ایمزٹی وی (لاہور) تحریکِ انصاف کےسربراہ عمران خان آج الیکشن ٹریبونل لاہورکے روبرو بیان ریکارڈ کرائیںگے۔ انہوں نےاین اے 122 میں انتخابی دھاندلی کو چیلنج کررکھا ہے۔ الیکشن کمیشن پنجاب کے دفتر کے باہر پی ٹی آئی اور مسلم لیگ (ن) کے کارکن جمع ہوچکےہیں۔ جوایک دوسرے کی قیادت کے خلاف نعرے بازی کر رہے ہیں۔ الیکشن ٹریبونل لاہور کے روبرو این اے 122 میں انتخابی دھاندلی کیس کی سماعت ہو رہی ہے۔ تحریکِ انصاف کےسربراہ عمران خان آج اپنا بیان رکارڈ کرائیںگے۔ انہوں نے اسپیکر قومی اسمبلی سردار ایاز صادق کے خلاف انتخابی دھاندلی کی پٹیشن دائر کر رکھی ہے۔ گزشتہ سماعت کےدوران عمران خان کے گواہوں نے بیانات ریکارڈ کرائے تھے۔ عمران خان کی آمد کےموقع پر الیکشن کمیشن پنجاب کے دفتر کے باہرسیاسی درجہ حرارت بڑھ چکا ہے، پی ٹی آئی کے کارکنوں کے علاوہ مسلم لیگ (ن) کے کارکن بھی وہاں پہنچ چکےہیں اور انکے درمیان مخالفانہ نعرے بازی جاری ہے، پولیس کی بھاری نفری بھی وہاں موجود ہے ۔
ایمزٹی وی (کھیل) 8 ٹیمیں ٹرافی پانے کیلیے کوشاں نظر آئیں گی، پاکستانی ٹیم پہلا میچ بیلجیئم کیخلاف کھیلے گی،اسی روز پول اے میں آسٹریلیا کا مقابلہ انگلینڈ سے ہوگا۔ دوسرے پول میں میزبان بھارت کا جرمنی سے میچ شیڈول ہے، نیدر لینڈز اورارجنٹائن کی ٹیمیں بھی مدمقابل ہوں گی۔ پاکستانی کپتان محمد عمران حریف ٹیم کو کسی بھی صورت کمزور تصور نہیں کرتے،انھوں نے کہاکہ ہماری قوت کھلاڑیوں کا یکجا ہو کر کھیلنا ہے،ہم فاتحانہ آغازکیلیے پُرامید ہیں۔
تفصیلات کے مطابق ورلڈ کپ اور اولمپکس کے بعد دنیائے ہاکی کے تیسرے بڑے ایونٹ چیمپئنز ٹرافی کیلیے8 ممتاز ٹیمیں ہفتے سے بھارتی شہر بھوبنیشورمیں مقابل ہوں گی، پاکستان کوپول اے میں ورلڈ چیمپئن آسٹریلیا، انگلینڈ اوریورپیئن چیمپیئن شپ کی سلورمیڈلسٹ بیلجیئم کا چیلنج درپیش ہوگا، پول بی میزبان بھارت، اولمپک گولڈ میڈلسٹ جرمنی، نیدرلینڈز اورارجنٹائن پرمشتمل ہے۔ چیمپئنز ٹرافی میں آسٹریلیا کو سب سے زیادہ 13 مرتبہ ٹائٹل جیتنے کا اعزاز حاصل ہے جبکہ پاکستان نے3 بار کارنامہ سرانجام دیا۔گرین شرٹس نے گذشتہ ایڈیشن میں کانسی کا تمغہ جیت کر براہ راست اس ایونٹ کیلیے کوالیفائی کیا تھا۔جمعے کو ٹرافی کی تقریب رونمائی ہوئی جس میں تمام کپتان شریک ہوئے۔
بعد ازاں مختلف اوقات میں ٹریننگ سیشنز کا انعقاد ہوا۔ دریں اثنا پاکستانی ہاکی ٹیم کے کپتان کی نظریں محمد عمران کی نظریں چیمپئنز ٹرافی کے پہلے میچ پر مرکوز اور وہ بیلجیئم کو زیر کر کے فاتحانہ آغاز چاہتے ہیں۔ پریکٹس میچ میں کامیابی سے کھلاڑیوں کے حوصلے خاصے بلند ہو گئے، البتہ کوچ کی طرف سے ہدایات ملی ہے کہ اس کامیابی کو بھول کر صرف بیلجیئم سے مقابلے پر توجہ دیں۔ محمد عمران نے کہا کہ پاکستانی ٹیم گزشتہ ڈیڑھ برس سے کسی بھی یورپی ٹیم کے خلاف نہیں کھیلی، اس لیے جیتنا آسان نہیں ہوگا تاہم تمام پلیئرز ایک یونٹ کی مانند کھیلے تو ایسا ممکن ہے۔
ایمزٹی وی (بنوں) بنوں میں مقیم شمالی وزیرستان سے نقل مکانی کرنے والا خاندان جسمیں خاتون سمیت چار افراد نابینا ہیں۔ ان افراد کو شناختی کارڈ میں دہرے پتے درج ہونے کی وجہ سے راشن اور دیگر سہولیات کے حصول میں مشکلات کاسامنا ہے۔ شمالی وزیرستان سے نقل مکانی کرنے والے خاندان جسمیں تین افراد اور ایک خاتون نابینا ہے، اس خاندان کو ڈبل ایڈریس کی وجہ سے نہ تو راشن مل رہا ہے اور نہ ہی موبائل سیم کے ذریعے رقم مل سکی ہے۔ ان افراد کو فلاحی اداروں کی طرف سے جو تھوڑی امداد مل رہی ہے وہ کافی ہے۔ ان افراد کا کہنا ہے کہ انہیں اپنے علاقے میں واپس جانا ہے۔ موسم تبدیل ہونے اور نا کافی سامان کی وجہ سے انکی پریشانیاں مزید بڑھ گئی ہیں ۔
ایمزٹی وی (کھیل) قومی کرکٹ ٹیم کے ہیڈ کوچ کا کہنا تھا کہ کھیل کے تینوں فارمیٹس میں سرفراز کی کارکردگی عمدہ رہی، وہ اپنے خول سے باہر نکلتے ہوئے قدرتی کھیل پیش کرنے کی کوشش کررہا ہے، وہ ایک اسٹروک میکر ہے اور اپنے شاٹس تب ہی کھیل سکتا ہے جب اس کو آزادی مل جائے، یا دباؤ بہت کم ہو، میرے خیال میں ان دونوں صورتوں میں ہر کوئی زیادہ بہتر کھیل پیش کرسکتا ہے۔ ان کا کہنا تھا کہ ہم نے سرفراز کو اپنا قدرتی کھیل پیش کرنے کا بھرپور موقع فراہم کیا، وہ پاکستان کے لئے اچھا ثابت ہوا، اسے اپنی صلاحیتوں کا بھرپور مظاہرہ کرنا چاہیئے۔
وقار یونس نے کہا کہ احمد شہزاد نے بھی گذشتہ کئی سیریز میں اچھا پرفارم کیا لیکن بدقسمتی سے کیویز کیخلاف ٹیسٹ میں اس کے سرپر گیند لگ گئی، وہ ہمارے بہترین اوپنرز میں سے ایک ہے، ہم اسے نظرانداز نہیں کرسکتے، خاص ون ڈے میں اس کی اہمیت اپنی جگہ ہے، انھوں نے کہا کہ اگر سرفراز بطور بیٹسمین اپنا کردار نبھانا جاری رکھتا ہے تو اس سے پاکستان کرکٹ کو بہت فائدہ پہنچے گا، ہمارے لیے ایسا وکٹ کیپراچھا ہے جو بیٹنگ میں بھی معاون ثابت ہو، کوچ نے مزید کہا کہ وہاب ریاض اور عمر گل کی موجودگی سے ہمیں بولنگ کے شعبے میں بھی مزید آپشنز میسر آگئے۔
ایمزٹی وی (لاہور) نشان حیدر حاصل کرنے والے پاک فوج کے میجر شبیرشریف شہید کا آج 44 واں یوم شہادت منایا جارہا ہے۔ لاہور کے میانی صاحب قبرستان میں جنرل آفیسر کمانڈنگ فدا حسین اورمیجر جنرل سجاد علی نےآرمی چیف جنرل راحیل شریف کی طرف سے میجر شبیرشریف شہید کی قبر پر پھول چڑھائے اور فاتحہ خوانی کی۔ میجر شبیر شریف شہید 28 اپریل 1943 کو گجرات کے قصبے کنجاہ میں پیدا ہوئے تھے۔ میجر شبیر شریف شہید نے 1971ء کی جنگ میں سلیمانکی کے محاذ پر جام شہادت نوش کیا ۔
ایمزٹی وی (تھر) تھر کے صحرا میں خشک سالی کے عفریت نے پہلے علاقہ مکینوں کی خوشیاں نگلیں اور اب جینے کی امید بھی باقی نہ چھوڑی ۔ تھر کے قحط زدہ علاقوں سے ’’تھرواسیوں‘‘ کی نقل مکانی جاری ہے۔ اکثر مقامات پر متاثرین سڑک کنارے بیٹھے امداد کے منتظر ہیں۔ بارش کی امید پر کاشت کئے جانے والے کھیتوں میں بھی کچھ باقی نہیں رہا ہے۔ ایک بوڑھا کسان کھیت میں اپنی سوکھ کر تباہ ہونے والی فصل کو بڑی حسرت سے دیکھ رہا ہے۔ تھر کی ریتیلی دھرتی میں بارش کی امید پر اس نے اناج کا جو بیج بویا تھا، وہ پروان نہ چڑھ سکا۔ بارشیں نہ ہوئیں اور زرخیز زمین سے پھوٹنے والی فصل سوکھ کر گھاس پھونس میں تبدیل ہو گئی۔ تھر میں زندگی کا پہیہ بارش پر چلتا ہے۔ تھر کی ریتیلی دھرتی بارش کی بوند کے بدلے زندگی بخشتی ہے۔ مون سون کی آمد باجرہ، مونگ اورگوار اورتل کی پیدوار کے لئے تھری عوام زور و شور سے تیاریاں شروع کردیتے ہیں۔ لیکن اب کے بارش ہوئی اورنہ ہی فصل میسر آئی۔ علاقہ مکینوں کاکہنا ہے کہ ان سوکھی فصلوں کو دیکھکر ان کی تمام امیدیں بھی دم توڑ گئی ہیں ۔
ایمزٹی وی (کھیل) چیئرمین شہریار خان کے مطابق پہلے ہی باؤنسرز کو محدود کیا جا چکاہے، بالکل ختم کرنے سے کھیل کا حسن ماندپڑجائے گا۔ انھوں نے ڈومیسٹک کرکٹ میں بیٹسمینوں کے حفاظتی اقدامات کا ازسرنو جائزہ لینے پر غورکا عندیہ دیا۔ چیئرمین پی سی بی باؤنسرز پر پابندی کی تجویز سے متفق نہیں، یہ کھیل کا حصہ ہیں، انھیں پہلے ہی محدود تو کر دیا گیا اب پابندی لگانا مسئلے کا حل نہیں ہوگا۔
ایک سوال پر شہریار خان نے کہا کہ ہیوز کے انتقال کا ہمیں بھی بے حد افسوس ہے، ہم ڈومیسٹک کرکٹ میں بیٹسمینوں کے حفاظتی اقدامات کا ازسرنو جائزہ لینے پر غور کریں گے، آئی سی سی کی بھی اس حوالے سے جو ہدایات ہوئیں ان پر مکمل عمل کیا جائے گا، ویسے اس طرح کے واقعات برسوں میں شازونادر ہی ہوتے ہیں، ہمارے ملک میں بھی چند پلیئرز کی کھیلتے ہوئے موت ہو چکی ہے۔ پاکستانی کپتان مصباح الحق کی جانب سے شارجہ ٹیسٹ میں شکست کی ایک وجہ ہیوز کے انتقال کو قرار دینے پر چیئرمین بورڈ نے کہا کہ یہ تو وہی بہتر جانتے ہیں، ویسے کرکٹ فیلڈ میں اتنے خطرناک واقعے کا پلیئرز پر کچھ نہ کچھ اثر تو پڑنا ہی تھا، آہستہ آہستہ ہی اثر زائل ہو گا۔
آسٹریلوی ٹیسٹ اسٹار فل ہیوز کی ڈومیسٹک میچ کے دوران باؤنسر لگنے سے انتقال کے بعد بعض حلقوں کا یہ مطالبہ سامنے آیا کہ باؤنسرز پر ہی پابندی عائد کر دی جائے مگر پاکستان اس کا سخت مخالف ہے۔
ایمزٹی وی (تجارت) (اے پی پی) وفاقی وزیر برائے تحفظ خوراک سکندر حیات بوسن نے کہا ہے کہ حکومت سندھ کا سال 2014-15ء کے لئے گنے کی قیمت کا نیا نوٹیفکیشن کاشتکاروں کے ساتھ صریحاً زیادتی ہے جن سے کسانوں کے معاشی مسائل میں اضافہ ہو گا۔ وفاقی وزیر نے کہا کہ سال 2014-15ء کے لئے گنے کی قیمتیں حکومت پنجاب نے 180روپے فی چالیس کلوگرام جبکہ حکومت سندھ نے 182روپے فی چالیس کلوگرام مقرر کی تھیں، مگر حکومت سندھ کا گنے کی قیمت 155روپے فی چالیس کلو گرام کا تقرر غیر منصفانہ اور زیادتی ہے اور میں سمجھتا ہوں کاشتکار برادری کو یکسر نظرانداز کر کے یہ فیصلہ کیا گیا ہے۔ انہوں نے اپنے بیان میں کہا کہ وہ حکومت سندھ سے مطالبہ کرتے ہیں کہ گنے کی قیمتوں کا پرانا نوٹیفکیشن فوری طور پر بحال کیا جائے۔ سکندربوسن نے کہا کہ آج 6 دسمبر کی تاریخ ہو چکی ہے مگر شوگر ملز نے ابھی تک کرشنگ کا عمل شروع نہیں کیا جو کہ زیادتی ہے اور ایسے تاخیری حربوں سے کسانوں کی مشکلات میں اضافہ اور انکی معاوضے کی ادائیگی میں تاخیر کا سامنا کرنا پڑے گا جو کہ غیر مناسب ہے۔ وفاقی وزیر نے انتباہ کرتے ہوئے آگاہ کیا کہ برآمدات کے لئے چینی ان ملوں سے لی جائیگی جو کرشنگ کا عمل بروقت شروع کریگی اور کسانوں کو معاوضے کی ادائیگی بھی بروقت یقینی بنائیں گی ۔
ایمزٹی وی (تجارت) (آئی این پی) قومی اسمبلی میں اپوزیشن اور حکومتی ارکان نے گنے، کپاس، چاول اور دیگر فصلوں کی مارکیٹ میں ارزاں نرخوں پر فروخت اور حکومت کی طرف سے اعلان کی گئی قیمت پر عمل درآمد نہ ہونے پر حکومت کو شدید تنقید کا نشانہ بنایا (ن) لیگ کے رضا حیات ہراج اور سرداراویس خان لغاری نے قائمہ کمیٹی فوڈ سکیورٹی کی رپورٹ پر ایوان میں بحث نہ کرانے پر احتجاج کرتے ہوئے کہا کہ کمیٹی نے گنے کی قیمت 180 روپے مقرر کی لیکن آج مارکیٹ میں جب خریداری شروع ہونے پر مل مالکان سندھ میں 155 روپے اور پنجاب میں 150 روپے پر گنا خرید رہے ہیں۔ ڈپٹی سپیکر نے کپاس، چاول اور گنے کی امدادی قیمتوں کے تعین کا معاملہ دوبارہ متعلقہ قائمہ کمیٹی کو بھجوانے کے احکامات دے دیئے، پارلیمانی سیکرٹری برائے نیشنل فوڈ سکیورٹی رجب بلوچ نے کہا کہ فصلوں کی قیمتیں طے کرنا اور ان پر عمل درآمد کرانا صوبائی حکومتوں کی ذمہ داری ہے۔ جمعہ کو قومی اسمبلی میں رضا حیات ہراج، اویس لغاری، شازیہ مری، نفیسہ شاہ، میرمنور تالپور، راؤ اجمل اور دیگر نے بھی خطاب کیا اور اہم ملکی ایشوز پر ایوان کی توجہ مبذول کرائی۔ رضا حیات ہراج نے کہا کہ زرعی اجناس کی قیمتوں کے تعین کے لئے ایوان کی کمیٹی بنائی گئی تھی۔ چیئرمین قائمہ کمیٹی نے پڑھے بغیر اسپردستخط کئے۔ رپورٹ میں کپاس اور دیگر متعلقہ ایشوز کا ذکر نہیں کمیٹی نے 180 روپے قیمت مقرر کی مگر 150 روپے پر فروخت ہورہا ہے۔ ڈپٹی اسپیکر نے معاملہ دوبارہ کمیٹی کو ریفرکردیا۔سردار اویس خان لغاری نے کہا کہ کپاس کی قیمت میں اضافے کے حکم پر عمل درآمد نہیں ہوا پنجاب میں آج 150 روپے پر گنے کی خریداری شروع ہوئی ہے فیصلوں پر عمل درآمد کون کرائے گا رجب بلوچ نے کہا کہ میں ارکان کی تائید کرتا ہوں لیکن کاٹن کی قیمت وزارت فوڈ سیکورٹی سے معتلقہ نہیں بلکہ قیمت مقرر کرانا اور عمل درآمد کرانا مرکز کی نہیں صوبوں کی ذمہ داری ہے۔ میر منظور تالپور نے کہا کہ سندھ میں بھی 155 روپے کے حساب سے گنا فروخت ہورہا ہے جو ظلم ہے۔ ( ن) لیگ کے راؤ اجمل نے کہا کہ اگر کسانوں سے زیادتی جاری رہی تو احتجاج کرینگے ۔
ایمز ٹی وی (فارن ڈیسک)
.تھائی لینڈ میں بادشاہ کی 87 ویں سالگرہ کے موقع پر آسمان رنگ برنگی روشنیوں سے سج گیا۔دارالحکومت بنکاک میں تھائی لوگوں نے محل کے سامنے ،شمعیں اٹھائے بڑی تعداد میں شریک ہوئے ۔اس موقع پر شاندار آتش بازی کا مظاہرہ بھی کیا گیا۔تھائی بادشاہ سالگرہ کی خوشیوں میں طبیعت کی خرابی کی وجہ سے عوام کے سامنے نہیں آئے،جس پر ہزاروں تھائی عوام اسپتال کے سامنے بھی پہنچے اور اپنے بادشاہ کو خراج عقیدت پیش کیا۔تھائی لینڈ میں بادشاہ کی سالگرہ کے دن کوفادرز ڈے کے طور پر منایا جاتا ہے اورچھٹی بھی ہوتی ہے