سے نہیں ٹکرائے گا۔ چیف میٹرولوجسٹ توصیف عالم کا کہنا تھا کہ سمندری طوفان آج شام یا رات کو ساحلی علاقوں کے قریب سے گزر جائے گا تاہم طوفان کراچی سے جنوب مغرب میں 650 کلو میٹر دوری پر ہے اور پاکستان اور بھارت کی سمندری حدود کا رخ کر رہا ہے۔ دوسری جانب سمندری طوفان ’نیلوفر‘کے پیش نظرملکی و غیرملکی ایئرلائنز کو الرٹ جاری کردیاگیاہے اور نوابشاہ ایئرپورٹ سے چھوٹے طیاروں کی محفوظ مقام پر منتقلی ،کراچی ایئرپورٹ پر آپریشن معطل کرنے کے احکامات جاری کردیئے ہیں جبکہ پرائیویٹ سکول ایسوسی ایشن نے 31اکتوبرکو سکول بند رکھنے کااعلان کردیا۔ سندھ بھر میں نیلوفر کے سلسلے میں جمعہ کو تمام پرائیویٹ اسکول بند رکھنے کااعلان کردیاگیاجبکہ تین اور چار نومبر کو عاشورہ کی چھٹی ہوگی اور یوں تمام پرائیویٹ سکول اکتیس اکتوبر سے چار نومبر تک بند رہیں گے جبکہ ہفتہ اور اتوارچھٹی ہوتی ہے۔ سول ایوی ایشن ذرائع کے مطابق نوٹس کے متن میں کہاگیاکہ ہواکی رفتار پچیس ناٹیکل مائیل سے زیادہ ہوتوکسی قسم کی لینڈنگ کی اجازت نہ دی جائے اور کراچی کی پروازوں کا رخ لاہور، اسلام آباد اور نوابشاہ کی طرف موڑاجاسکتاہے ، جناح انٹرنیشنل ایئرپورٹ پر گراﺅنڈہینڈلنگ کے احکامات جاری کرتے ہوئے آپریشن معطل کرنے کی ہدایت کردی گئی ہے ۔ یہ الرٹ کراچی ، نوابشاہ ، لاہور اوراسلام آباد ایئرپورٹ پر بھجوائے گئے ہیں ۔
ایمز ٹی وی (اسلام آباد) پاکستان سپریم کورٹ نے قائد حزب اختلاف سید خورشید شاہ کی طرف سے چیف الیکشن کمشنر کی تعیناتی میں مزید تین ماہ کی مہلت سے متعلق دائر درخواست مسترد کر تے ہوئے کہا ہے کہ اس آئینی عہدے پر 13 نومبر تک تعیناتی عمل میں لائی جائے اور اس معاملے میں اب مزید تاخیر برداشت نہیں کی جائے گی۔ چیف جسٹس ناصر الملک کی سربراہی میں سپریم کورٹ کے تین رکنی بینچ نے جمعرات کو انتخابی اصلاحات سے متعلق درخواستوں کی سماعت کی۔ عدالت کا کہنا تھا کہ ملک میں رائج قوانین کے تحت ہی چیف الیکشن کمشنر کا تقرر کیا جائے جبکہ ایک سال سے چیف الیکشن کمشنر کا عہدہ خالی ہونے کی وجہ سے الیکشن کمشن کے امور میں دشواریاں پیش آرہی ہیں۔ چیف جسٹس ناصر الملک کا اس موقعہ پر کہنا تھا کہ سپریم کورٹ کا ایک جج اس آئینی عہدے پر اضافی ذمہ داریاں ادا کر رہا ہے جس کی وجہ سے عدالتی امور متاثر ہو رہے ہیں۔ خیال رہے کہ جسٹس ریٹائرڈ فخرالدین جی ابراہیم کے چیف الیکشن کمشنر کے عہدے سے مستعفی ہونے کے بعد موجودہ چیف جسٹس ناصر الملک سمیت متعدد سپریم کورٹ کے ججز اس عہدے پر اپنی ذمہ دایاں ادا کرتے رہے ہیں جبکہ اس وقت سپریم کورٹ کے جج جسٹس انور ظہیر جمالی بطور قائم مقام چیف الیکشن کمشنر کے طور پر اپنی ذمہ داریاں ادا کر رہے ہیں۔
ایمز ٹی وی (اسلام آباد) اسپیکرسردارایازصادق کی زیرصدارت قومی اسمبلی کا اجلاس شرو ع ہواتو جمشید دستی نے بولنے کی اجازت مانگی لیکن اجازت نہ ملنے پر وہ اسپیکرکی ڈائس کے سامنے بیٹھ گئے ۔ جمشید دستی کاکہناتھاکہ گذشتہ روز ملازمین پر تشدد ہواجس دوران جمشید دستی سمیت 50ملازمین زخمی ہوئے لیکن ایوان میں مسلسل بولنے کی اجازت نہیں دی جارہی ، تشدد کی تحقیقات کے لیے کمیٹی قائم کی جائے اور ذمہ داران کا تعین کرکے سزادی جائے۔اوجی ڈی سی ایل ملازمین پر پولیس تشدد کے خلاف پیپلزپارٹی نے علامتی واک آﺅٹ کیا اوراپنا احتجاج ریکارڈکراتے ہوئے خورشید شاہ نے کہاکہ پیپلزپارٹی مزدوروں کی جماعت ہے، اُن کے حقوق کا تحفظ یقینی بنائیں گےوزیرداخلہ چوہدری نثارعلی خان نے ایوان کوبتایاکہ پولیس نے ضرورت سے زیادہ انتظامی پھرتی دکھائی، جورویہ اپنایاگیااس پرالگ سے کمیٹی قائم کریں گے، انتظامی فیصلوں کے خلاف احتجاج مزدوروں کا حق ہے ۔اُن کاکہناتھاکہ حکومت مزدوروں کے حقوق کاتحفظ کرے گی اور بیان دے کر ایوان سے چلے گئے۔ وزیرداخلہ کے رویہ پر پیپلزپارٹی نے اجلاس کے بائیکاٹ کا اعلان کردیااورایوان سے تمام اراکین چلے گئے ۔ بعدازاں قومی اسمبلی کا اجلاس جمعہ کی صبح ساڑھے دس بجے تک ملتوی کردیاگیا۔
ایمز ٹی وی (کوئٹہ) ایف سی نے بلوچستان میں محرم الحرام کے موقع پر دہشت گردی کا بڑا منصوبہ ناکام بنا دیا ہے،تفصیلات کے مطابق ضلع قلعہ عبداللہ کے علاقے گلستان میں ایف سی نے خفیہ اطلاع پر ایک مکان پر چھاپہ مارکر وہاں سے 4 ہزار کلو گرام بارود ، 18خودکش جیکٹس، 107 ایم ایم کے،101 میزائل ، 122 ایم ایم 2 میزائل ،107 راکٹ لانچر کے گولے، لاکھوں کارتوس ، ہزاروں مختلف اقسام کے ڈیٹونیٹر، دستی بم اور تخریب کاری میں استعمال ہونے والے دوسرے آلات برآمد کئے ہیں۔ دوسری جانب ایف سی نے ضلع پشین کے علاقے یارو میں ایک گاڑی سے بھاری مقدار میں اسلحہ و گولہ بارود قبضہ میں لیا جبکہ مستونگ کے علاقے کانک سے بھی اسلحہ پکڑا گیا ہے۔ تخریب کاری کا منصوبہ بنانے کے حوالے سے صوبائی وزیر داخلہ سرفراز بگٹی نے میڈیا کو بریفنگ دیتے ہوئے کہا کہ ایف سی نے کامیاب کارروائی کر کے بلوچستان کو بڑی تباہی سے بچا لیا ہے ، صوبے میں ہونے والی دہشت گردی میں بیرونی ہاتھ ملوث ہے ۔
ایمزٹی وی:(کراچی) پاکستان رینجرزسندھ کے ترجمان میجرسبطین کی جانب سے جاری ہونے والے اعلامیے کے مطابق ڈائریکٹر جنرل رینجرز سندھ میجر جنرل بلال اکبر کی صدارت میں رینجرز ہیڈکوارٹر میں محرم الحرام کی سیکیورٹی کے حوالے سے ایک اجلاس منعقد ہوا۔
جس میں ڈی جی رینجرز نے محرم الحرام کے دوران رینجرز کے جوانوں کو دہشت گرد عناصر کو دیکھتے ہی گولی مارنے کا حکم دیا جبکہ اجلاس کے دوران انھوں نے محرم الحرام میں مجالس اور جلوسوں کی حفاظت پر مامور جوانوں کو ہدایت کی ہے کہ وہ ڈیوٹی کے دوران انتہائی چوکس رہیں اور شرپسند عناصر پر کڑی نگاہ رکھیں اور کسی بھی غیر معمولی صورتحال کو قبل از وقت ناکام بنانے کے لیے تمام وسائل بروئے کار لاتے ہوئے امن و امان کو برقرار رکھیں ، اجلاس کے دوران ڈی جی رینجرز سندھ محرم الحرام کے دوران اپنائے جانے والے سیکیورٹی کے اقدامات کا بھی جائزہ لیا۔
ایمز ٹی وی:(کراچی) فیڈرل بی انڈسٹریل ایریا میں واقع گارمنٹس فیکٹری میں علی الصبح لگنے والی آگ پر تاحال قابو نہیں پایا جا سکا ہے۔ گارمنٹس فیکڑی میں لگنے والی آگ پر قابو پانے کے لئے ابتدائی طور پر فائر بریگیڈ کی 6 گاڑیاں موقع پر پہنچیں تاہم آگ نے دیکھتے ہی دیکھتے شدت اختیار کر لی اور فائر بریگیڈ کے عملے نے آگ کی شدت کو تیسرے درجے کی قرار دے کر شہر بھر سے فائر ٹینڈرز طلب کر لئے۔ گارمنٹس فیکٹری میں لگنے والی آگ پر قابو پانے کے لئے اس وقت فائر بریگیڈ کی 20 سے زائد گاڑیاں اور اسنار کل مصروف ہیں۔
چیف فائرآفیسراحتشام الدین کا کہنا تھا کہ آگ میں شدت کی وجہ سے 2 مقامات سے آگ کو کنڑول کرنے کی کوشش کی جا رہی ہے، انڈسٹریل ایریا میں واقع دیگر فیکڑیوں کو بھی آگ سے بچانے کی کوشش کی جا رہی ہے جب کہ آگ پر قابو پانے کے لئے مزید 5 گھنٹے لگ سکتے ہیں۔ ابتدائی طور پر تو آگ کی وجہ شارٹ سرکٹ معلوم ہوتی ہے تاہم مکمل تحقیقات کے بعد ہی حتمی بیان جاری کیا جا سکتا ہے۔