ایمزٹی وی(گلگت بلتستان)ہائی کورٹ بار ایسوسی ایشن گلگت بلتستان کے صدر ملک کفایت الرحمان نے میڈیا سے گفتگو کرتے ہوئے کہا کہ سی پیک منصوبہ گلگت بلتستان کے لئے نہایت ہی اہمیت کا حامل ہے اس کی تکمیل سے قبل گلگت بلتستان کے عوامی حقوق اور تحفظ اور سستا انصاف کی فراہمی کے لئے سپریم کورٹ آف پاکستان کے دائرکار کو گلگت بلتستان تک بڑھانا ضروری ہے۔

سی پیک منصوبے سے گلگت بلتستان کے عوام کی تقدیر بدل جائے گی لیکن گلگت بلتستان کی حدود کے اندر جو قومی اور بین الااقومی تاجر برادری تجارت کرے گی۔ اُس کو کوئی مسئلہ درپیش ہونے کی صورت میں موجودہ کورٹس فیصلے صادر کر ینگے اُس پر ملک کے دیگر صوبوں میں عمل درآمد نہیں ہو سکتی ہے ۔ اُنہوں نے مزید کہا کہ گلگت بلتستان چیف کورٹ کو مکمل ہائی کورٹ کا درجہ دے دیا جائے اور ججوں کی تعداد کو بڑھا کر 7کر دی جائے۔

گزشتہ دنوں چیف آف آرمی اسٹاف نے کرپشن کے خاتمے اور دہشت گردی سمیت سی پیک منصوبے کی تکمیل کے لئے جس عزم کا اظہار کیا گلگت بلتستان کے عوام بھر پور حمایت کرتے ہیں۔ اور آرمی چیف سے سی پیک منصوبے کی تکمیل کے لئے سپریم کورٹ آف پاکستان کے دائر کار اور چیف کورٹ کو ہائی کورٹ کے درجہ دلانے کے لئے بھی اپیل کرتے ہیں کہ اس اہم معاملے کو حل کرنے کے لئے اپنا کلیدی کردار ادا کریں کیونکہ وزیراعظم اور صدر پاکستان کے اختیارات اور احکامات گلگت بلتستان میں عمل درآمد ہو رہے ہیں تو سپریم کورٹ آف پاکستان کے دائرکار کو گلگت بلتستان بڑھانے میں کوئی قانونی پیچیدگی نہیں بلکہ اس سے قومی اور بین الااقومی سطح کے تاجروں کے حقوق کا تحفظ ہو گا۔

ایمزٹی وی(گلگت بلتستان)گلگت بلتستان قانون ساز اسمبلی کے حلقہ جی بی ایل اے 6 ہنزہ میں ضمنی انتخاب کے لیے میلہ سج گیا ہے

ضمنی انتخاب کیلیے 58 پولنگ اسٹیشن بنائے گئے ہیں۔ گلگت بلتستان کے عام انتخابات میں اس حلقے سے مسلم لیگ ن کےامیدوار میرغضنفرعلی خان کامیاب قرارپائےتھے۔

اکتوبر 2015میں میرغضنفرعلی خان کوگلگت بلتستان کا گورنر تعینات کردیاگیا جس کے بعد سے یہ نشست خالی ہے ۔یہاں مختلف وجوہات کی بنیاد پر 3 مرتبہ ضمنی انتخاب ملتوی ہوچکا ہے ۔

حلقے میں پاکستان مسلم لیگ ن نے گورنر گلگت بلتستان میرغضنفرعلی خان کے صاحبزادے شاہ سلیم خان کو اپنا امیدوار نامزد کیاہے۔

پاکستان پیپلزپارٹی کی جانب سے سابق اسپیکر وزیر بیگ اور پاکستان تحریک انصاف کی جانب سے عزیزاحمد امیدوار ہیں ۔ آزاد امیدوار کرنل (ر) عبید اللہ بیگ اور مسلم لیگ ن کے امیدوار کے درمیان سخت مقابلہ متوقع ہے۔

ایمزٹی وی(اسلام آباد) وزیراعظم نوازشریف کا کہنا ہے کہ پاکستان چین اقتصادی راہداری ملک کے لیے گیم چینجر ثابت ہو گی اوراقتصادی راہداری منصوبے سے خطے کی تقدیر بدل جائے گی۔
سینیٹ میں قائد ایوان راجہ ظفرالحق سے ملاقات میں وزیراعظم نوازشریف کا کہنا تھا کہ ملک سے بجلی اورگیس کی قلت کو دورکرنے کے لیے کوشاں ہیں جس کے لیے توانائی کے شعبے میں اربوں روپے کی سرمایہ کاری کی ہے اور اس حوالے سے جاری منصوبوں سے نہ صرف لوڈشیڈنگ کاخاتمہ ہوگا بلکہ منصوبوں کی تکمیل سے صارفین کو سستی بجلی بھی مہیا ہوگی۔

ان کا کہنا تھا کہ ملک میں امن وامان کی صورتحال میں نمایاں بہتری آئی ہے جب کہ پاکستان چین اقتصادی راہداری ملک کے لیے گیم چینجر ثابت ہو گی اوراقتصادی راہداری منصوبے سے خطے کی تقدیر بدل جائے گی۔

وزیراعظم نے کہا کہ تاجر برادری امن وامان کی صورتحال کی بہتری سے مستفید ہورہی ہے،عالمی مالیاتی منڈیوں کاپاکستان پراعتماد بڑھا ہے اور ٹیکس محصولات میں بھی نمایاں اضافہ ہوا ہے جب کہ زرمبادلہ کے ذخائر تاریخ کی بلند ترین سطح پر ہیں۔ ان کا کہنا تھا کہ معاشی سرگرمیوں میں اضافہ سے روزگار کے مواقع پید اہوں گے جب کہ بجلی کی پیدوار میں اضافہ اور نرخوں میں کمی سے معیشت کو فائدہ ہوگا۔

ایمزٹی وی(انٹرنیشنل) شمالی کوریا کی طرف سے پانچویں ایٹمی دھماکے کا اعلان کر دیا گیا ہے، شمالی کوریا کا یہ دھماکا پچھلے چار دھماکوں سے زیادہ شدید تھا۔

شمالی کوریا کی طرف سے پانچویں ایٹمی دھماکے نے دنیا بھر میں کھلبلی مچا دی ہے، گزشتہ ایک ماہ سے امریکا سفارتی محاذ پر شمالی کوریا کی ایٹمی سرگرمیوں پر شدید تنقید کر رہا ہے اور پانچواں ممکنہ دھماکا صدر باراک حسین اوباما کے دورہ ایشیا کے فوراً بعد کیا گیا۔

ایٹمی دھماکا شمالی کوریا جنوب مشرق میں صبح کے وقت کیا گیا ، امریکی جیولوجیکل سروے کا کہنا ہے کہ دھماکے کے وقت شمالی اور جنوبی کوریا میں 5 اعشاریہ 3 شدت کے زلزلے کے جھٹکے بھی محسوس کیے گئے اور پانچواں دھماکا پچھلے تمام دھماکوں سے زیادہ شدید تھا۔

ترجمان نیشنل سیکیورٹی کونسل شمالی کوریا کا کہنا ہے کہ امریکا شمالی کوریا کے ایٹمی منصوبے کی مسلسل نگرانی کر رہا تھا اور علاقے میں اپنے اتحادیوں کے ساتھ مل کر ان کے ایٹمی منصوبے تک رسائی کی کوشش بھی کرتا رہا۔

دوسری جانب امریکہ کے علاوہ جاپان،ترکی،چین، ٹوکیو اور دیگر ممالک نے بھی شدید ردعمل کا اظہار کرتے ہوئے کہا ہے کہ ایٹمی دھماکوں کو برداشت نہیں کیا جائے گا۔

ایمزٹی وی(تعلیم)وفاقی اردویونیورسٹی کے ناظم امتحانات غیاث الدین احمدکے مطابق کراچی، اسلام آباد اور راولاکوٹ میں ہونے والے بی اے سال اول پرائیویٹ سالانہ امتحان2014ء منعقدہ امتحان دسمبر2016ء کے نتائج اکاعلان کردیاگیاہے ۔کراچی میں ہونیوالے امتحان میں2317طلباء رجسٹرڈہوئے جن میں2037طلباء نے امتحان میں شرکت کی اور380طلبا کامیاب قرارپائے جبکہ مجموعی رزلٹ18.65فیصدرہا.

ایمز ٹی وی (پشاور ) عوامی نیشنل پارٹی کے مرکزی صدر اسفند یار ولی خان نے پارٹی کی جنرل کونسل کا اجلاس 20ستمبر کو ولی باغ چار سدہ میں طلب کر لیا ہے جس میں پارٹی کی تنظیمی کارکردگی کا جائزہ لیا جائے گا ۔

اے این پی کی مرکزی کابینہ مذکورہ اجلاس میں اپوزیشن کے مشترکہ احتجاج کے حوالے سے بھی غور کرے گی اور یہ فیصلہ کیا جائے گا کہ اے این پی اس احتجاج کا حصہ بنے یا نہیں تا ہم ذرائع نے بتایا کہ اپوزیشن حکومت مخالف کسی بھی احتجاج کا حصہ نہیں بنے گی کیونکہ اے این پی حکومت ایسے کسی بھی احتجاج کو جمہوریت کے خلاف اقدام تصور کرتی ہے۔ تا ہم پانامہ لیکس کے حوالے سے اپوزیشن ٹی او آرز کی تیاری کے سلسلے میں پہلے سے تشکیل کردہ ٹی او آرز کمیٹی کے تحت کام کرتی ہے تو اے این پی اس میں شامل رہے گی۔

ایمزٹی وی(تعلیم/کراچی)ڈائریکٹر جنرل کالجز سندھ کی قائم کردہ دو رکنی اعلیٰ اختیاراتی ٹیم کا شہر کے مختلف کالجز پر چھاپہ،شہید ملت کالج میں تین ہزار روپے اضافی فیس وصول کرنے کا انکشاف ہواجس پر ایکشن لیتے ہوئے اعلیٰ اختیاراتی ٹیم نے موقع پر ہی اضافی فیس واپس کروادی۔

تفصیلات کے مطابق گورنمنٹ کامرس اینڈ اکنامکس کالج میں داخلہ فارم 35 روپے کے بجائے 135 روپے میں فروخت کیا جارہا تھا،جبکہ داخلہ فیس کے علاوہ یونیفارم اور پریکٹیکل جنرل کے نام پر تین ہزار روپے اضافی وصول کیے جارہے تھے

ڈائریکٹر جنرل کالجز سندھ کی قائم کردہ پروفیسرمراد علی اور پروفیسر زاہد پر مشتمل دو رکنی اعلیٰ اختیاراتی ٹیم نے چھاپہ مار کر یہ ہدایت جاری کی کہ آرٹس اور کامرس گروپ کے طالب علم پانچ سو روپے اور سائنس گروپ کے طالب علم قواعد کے مطابق صرف 550 روپے جمع کرائیں گے ، جبکہ ڈاکٹر ناصر انصار ڈائریکٹر کالجز سندھ کے اعلامیہ کے مطابق مرکزی داخلہ کمیٹی نے کالجز میں داخلے کی تاریخ میں توسیع کردی ہے جس کے مطابق سرکاری کالجز میں داخلوں کا عمل بیس ستمبے گا۔

ایمزٹی وی(انٹرنیشنل) مقبوضہ کشمیر میں آل پارٹیز حریت کانفرنس کے رہنما علی گیلانی کا بھارتی فوج کے نام کھلا خط لکھ دیا۔ جس میں انہوں نے قابض فوج کو مخاطب کرتے ہوئے کہا ہے کہ تم ہمیں جتنا مارو گے، آزادی کےلئے ہمارا عزم اور حوصلہ اتنا ہی بلند ہوگا۔

اپنے خط میں انہوں نے خاص طور پر مقبوضہ کشمیر میں تعینات بھارتی فوجیوں کو مخاطب کرتے ہوئے کہا ہے کہ آزادی کی جدوجہد میں لاکھوں شہادتوں کے باوجود حریت پسندوں کے حوصلے پست نہیں ہوئے ہیں۔ ’’تم ہمیں جتنا مارو گے، آزادی کےلئے ہمارا عزم اور حوصلہ اتنا ہی بلند ہوگا،‘‘

اس خط میں انہوں نے مزید کہا کہ وقت آگیا ہے کہ تم نوشتہ دیوار پڑھ لو اور سوچو کہ ہمیشہ سے تمہارا مقصد کیا رہا ہے اور ہمیشہ اس کے کیا نتائج تمہارے سامنے آتے رہے ہیں۔ تم سمجھے کہ تمہارا جبر و تشدد آزادی کے ہمارے خوابوں کو قتل کردے گا۔ لیکن ایسا نہیں ہوا۔ تم نے سوچا تھا کہ ہماری روح کو مجروح کرکے ہمیں آپس میں ایک دوسرے کے خلاف کردو گے۔ لیکن ہم ایسا نہیں کریں گے۔ تم قتل و غارت گری میں کامیاب رہے لیکن ہماریآزادی کے خوابوں کو موت کے گھاٹ نہیں اُتار سکتے۔ مزید تشدد، مزید پچھتاوے اور مزید قبروں سے پہلے ہم تم سے کہتے ہیں کہ باز آجاؤ۔‘‘

’’ہم مہمان نواز لوگ ہیں۔ ہم مہمانوں کو خوش آمدید کہتے ہیں لیکن حملہ آوروں کو نہیں۔ ہم تمہاری مکاری اور نفسیاتی جنگ کو بخوبی سمجھتے ہیں۔ تم ہمیں مارتے مارتے تھک جاؤ گے… (لیکن) ہم اپنی تاریخ، اپنے مستقبل، اپنی آزادی کی جدوجہد سے نہیں تھکیں گے۔ ہم نہیں بھولیں گے۔ ہم معاف نہیں کریں گے،‘‘ علی گیلانی نے خط میں مزید لکھا۔

بھارتی فوجیوں کے ضمیر کو جھنجھوڑتے ہوئے علی گیلانی لکھتے ہیں کہ اگر ان میں ضمیر اور انسانیت نام کی کوئی چیز واقعی زندہ ہے تو وہ حقِ خود ارادیت اور آزادی کےلئے کشمیریوں کی جدوجہد کا ساتھ دیں۔ اس کھلے خط کا اختتام ان الفاظ پر ہوتا ہے: 

’’تشدد روک دو، گھر جاؤ۔ بھارتی فوجیو! گھر جاؤ۔‘‘

ایمزٹی وی (انٹرنیشنل) امریکی سینیٹ کے بعد امریکی ایوان نمائندگان نے بھی نائن الیون حملے میں ہلاک ہونے والوں کے اہلخانہ اور رشتہ داروں کی جانب سے سعودی حکومت پر مقدمے کے حوالے سے بِل منظور کر لیا۔

اے ایف پی کے مطابق تقریباً 4 ماہ قبل امریکی سینیٹ میں ’جسٹس اگینسٹ اسپانسرز آف ٹیررازم ایکٹ‘ (دہشت گردوں کے مالی معاونت کاروں کیخلاف انصاف کا قانون ) کا بل متفقہ طور پر منظور کیا گیا تھا۔ ایوان نمائندگان سے منظوری کے بعد اب یہ بِل نائن الیون حملوں کو15سال مکمل ہونے سے چند روز قبل، دستخط کے لیے امریکی صدر باراک اوباما کو پیش کیا جائے گا۔

سینیٹ سے اس بل کی منظوری کے بعد اوباما انتظامیہ کا کہنا تھا کہ وہ اس کی مخالفت کرے گی اور صدر باراک اوباما اسے ویٹو کردیں گے۔ اگر اس بل کو قانون کا حصہ بنا لیا جاتا ہے تو امریکا میں دہشت گرد حملوں میں کسی بھی طرح کا کردار پائے جانے پر کسی بھی ملک کی حکومت، بالخصوص سعودی حکومت کیخلاف مقدمہ درج کرایا جاسکے گا اور حملے کے متاثرین اس ملک سے زرتلافی طلب کرنے کے حقدار ہوں گے۔

اس بل کی منظوری کیخلاف سعودی حکومت کی جانب سے شدید تنقید کی گئی تھی اور امریکی انتظامیہ کو متنبہ کیا گیا تھا کہ اگر سعودی حکومت کو نائن الیون حملوں میں کسی بھی قسم کے کردار کا ذمے دار قرار دینے کے حوالے سے قانون بنایا گیا تو وہ امریکا میں اپنے تقریباً 750ارب ڈالرز کے اثاثے فروخت کر دے گا۔ یاد رہے کہ نائن الیون کے واقعے میں 4 طیاروں کو ہائی جیک کرنے والے 19 میں سے 15افراد سعودی شہری بتائے جاتے ہیں تاہم ریاض کی جانب سے ان حملوں میں کسی بھی قسم کے کردار کی تردید کی جاتی رہی ہے۔

ایمزٹی وی(تعلیم/ کراچی)جامعہ کراچی نے عید الضحٰی کی تعطیلات کا اعلان کردیا۔جامعہ کراچی کے رجسٹرار پروفیسرڈاکٹر معظم علی خان کے جاری کردہ اعلامیہ کے مطابق جامعہ کراچی میں عید الاضحی کے سلسلے میں12تا15ستمبر

2016ء تعطیل رہے گی۔