ایمزٹی وی(تعلیم)اعلیٰ ثانوی تعلیمی بورڈ ملتان جنرل گروپ میں پہلی پوزیشن حاصل کرنے والا طالب علم وقاص رؤف اب اس دنیا میں نہیں رہا۔

تفصیلات کے مطابق وقاص نے انٹر آرٹس کے امتحانات میں 1013 نمبر حاصل کرکے لڑکوں میں پہلی پوزیشن حاصل کی،تاہم جب بورڈ حکام نے ان کے گھر پر رابطہ کیا تو ان کے والد نے افسوس ناک خبر سنائی کہ ان کا ہونہار بیٹا انتقال کرچکا ہے۔

وقاص کے والد عبدالرؤف کے مطابق رواں برس 11 جولائی کو ان کے بیٹے کو برین ہیمرج ہوا اور دماغ کی شریان پھٹنے کے باعث وہ دنیا سے کوچ کر گیا۔

وہاڑی سے تعلق رکھنے والے طالب علم وقاص کے والد بیٹے کی پوزیشن کا سن کر آبدیدہ ہوگئے اور انہوں نے اس کا انعام وصول کیا۔

اس موقع پر وقاص کے والدکا کہنا تھا کہ وہ اللہ کی رضا پر راضی ہیں اور انھیں اپنے بیٹے پر فخر ہے

ایمزٹی وی(اسلام آباد) عمران خان کی زیر صدارت اجلاس ہوا جس میں رائیونڈ مارچ کے تاریخ پر تبادلہ خیال کیا گیا ۔ اجلا س میں شاہ محمود قریشی ، جہانگیر ترین ، ڈاکٹر شرین مزاری سمیت دیگر اہم رہنما شامل تھے ۔

ذرائع کا کہنا ہے کہ اجلاس میں پارٹی رہنماﺅں کی جانب سے عمران خان کو تجویز پیش کی گئی ہے کہ رائیونڈ مارچ کی تاریخ میں توسیع کی جائے اور مارچ سے پہلے ملک بھر میں ریلیاں نکالی جائیں تاکہ عوام کو موبلائز کیا جا سکے اور دیگر جماعتوں سے بات چیت بھی مکمل ہو سکے۔اجلاس میں تجویز دی گئی ہے کہ رائیونڈ مارچ 30ستمبر کو اڈا پلا ٹ کے مقام پر کیا جائے جبکہ جاتی امراءکی جانب نہ جایا جائے ۔

ذرائع نے مزید بتایا کہ عمران خان نے تجاویز کو قبول کرتے ہوئے شاہ محمود قریشی کو رائیونڈ مارچ کے حوالے سے دیگر اپوزیشن جماعتوں سے بات کرنے کا ٹاسک دیدیا ہے ۔

ایمزٹی وی(مانیٹرنگ ڈیسک) فرانس میں ہونے والی ورلڈ اسکریبل چیمپیئن شپ پاکستان کے 3 بچوں نے اپنے نام کرلی ہے۔
ذرائع کے مطابق فرانس میں منعقدہ ورلڈ اسکریبل چیمپیئن شپ میں بھارت سمیت 12 ممالک سے تعلق رکھنے والے بچوں نے شرکت کی۔ پاکستان کے چوتھی جماعت کے طالب علم 9 سالہ مونس نے انڈر 10 اسکریبل چیمپیئن شپ میں پہلیپوزیشن حاصل کی۔ انڈر 12 میں عماد علی نے جبکہ انڈر 14 میں پاکستان کے ہشام عادل نے کامیابی حاصل کی۔

اسکریبل چیمپیئن شپ کے فاتح تینوں بچوں کا وطن واپسی کے موقع پر کہنا تھا کہ کامیابی کی خوشی کے ساتھ حکومت اور وزارت کھیل کی بے حسی کا بھی شکوہ ہے۔ ان کا کہنا تھا کہ اسکریبل گیم کسی طرح سے بھی آسان نہیں جس طرح پاکستان میں دیگر کھیلوں کو پذیرائی ملتی ہے اسی طرح دنیا میں ملک کا نام روشن کرنے والے بچوں کو بھی ملنی چاہئے تھی لیکن دنیا میں کامیابی کے جھنڈے گھاڑنے کے باوجود حکومت کی جانب سے حوصلہ افزائی نہ دیناحوصلہ شکن عمل ہے۔

ایمزٹی وی(اسلام آباد) پاکستان کو دنیا بھر میں سب سے زیادہ تیزی کے ساتھ اپنے جوہری ہتھیاروں کی تعداد بڑھانے والا ملک گردانا جا رہا ہے اور مغربی دفاعی ماہرین نے مواصلاتی سیاروں سے لی جانے والی تصاویر کے تجزئیے کے بعد یہ خیال پیش کیا ہے کہ غالباً پاکستان یورینیم افزود کرنے کیلئے ایک نیا مرکز تعمیر کرنے میں مصروف ہے جس کے بعد دنیا بھر میں ہلچل برپا ہو گئی ہے۔

غیر ملکی خبر رساں ادارے اے ایف پی نے مغربی دنیا کے ماہرین کے حوالے سے بتایا ہے کہ اسلام آباد سے تقریباً 30 کلومیٹر کے فاصلے پر کہوٹہ میں ایک نئے جوہری مرکز کی تعمیر اس امر کا تازہ ثبوت فراہم کرتی ہے کہ پاکستان اپنے ایٹمی ہتھیاروں کے ذخیرے میں اضافے کی کوششیں کر رہا ہے۔

ماہرین کے مطابق ایسی کوششیں اس 48 رکنی نیوکلیئر سپلائرز گروپ کے اصولوں کی صریحاً خلاف ورزی پر مبنی ہیں، جس میں شمولیت کا پاکستان متمنی ہے۔پاکستان کی جوہری تنصیبات کے حوالے سے یہ تازہ تفصیلات اس جائزے میں شامل ہیں، جسے آئی ایچ ایس جینز انٹیلی جنس ریویو نے ان سیٹلائٹ تصاویر کی مدد سے مرتب کیا ہے ، جو ایئر ڈیفنس اینڈ اسپیس نے پہلے 28ستمبر 2015ءاور پھر 18اپریل 2016ءکو اتاریں۔

رپورٹ کے مطابق نیا مرکز اندازاً 1.2 ہیکٹر رقبے پر مشتمل ہے اور خان ریسرچ لیبارٹریز (کے آر ایل ) کے محفوظ احاطے کے اندر جنوب مغربی حصے میں ہے۔ آئی ایچ ایس جینز کے افزودگی سے متعلق ایک تجزیہ کار کارل ڈیوی کے مطابق اس نئے مرکز پر حفاظت کے سخت انتظامات اور اس کے ڈھانچے کی چند اور خصوصیات سے یہی معلوم ہوتا ہے کہ یہ یورینیم کی افزودگی کا ہی نیا مرکز ہے۔بتایا گیا ہے اس نئے مرکز کا ڈھانچہ یورپ میں متعدد جوہری پلانٹس چلانے والی جوہری ایندھن کی کمپنی یورینکو کی تعمیر کردہ تنصیبات سے ملتا جلتا ہے۔

امریکی دارالحکومت واشنگٹن میں قائم دو اداروں کارنیگی انڈونمنٹ فار انٹرنیشنل پیس اور سٹِمسن سنٹر سے وابستہ محققین نے 2015ءمیں ایک رپورٹ تحریر کی تھی، جس میں کہا گیا تھا پاکستان اپنے ایٹمی ہتھیاروں کے ذخیرے میں ہر سال 20وار ہیڈز کا اضافہ کر سکتا ہے اور یوں ایک عشرے کے اندر اندر وہ دنیا کے ایٹمی ہتھیاروں کے تیسرے بڑے ذخیرے کا مالک بن سکتا ہے۔

ایمزٹی وی (اسلام آباد)اسلام آباد کی عدالت نے لال مسجد کیس میں مسلسل غیر حاضری پر سابق صدر پرویز مشرف کو اشتہاری قرار دیدیا ۔

ذرائع کے مطابق ایڈیشنل سیشن جج عبدالقادر میمن کی عدالت نے لال مسجد کیس میں ملزم پرویز مشرف کو اشتہاری قرار دیتے ہوئے انکے ضامنوں کی ضمانتیں اور شورٹی بانڈز بھی ضبط کرنے کا حکم سنا دیا۔
عدالت نے ملزم کی جانب سے حاضری سے استثنیٰ اور صدارتی استثنیٰ کی درخواست کو بھی غیر موثر قرار دیدیا ۔ ایڈیشنل سیشن عدالت نے فیصلہ 25جون کو محفوظ کیا تھا جسے آج سنا یا گیا ہے ۔

ایمز ٹی وی(اسلام آباد) اسلام آباد میں پولیو کے خاتمے کیلئے کئے جانے والے اقدامات اور 26 ستمبر سے شروع ہونے والی انسداد پولیو مہم کے انتظامات کا جائزہ لینے کیلئے سی ڈی اے ہیڈ کوارٹرز میں ایک اعلیٰ سطح اجلاس منعقد ہوا

جس میں وزیر اعظم کی فوکل پرسن برائے پولیو عائشہ رضا ،اسلام آباد کے میئر و چیئرمین سی ڈی اے شیخ انصر عزیز ،آئی جی اسلام آباد پولیس ،چیف آفیسر میٹرو پولیٹن کارپوریشن ، ڈی جی ہیلتھ سروسز ایم سی آئی، ڈپٹی کمشنر اسلام آباد، یونیسف (UNICEF)اور ورلڈ ہیلتھ آرگنائزیشن(WHO) کے نمائندوں نے شرکت کی ۔
اجلاس میں اسلام آباد میں پولیو کے خاتمہ کے لئے اب تک اٹھائے جانے والے اقدامات کا جائزہ لیا گیا ۔شیخ انصر عزیزنے اجلاس کو بتایا کہ اسلام آباد کو پولیو فری سٹی بنانے کیلئے بھرپور کو ششیں کی جا رہی ہیں اور اس ضمن میں سی ڈی اے اور ایم سی آئی کے تمام شعبے مل کر کام کر رہے ہیں۔

انہوں نے بتایا کہ ڈی جی ایچ آر ڈی کو ہدایت کی گئی ہے کہ انسداد پولیو مہم کیلئے تعینات عملے کی ڈائریکٹوریٹ آف ہیلتھ سروسز میں حاضری کو یقینی بنایا جائے ۔ 26 ستمبر سے شروع ہونے وا لی ا نسداد پولیو مہم کو کامیاب بنانے کے لئے 600 پولیو ٹیمیں اسلام آباد کے مختلف علاقوں میں 5 سال سے کم عمر کے 140,835 بچوں کو پولیو کے قطرے پلائیں گی۔

ایمزٹی وی(تعلیم) وفاقی اردو یونیورسٹی کے ناظم امتحانات غیاث الدین احمد کے مطابق کراچی،اسلام آباد ا ور راولا کوٹ میں ہونے والے بی اے (سال دوم) پرائیویٹ سالانہ امتحان2014 منعقدہ امتحان دسمبر2015 کے نتائج کا اعلان کردیا گیا ہے۔

کراچی میں ہونیوالے امتحان میں1399 طلباءرجسٹرڈ ہوئے جن میں1323طلباءنے امتحان میں شرکت کی اور268 طلباءکامیاب قرار پائے جبکہ مجموعی رزلٹ20.26فیصد رہا۔

بی اے (سال دوم) کے اس امتحان میں حافظ مبشر رضوان نے677نمبرلے کر پہلی،امتیازاحمد نے674نمبر لے کر دوسری اور مریم بانو نے651نمبر لے کر تیسری پوزیشن حاصل کی۔ تینوںپوزیشن ہولڈرزکا تعلق کراچی سے ہیں۔

ایمزٹی وی(گلگت بلتستان) گلگت بلتستان کے خوبصوررت ترین سیاحتی مقام راما میں ہونے والا پولو فیسٹول کامیدان آج سجے گا افتتاحی میچ کے مہمان خصوصی ڈپٹی اسپیکر گلگت بلتستان جعفراللہ خان اورمیرمحفل پارلیمانی سیکرٹری برکت جمیل ہونگے۔

اس فیسٹول میں گلگت بلتستان کے 6اضلاع جس میں دیامر ،استور ،اسکردو ،گلگت ،غذر ،گا نچھے اورنگر کی پولو ٹیمیں شرکت کرینگی۔جس میں ضلع استور کی 2ٹیمیں شامل ہیں ۔راما فیسٹول میں گلگت بلتستان کی 8 ٹیمیں نے شرکت کررہی ہیں ۔

اس موقع پر ڈپٹی کمشنر کی زیر صدارت ڈپٹی کمشنر کے آفس میں پولو ڈراز ہوئے ۔ جس میں ڈائریکٹر سپورٹس بورڈ حسین علی ،پولو ایسوسی ایشن گلگت بلتستان کے صدر اشرف گل ،سمیت استور پولوایسوسی ایشن اور دیگر اضلاع سے آنے والی پولو ٹیمو ں کے صد ور اور امن کمیٹی کے ممبران نے شرکت کیا ۔

پول اے میں دیامر ،سکردو،استور گرین اور نگر شامل ہیں ۔پول بی میں استور اے، گا نچھے ،غذر اور گلگت شامل ہیں ۔آج پہلا میچ پول اے کی ٹیموں کے درمیان بوقت 10 بجے استورگرین بمقابلہ نگر دوسر ا میچ 3بجے سکردو بامقابلہ دیامر ہو گا ۔ اور دوسرے راﺅنڈ میں پول بی کے ٹیموں کا مقابلہ ہوگا۔

۔اس موقع پر ڈپٹی کمشنر استور رحمان شاہ نے کہا کہ میں استوری عوام پولو ایسوسی ایشن استور ضلعی انتظامیہ کی جانب سے تمام اضلاع سے آئے ہوئے پولو ٹیموں کو خوش آمدید کہتا ہو ں اور امید رکھتا ہوں کہ تمام پولو کھلاڈی اس فیسٹول میں اچھے کھیل کا مظاہرہ اور نظم و ضبط کو مد نظر رکھتے ہوئے اس فیسٹول کو کامیاب بناینگے ۔

ایمزٹی وی (گلگت بلتستان)گزشتہ سالوں کی طرح اس سال میں بھی پولیو مہم کو کامیاب بنانے کے لئے ضلعی انتظامیہ محکمہ صحت ہنزہ کے ساتھ بھرپور تعاون کرے گی پولیو مہم کو کامیاب بنانے اور لائین ڈیپارٹمنٹ ہنزہ کے ساتھ خصوصی تعاون کے علاوہ صحت کے متعلق عوام کی بھر پور خدمت کرنے پرخراج تحسین پیش کرتے ہے۔

ان خیالات کا اظہار بحثیت چیرمین پولیو اراڈکیشن کمیٹی ،قائم مقام ڈپٹی کمشنر ہنزہ شیریار نے پولیو اجلاس میں کیا۔ انہوں نے مزید کہا کہ پولیو مہم کو مضبوط اور موثر بنانے کے لئے میڈیا سوشل میڈیا علما ءسماسی و سماجی حلقوں کی مدد لینا ہوگااس خطرناک بیماری کے خاتمہ کے لئے والدین پانچ سال سے کم عمر بچوں کو پولیو کے قطرے پلوائیں۔

ایمزٹی وی(اسلام آباد)اقوام متحدہ کے ہیومین رائٹس کمیشن میں پاکستان کی مندوب تہمینہ جنجوعہ نے کہا ہے کہ اقوام متحدہ بھارتی مظالم کی تحقیقات کے لیے اپنا مشن مقبوضہ کشمیر بھیجے۔ ان کا کہنا تھا کہ بھارت جان بوجھ کر کشمیریوں کی جدوجہد آزادی کو دہشت گردی کا رنگ دے رہا ہے

اقوام متحدہ کےہیومین رائٹس کمیشن میں پاکستان کی مندوب تہمینہ جنجوعہ نے کہا ہے کہ نہتے کشمیریوں پربھارتی مظالم تشویش کا باعث ہیں

تہمینہ جنجوعہ نے بتایا کہ رپورٹ میں نہتے کشمیریوں پر بھارتی مظالم کے ثبوت موجود ہیں، لہذاعالمی برادری مقبوضہ کشمیر میں بھارتی بربریت اور سفاکیت کا فوری نوٹس لے۔

تہمینہ جنجوعہ نے مزید کہا کہ مقبوضہ کشمیر میں بھارتی مظالم اور بربریت کی غیر جابندارانہ تحقیقات کرائی جائیں۔ بھارت مقبوضہ کشمیرسے عالمی توجہ ہٹانے کے لیے اوچھے ہتھکنڈے استعمال کر رہا ہے