ایمزٹی وی(تعلیم/کوئٹہ) بلوچستان مین جشن آزادی کی تقریبات کے باعث صوبہ بھر کے تمام تعلیمی اداروں میں آج عام تعطیل ہے ۔ صوبائی وزیر تعلیم رحیم زیاتوال نے گزشتہ روز جشن آزادی کی تقریبات کے باعث صوبائی حکومت کی جانب سے عام تعطیل کا اعلان کیا ۔

جس کے تحت کوئٹہ سمیت صوبے بھر کے سرکاری اور مشنری اسکولز بھی بند ہیں جبکہ نجی تعلیمی ادارے کھولے ہیں اور سرکاری دفاتر میں بھی حاضری معمول کے مطابق ہے ۔

ایمزٹی وی(بلوچستان)کوئٹہ میں یوم آزادی کا آغاز گیریژن میں اکیس توپوں کی سلامی سے ہوا،قومی دن کے حوالے سے صوبائی اسمبلی کے سبزہ زار پر تقریب منعقد ہوئی جس کے مہمان خصوصی وزیراعلی نواب ثناء اللہ زہری تھے۔ تقریب میں اسپیکر اسمبلی راحیلہ حمید درانی،کمانڈر سدرن کمانڈ لیفٹیننٹ جنرل عامر ریاض، صوبائی وزرا،آئی جی ایف سی، آئی جی پولیس میجر جنرل شیرافگن اور دیگر شریک تھے۔

وزیر اعلی نے پرچم کشائی کی اور تقریب سے خطاب کرتے ہوئے کہاکہ وہ سانحہ کوئٹہ میں بچھڑنے والوں کی کمی محسوس کررہےہیں، المناک واقعہ نے پوری قوم کو سوگوار کیاہے۔

دہشت گردی کے خلاف سیاسی و عسکری قیادت میں مکمل ہم آہنگی موجود ہے، دشمن کی تمام سازشوں کو ناکام بنانے کا پختہ عزم کررکھا ہے

ایمزٹی وی(راوپلنڈی) آرمی چیف جنرل راحیل شریف کو باکسر عامرخان نے امن کےلیے خدمات کے اعتراف میں باکسر عامرخان نے اعزازی چمپیئن شپ بیلٹ پیش کی.

تفصیلات کے مطابق جی ایچ کیو میں آرمی چیف جنرل راحیل شریف سے پاکستانی نزاد برطانوی باکسر عامرخان نے ملاقات کی، اس موقع پر انہوں نے آرمی چیف اور پاک فوج کی دہشت گردی کے خلاف کوششوں اور کامیابوں کو سراہا.

عالمی شہرت یافتہ باکسر عامرخان نے آرمی چیف کو بحالی امن کے لیے خدمات کے اعتراف میں چمپیئن شپ بیلٹ پیش کی.اعزازی چمپیئن شپ بیلٹ ولڈ باکسنگ کونسل کے سربراہ کی جانب سے پیش کی گئی.

ایمزٹی وی(اسلام آباد)پرچم کشائی کی مرکزی تقریب اسلام آباد کے جناح کنونشن سینٹر اسلام آباد میں منعقد ہوئی۔ تقریب میں صدر ممنون حسین اور وزیراعظم نوازشریف نے سبز ہلالی پرچم فضا میں بلند کیا۔ اسلام آباد کنونشن سینٹر میں پرچم کشائی کی مرکزی تقریب سے خطاب کرتے ہوئے صدر ممنون حسین نے کہا کہ دہشتگردی میں شہید ہونے والوں کے لہو کا ایک ایک قطرہ ہم پر قرض ہے،دہشت گردی کے خلاف جنگ میں قوم مسلح افواج کے شانہ بشانہ ہے، سانحہ کوئٹہ پر ہمارے دل دکھی ہیں ،غمزہ خاندان خود کو تنہا نہ سمجھیں ۔

اس موقع پرصدر ممنون حسین نے کہا کہ قوم کی بیٹیاں علم و ہنر کی دولت سے مالا مال ہوکر ملک کی ترقی میں اپنا کردار ادا کریں گی،نوجوانوں کے جوش و جذبے کو جذبہ تعمیر میں بدلنے کی ضرورت ہے،ہماری تاریخ کے سنہری نقوش مشعل راہ ہیں،یوم آزادی پر کشمیری بھائیوں کو بھولنا نہیں چاہیے۔ صدر ممنون حسین نے کہا کہ آپریشن ضرب عضب آخری مراحل میں ہے ،نیشنل ایکشن پلان کے تحت آپریشن ضرب عضب کے نتائج حوصلہ افزا ہیں۔ دیدہ اور نادیدہ دشمن کو بھاگنے نہیں دیاجائے گا ، یقین ہے آخری کاری ضرب لگا کر دہشتگردوں کا ہمیشہ کیلیے خاتمہ کردیں گے۔

صدر مملکت نے کہاکہ کشمیری بھائیوں کی سیاسی، اخلاقی اور سفارتی حمایت اور مدد جاری رکھیں گے،بدی کی قوتوں کو سرنگوں کرکے اپنے وطن کو اندھیروں سے پاک کرنے کے لیے قوم متحد ہوجائے۔ تقریب میں قومی ترانہ پڑھا گیا ،تقریب میں تینوں مسلح افواج کے سربراہان موجود تھے۔ تقریب میں سائرن بجایاگیا۔

ایمزٹی وی(راولپنڈی)صدر مملکت ممنون حسین کی جانب سے مسلح افواج کے افسروں اور جوانوں کے لئے فوجی اعزازات کا اعلان کیا گیا ہے، آئی ایس پی آر سے جاری بیان میں بتایا گیا ہے کہ صدر ممنون حسین نے تینوں مسلح افواج کے افسران اور جوانوں کو فوجی اعزازات دینے کا اعلان کیا ہے، فوجی اعزازات پاکستان آرمی ،نیوی اور ائیر فورس میں شاندار کارکردگی کا مظاہرہ کرنےو الے افسران اور جوانوں کو دیئے جائیں گے۔

ترجمان کے مطابق طورخم باردڑ پر افغان فورسز کی فائرنگ سے شہید ہونے والے میجر علی جواد خان کو تمغہ جرات کا اعزاز دیا جائے گا، چار فوجی جوانوں اور افسروں کو ستارہ بسالت جبکہ 76 جوانوں کو تمغہ بسالت کا ایوارڈ دیا گیا ہے علاوہ ازیں 48 فوجی جوانوں کو امتیازی اسناد اور231جوانوں کو آرمی چیف کےتعریفی کارڈ عطا کئے جائیں گے، 19 جوانوں کو ہلال امتیاز ملٹری 85،کو ستارہ امتیازملٹری جبکہ 112کو تمغہ امتیاز ملٹری دیا جائے گا۔ ستارہ بسالت والے افسروں اور جوانوں میں کیپٹن جواد احمد، حوالدار محمد ضیا، سپاہی حسین علی اور سپاہی محمد شبیر شامل ہیں

ایمزٹی وی(کراچی)یوم آزادی کے موقع پرمزار قائد پر گارڈز کی تبدیلی کی پروقار تقریب ہوئی اور پاکستان نیول اکیڈمی کے چاک و چوبند کیڈٹس نے مزار کی سیکیورٹی کے فرائض سنبھال لئے۔ کمانڈنٹ نیول اکیڈمی کموڈور عدنان احمد نے پریڈ کا معائنہ کیا اور مراز قائد پر فاتحہ خوانی کے بعد پھولوں کی چادر بھی چڑھائی، کموڈور عدنان نے مہمانوں کی کتاب میں اپنے تاثرات بھی درج کئے۔

گارڈز کی تبدیلی کی تقریب کے موقع پر سیکیورٹی کے بھی انتہائی سخت انتظامات کئے گئے تھے، سیکیورٹی کے لئے پولیس اور رینجرز کے جوانوں کی بڑی تعداد موجود تھی جب کہ گارڈز کی تبدیلی سے قبل بم ڈسپوزل اسکواڈ نے بھی مزار کی تلاشی لی۔

ایمزٹی وی(اسلام آباد)یوم آزادی كے موقع پر قوم كے نام اپنے پیغام میں وزیراعظم نوازشریف نے كہا ہے كہ اس سال 14اگست كا دن روایتی مسرت كے ساتھ دكھ كے گہرے احساس كو بھی اپنے اندر سمیٹے ہوئے ہے، كوئٹہ كے شہدا كا غم ابھی تازہ ہے آج ہم اُن شہدا كو بھی یاد كر رہے ہیں جنہوں نے اس آزادی كو قائم ركھنے كے لیے اپنی جانوں كا نذرانہ پیش كیا، یہ دن پاكستانی قوم كے اس عزم كے ساتھ طلوع ہورہا ہے كہ پاكستان اللہ كے فضل سے ہمیشہ قائم رہے گا۔ انہوں نے کہا کہ 1965 كا جذبہ آج بھی اپنی پوری آب و تاب كے ساتھ زندہ ہے، جب پاكستان كی افواج اورعوام نے ایك ساتھ دشمن كا سامنا كیا تھا۔

وزیراعظم نے کہا کہ یہ یومِ آزادی اس وجہ سے بھی یاد گار ہے كہ اِن دنوں مقبوضہ كشمیر میں آزادی كا جذبہ اپنے عروج پر ہے، اہلِ كشمیركی نئی نسل نے ایك نئے جذبے كے ساتھ آزادی كا علم اٹھایا ہے، میں اس سال 14 اگست كو آزادی كشمیر كے نام كرتا ہوں اسے ان اہلِ كشمیر كے نام كرتا ہوں جنہوں نے ریاستی جبر كا مقابلہ كیا مگر آزادی كے جذبے كوزندہ ركھا، آزادی كا حصول جتنا مشكل ہے اس كی حفاظت اس سے زیادہ مشكل ہے۔ انہوں نے کہا کہ قائد اعظم كی قیادت نہ ہوتی تو پاكستان كا قیام ممكن نہ ہوتا، اگر ہماری افواج، سلامتی كے ادارے، پولیس اور عوام اس كے لیے اپنا خون نہ دیتے تو اس كی بقا اور سلامتی ممكن نہ ہوتی۔

وزیراعظم نوازشریف کا کہنا تھا کہ اگست كے مہینے میں جہاں ہم قائد اور تحریكِ پاكستان كے رہنماؤں اور كاركنوں كو یاد كرتے ہیں وہاں اُن شہدا كی یاد كے چراغ بھی ہمارے دلوں میں روشن ہو جاتے ہیں جو وطن كے لیے جان دے كر امر ہوگئے ہیں، آج ہم اپنے ان سب شہدا كو یاد كر رہے ہیں یہ ریاست كے ہر شعبے، ہر سیاسی جماعت، ہر طبقہ زندگی، ہر مسلك اور ہر مذہب میں ہیں یہ سب پاكستانی ہیں، ہم اپنے ان شہدا كو خراجِ عقیدت پیش كررہے ہیں، ہم ان كی روحوں كو سلام پیش كررہے ہیں۔

ایمزٹی وی(اسلام آباد) افغانستان میں کریش لینڈنگ کے دوران تباہ ہونے والے پنجاب حکومت کے ہیلی کاپٹر کا عملہ اسلام آباد پہنچ گیا۔ پنجاب حکومت کے ہیلی کاپٹر کا عملہ افغان قبائلی عمائدین کے ساتھ راولپنڈی کے بے نظیر انٹرنیشنل ایئرپورٹ پہنچا، عملے کو ضابطے کی کارروائی کے بعد ان کے گھروں پر روانہ کردیا جائے گا۔ دوسری جانب افغان میڈیا نے بھی اس بات کی تصدیق کر دی ہے کہ ہیلی کاپٹر کے عملے کو پاکستانی حکام کے حوالے کر دیا گیا ہے۔

ترجمان دفتر خارجہ نے بھی پنجاب حکومت کے ہیلی کاپٹر عملے کی اسلام آباد پہنچنے کی تصدیق کرتے ہوئے کہا ہے کہ عملے کو پاک افغان سرحد پر قبائلی عمائدین کے حوالے کیا گیا، عملے کو فاٹا سے ہیلی کاپٹر کے ذریعے اسلام آباد پہنچایا گیا۔ ترجمان کے مطابق اسلام آباد پہنچنے والے حکومت کے ہیلی کاپٹر عملے میں کرنل (ر) شفیق الرحمان، کرنل (ر) صفدر حسین شامل، کیپٹن (ر) صفدر اشرف، فلائیٹ انجینئر ناصر محمود، کریوچیف محمد کوثر اور روسی نیوی گیٹر سرگئی سیوسیتی نوف شامل ہیں۔

واضح رہے کہ چند روز قبل پنجاب حکومت کا ایم آئی سیون ہیلی کاپٹر مرمت کے لئے روس جا رہا تھا کہ فنی خرابی کے بعد ہیلی کاپٹر کو افغان صوبے لوگر میں کریش لینڈنگ کرنا پڑی، لینڈنگ کے نتیجے میں ہیلی کاپٹر مکمل طور پر تباہ ہو گیا جب کہ عملے کے 6 افراد کو طالبان کا ایک گروپ اپنے ساتھ لے گیا تھا۔

ایمزٹی وی(کوئٹہ)سریاب روڈ پر دہشت گردوں سے مقابلے میں 3 دہشت گرد ہلاک جب کہ 2 سیکیورٹی اہلکار زخمی ہوگئے۔ ذرائع کےمطابق سریاب روڈ پر سیکیورٹی فورسز اور دہشت گردوں کے درمیان فائرنگ کا تبادلہ ہوا جو کافی دیر تک جاری رہا تاہم اس دوران فورسز کی جوابی فائرنگ میں 3 دہشت گرد ہلاک ہوگئے جب کہ اس دوران 2 سیکیورٹی اہلکاروں پر گولیاں لگنے سے زخمی ہوئے۔

ذرائع کےمطابق ہلاک دہشت گردوں کا تعلق کالعدم تنظیم سے ہے جن کے قبضے سے اسلحہ برآمد ہوا ہے جب کہ دہشت گردوں کے دیگر ساتھی اندھیرے کا فائدہ اٹھاتے ہوئے فرار ہوگئے۔ دہشت گردوں سے فائرنگ کے تبادلے میں زخمی ہونے والے سیکیورٹی اہلکاروں کو طبی امداد کے لیے قریبی اسپتال منتقل کردیا گیا ہے۔