ایمزٹی وی (سیاسی) گوئٹے وسطی امریکی ملک گو ئٹے مالا میں شیطان کو جلانے کا سالانہ تہوار منا یا گیا جسمیں لو گو ں نے شیطا ن کے پتلے کوآ گ لگائی۔ اس تہوار میں لوگوں نے اپنے گھر کا پرانا سامان نکال کر سڑکوں پر ڈھیرکر دیا جس سے شیطا ن کے پتلے بنا کر انہیں آ گ لگا کر شیطا ن کو جلانے کے قدیم رسم پوری کی گئی۔ قدیم روایتوں کے مطابق لوگوں کا ماننا ہے کہ گھر کے فالتو اور پرانے سامان میں شیطانی طاقتیں بسیرا کرلیتی ہیں لہٰذا ہر سال انہیں جلا کر شیطان سے چھٹکارا حاصل کرنا ضروری ہے ۔

ایمزٹی وی (فارن ڈیسک) سی آئی اے کی جانب سے دوران تفتیش القاعدہ سے تعلق رکھنے والے قیدیوں پر تشدد کی رپورٹ آج جاری کی جائے گی۔ وائٹ ہائوس کا کہنا ہے کہ رپورٹ سے دنیا بھر میں امریکی تنصیبات اور شہریوں کے لیے خطرات بڑھ جائیںگے، امریکی سینیٹ کی کمیٹی نے اس خفیہ رپورٹ کو کل عوام کے سامنے پیش کرنے کا اعلان کیا ہے، جسمیں سی آئی اے کے تفتیشی طریقوں کے بارے میں بتایا گیا ہے۔ رپورٹ میں بتایا گیا ہے کہ سی آئی اے نے القاعدہ کے سیکڑوں قیدیوں سے دوران تفتیش کسطرح تشدد کے ذریعے معلومات حاصل کیں۔ رپورٹ میں 2001 سے 2009 کے دوران پکڑے جانے والے القاعدہ کے 100 سے زیادہ ارکان پر کیے جانے والے تشدد کی تفصیلات بھی بیان کی گئی ہیں۔ تشدد کے ان طریقوں میں نیند سے محرومی ، انتہائی مختصر جگہ میں قید اور واٹربورڈنگ شامل ہیں۔ رپورٹ کے مطابق صدراوباما نے تسلیم کیا ہے کہ ”ہم نے کچھ لوگوں کو ٹارچر کیا ہے۔ سی آئی اے کا موقف ہے کہ ان طریقوں کی بدولت ہی القاعدہ کے نیٹ ورک کے بارے میں معلومات مل سکیں، جسکی وجہ سے امریکا اور اسکے شہریوں کی زندگیاں محفوظ ہوئیں۔دوسری جانب، وائٹ ہائوس کے ترجمان جوش ارنسٹ کا کہنا ہے کہ رپورٹ کے منظر عام پر آنے کے بعد دنیا بھر میں امریکی تنصیبات اور شہریوں کے لیے خطرات بڑھ جائیںگے، اسی بات کے پیش نظر امریکا نے احتیاطی اقدامات کرلی ہیں، اور امریکی سفارت خانوں کی سیکورٹی بڑھانے کی ہدایات جاری کردی گئی ہیں

ایمزٹی وی (سیاسی) وزیر اطلاعات سندھ شرجیل میمن کاکہنا ہے کہ عمران خان تصادم کی سیاست سے گریز کریں۔ ہم نہیں چاہیںگے کہ عمران خان کراچی میں زبردستی کاروبار بند کرائیں۔ ایم کیو ایم کے رہنما خواجہ اظہار الحسن کا کہنا ہے کہ کراچی بند کرنے کا فیصلہ خود عوام کریں گی۔ سندھ اسمبلی کے باہرمیڈیا سے گفتگو کرتے ہوئے وزیر اطلاعات شرجیل میمن نے کہا کہ (ن) لیگ کی قیادت کو پالیسی کو تبدیل کرنے کی ضرورت ہے۔ عمران خان بھی تصادم کی سیاست سے گریز کریں۔ انہوں نے کہا کہ سب جانتے ہیں کہ نیا پاکستان کا ماڈل عمران خان کیسا بنانا چاہ رہے ہیں۔ ایم کیو ایم کے رہنما خواجہ اظہارالحسن نے کہا کہ 12 دسمبر کو شہر بند کرنے کا فیصلہ کراچی کے عوام کریں گی۔ وزیر جیل خانہ جات منظور وسان نے کہا کہ عمران خان کو جذباتی ہونے کی ضرورت نہیں اور حکومت کو بھی ٹھنڈے دل سے مسئلہ حل کرنا چاہئے۔ منظور وسان نے کہا کہ اب تو حکومت میں واپسی کی جگہ نہیں لیکن ہوسکتا ہے کہ متحدہ ہم سے تعاون کرے جیسے اسلام آباد کی برسات ہوتی ہے پی پی پی اور متحدہ کے تعلقات بھی کبھی بنتے ہیں اور کبھی بگڑتے ہیں ۔

ایمزٹی وی (سیاسی) دہشت گردی کے تابوت میں آخری کیل ٹھوکنے کے لیے پاک فوج نے شمالی وزیرستان میں آپریشن شروع کیا۔ مقامی لوگ بھی دہشت گردوں سے لا تعلق ہوکر نقل مکانی کرگئے، اب ان آئی ڈی پیز کے ریلیف، بحالی اور تعمیر نو کے لیے اقدامات کیے جا رہے ہیں۔ 15 جون 2014ء کو پاک فوج نے شمالی وزیر ستان میں آپریشن ضرب عضب کا آغاز کیا اور پے درپے 90 فیصد علاقے کو دہشتگردوں سے پاک کردیا۔ اس آپریشن اور متاثرہ علاقوں کے آئی ڈی پیز کے لیے اب تک وفاقی حکومت 26 ارب روپے جاری کرچکی ہے۔ ہم نے اب تک کوئی ساڑھے 26 ارب روپے دے دیئے ہیں اور یہ ریلیف کے کاموں کے لیے ہیں۔ یہ رقم اپنے وسائل سے دی ہے کیونکہ ہم نے یہ فیصلہ کیا تھا کہ ریلیف کا کام اپنے طور پر کریںگے۔ آئی ڈی پیز کی اپنے علاقوں میں واپسی اور جنگ سے متاثرہ علاقوں کی تعمیر نو کے لیے، حکومت نے امدادی ملکوں اور اداروں کی ایک ڈونر میٹنگ بھی کی۔ اس میٹنگ میں این ڈی ایم اے، پی ڈی ایم اے، اقتصادی امور ڈویژن اور دیگر متعلقہ حکام نے بریفنگ دی اور ڈیڑھ ارب ڈالر کی ضروریات اجاگر کیں، جسمیں 70 کروڑ ڈالر، کے وعدے بھی ہوگئے۔ جب تک آپریشن مکمل نہیں ہوجاتا اور نقصانات کا جائزہ لینے والی سروے ٹیم ان علاقوں کا دورہ کرکے رپورٹ نہیں بنالیتی اس وقت تک تعمیر نو کے لیے اصل مطلوبہ رقم کا اندازہ لگانا مشکل ہوگا۔ وزارت اقتصادی امور کے حکام کا کہنا تھا کہ آپریشن ضرب عضب، آئی ڈی پیز کی آبادی کاری اور سیلاب متاثرین کے لیے تقریباً دو ارب 30 کروڑ ڈالر کی ضرورت ہے۔ پاکستان نے پہلے مرحلے میں ریلیف کا کام اپنے وسائل سے کیا ہے تاہم ابھی متاثرہ علاقوں میں اسکول، اسپتال، طبی مراکز، سڑکیں، پل اور دفاتر کا قیام عمل میں لانا ہے اور اس کے لیے عالمی برادری کا ساتھ، ضروری ہوگا ۔