ایمز ٹی وی (انٹرٹینمنٹ) معروف گلوکار عدنان سمیع نے کہا کہ اگر بھارت میں عدم برداشت ہوتا تو وہ کبھی بھی شہریت کے حصول کی درخواست نہ کرتے۔ گلو کار عدنان سمیع شہریت کے حصول کے لیے بھارت کے گن گانے لگے ہیں جس کے لیے انہوں نے بھارت کو برداشت والا ملک قرار دے دیا ہے جب کہ ان کا کہنا تھا کہ اگر ملک میں عدم برداشت کا مسئلہ ہوتا تو وہ ہندوستان کی شہریت نہیں لیتے۔ میرے خیال میں عمل الفاظ سے زیادہ بولتے ہیں۔

شیو سینا کی جانب سے پاکستانی گلوکار استاد غلام علی کا کنسرٹ منسوخ کرانے کے سوال پر عدنان سمیع کا کہنا تھا کہ ہر کسی کو پرفارم کرنے کی آزادی ہونی چاہیئے کیونکہ میوزک کا کوئی رنگ، مذہب یا ملک نہیں ہوتا، اگر مجھے کوئی میوزک پسند ہے تو پھر زبان بھی کوئی معنی نہیں رکھتی۔

واضح رہے کہ عدنان سمیع 2001 سے بھارت میں سکونت اختیار کئے ہوئے ہیں۔ ان کا بھارت کا ویزا رواں برس اگست میں ختم ہو گیا تھا جس کے بعد انہوں نے انسانی ہمدردی کی بنیاد پر بھارت میں رہنے کی درخواست کی تھی۔ انہوں نے پاکستانی شہریت کی منسوخی کے لئے بھی درخواست دے رکھی ہے۔

ایمز ٹی وی (ااسپورٹس) باہمی کرکٹ سیریز کے حوالے سے بھارتی ٹال مٹول وسیم اکرم کو بھی کھٹکنے لگی، سابق کپتان کا کہنا ہے کہ نہیں کھیلنا تو صاف صاف بتا دیا جائے،خاموشی اختیار کرنا درست نہیں، کرکٹ نہ کھیلنے سے دہشت گردی ختم نہیں ہوجائے گی۔

تفصیلات کے مطابق مقامی ہوٹل میں تقریب کے دوران میڈیاسے بات چیت کرتے ہوئے وسیم اکرم نے کہا کہ بھارت کرکٹ سیریز کے حوالے سے اپنے فیصلہ سے آگاہ کردے، اسے ہاں یا ناں میں جواب دے دینا چاہیے، خاموشی درست نہیں، معاملہ ادھر ہی ختم ہوجائے تو بہتر ہے، انھوں نے کہا کہ سیریز کے عدم انعقاد پر بھارت میں شیڈول ورلڈ ٹی ٹوئنٹی میں شرکت نہ کرنے کا فیصلہ پاکستانی مفاد میں نہیں ہوگا۔

بھارت کے نہ کھیلنے سے دنیا ختم نہیں ہوجاتی، وہ نہیں کھیلنا چاہتا تو ہمیں بھی کوئی فرق نہیں پڑتا۔ آئی سی سی ایونٹ کا بائیکاٹ نہیں کیا جاسکتا، ہمیں کھیلنا ہی پڑے گا، میگا ایونٹ کی تیاری سے متعلق سوال پر انھوں نے کہا کہ اب تجربات کا وقت نہیں، ہمیں اپنے کھلاڑیوں کو چیلنج کیلیے تیار کرنا ہوگا، میگا ایونٹ سے قبل ایشیا کپ اور بعدازاں نیوزی لینڈ کے خلاف سیریز ہوگی ،ان کے لیے ہمیں تیاری کی ضرورت ہے۔

ایمزٹی وی(آسلام آباد)حکومت چین نے چائنا پاکستان اقتصادی راہداری منصوبے کو گلگت بلتستان کی متنازع حیثیت ختم کر کے اسے پاکستان کا آئینی صوبہ تسلیم کرنے سے مشروط کرنے کا انکشاف ہوا ہے۔ذرائع نے بتایا کہ حکومت چین نے پاکستان کی وفاقی حکومت پر واضح کردیا ہے کہ چائنا پاکستان اقتصادی راہداری منصوبہ اس وقت تک مکمل نہیں ہو سکے گا جب تک گلگت بلتستان کی متنازع حیثیت کو ختم کرتے ہوئے اس خطے کو پاکستان کا باقاعدہ آئینی صوبہ نہیں بنایا جاتا۔ حکومت چین نے مزید کہا ہے کہ وہ کسی بھی صورت پاک چائنا اقتصادی راہداری منصوبے کو کسی متنازع خطے سے گزارنا نہیں چاہتا۔حکومت چین نے واضح کیا ہے کہ چائنا پاکستان اقتصادی راہداری منصوبہ 2 حکومتوں کے درمیاں معاہدہ ہے جبکہ گلگت بلتستان کے حوالے سے حکومت پاکستان کی رائے یہ ہے کہ یہ پاکستان کا حصہ نہیں بلکہ متنازع علاقہ ہے، ایسے میں چائنا کی حکومت کھربوں مالیت کے اس بین الاقوامی اہمیت کے منصوبے کو کسی متنازع خطے سے گزارنے کیلئے تیار نہیں، ذرائع نے بتایا کہ حکومت چین نے واضح طور پر کہا ہے کہ گلگت بلتستان کی متنازع حیثیت کو ختم کیے بغیر اس منصوبے پر عالمی برداری خاص طور پر بھارت اعتراض اٹھا سکتاہے اورکام رک سکتا ہے.

ایمزٹی وی(اسلام آباد) وزیراعظم نواز شریف چین روانہ ہو گئے جہاں وہ شنگھائی تعاون تنظیم کے سربراہی اجلاس میں شرکت کریں گے۔ وزیر اعلیٰ پنجاب شہباز شریف بھی وزیراعظم کے ہمراہ ہیں جبکہ وفاقی وزیر احسن اقبال اور طارق فاطمی بھی وفد میں شامل ہیں۔ وزیرا عظم عالمی رہنماؤں سے ملاقاتیں بھی کریں گے اور ان سے علاقائی صورتحال پر تفصیلی تبادلہ خیال کریں گے جبکہ چینی اعلیٰ قیادت سے ملاقات میں اقتصادی راہداری منصوبے پر پیش رفت بھی زیر غور آئے گی۔ پاکستان کو شنگھائی تعاون تنظیم کی مستقل رکنیت ملنے کا امکان ہے۔

ایمزٹی وی(انٹرنیشنل)افریقی ریاست گیمبیا کے صدر یحییٰ جامح نے مسلم اکثریت ہونے کے ناطے اپنے ملک کو اسلامی جمہوریہ قرار دیتے ہوئے کہا ہے کہ اس اقدام سے ریاست کے نوآبادیاتی ماضی سے چھٹکارا مل جائے گاذرائع کے مطابق ریاستی ٹی وی سے بات کرتے ہوئے صدر یحیٰ جامع کا کہنا تھا کہ اس اعلان سے گیمبیا کی ’’مذہبی شناخت اور اقدار‘‘ کا اظہار ہوتا ہے۔ انھوں نے مزید کہا کہ اس اعلان کے باعث شہریوں پر کسی مخصوص لباس کی پابندی عائد نہیں کی جائے گی اور دیگر مذاہب کے لوگوں کو بھی مکمل آزادی حاصل ہوگی۔واضح رہے کہ گیمبیا میں 90 فیصد آبادی مسلمان ہے، ماضی میں برطانیہ کے نوآبادیاتی نظام کا حصہ رہنے والی اس ریاست کی معیشت کا زیادہ تر دارو مدار سیاحت پر ہے۔

ایمزٹی وی(اسلام آباد)پاکستان کی پہلی خاتون اقوام متحدہ کے ادارے برائے خواتین (یو این ویمن) کی خیر سگالی کی سفیر مقرر.ذرائع کے مطابق بطور خیر سگالی کی سفیر، منیبہ پاکستان میں خواتین اور لڑکیوں کو خود مختار بنانے اور یو این ویمن کی مہم 'Planet 50-50 by 2030: Step It Up for Gender Equality‘ کے علاوہ خواتین کی دیگر مہمات کے لیے کام کریں گی۔خیر سگالی کی سفیر مقرر کیے جانے کی تقریب سے خطاب کرتے ہوئے منیبہ کا کہنا تھا کہ وہ اقوام متحدہ کے ادارے برائے خواتین کی پوری طرح حمایت کرتی ہیں، اگر ہم صنفی امتیاز کے خلاف اسی طرح کام کرتے رہے تو یہ تفریق 2030 تک ختم کرنے میں کامیاب ہوجائیں گے۔ان کا کہنا تھا کہ اگر ہم پاکستان اور پوری دنیا سے صنفی امتیاز ختم کرنا چاہتے ہیں تو ہمیں مرد اور خواتین دونوں کو تعلیم دینے کی ضرورت ہے اور اس کے لیے ہمیں ساتھ مل کر کام کرنا ہوگا۔انہوں نے مزید کہا کہ یہ وہ وقت ہے کہ ہمیں خواتین اور بچیوں کو خود مختار بنانا چاہیے، کیونکہ ایک خاتون کو خود مختار بنانے کا مطلب پوری نسل کو خود مختار بنانا ہے۔کار حادثے میں اپنی دونوں ٹانگوں سے معذور ہونے والی منیبہ مزاری مصنفہ، گلوکارہ، سماجی کارکن اور مقرر ہیں، جو خواتین کے خلاف صنفی امتیاز کی روک تھام کے لئے سرگرم رہتی ہیں۔