ایمز ٹی وی (اسلام آباد) اسلام آباد میں لاپتا افراد کمیشن میں پیشی کے بعد میڈیاسے بات کرتے ہوئےپیپلزپارٹی کے رہنما سینیٹررحمان ملک نے کہا ہے کہ پیپلزپارٹی مسلم لیگ (ن) کے نہیں بلکہ جمہوریت کے ساتھ ہے اور امید ہے نئے چیف الیکشن کمشنر ادارے میں موجود خامیاں دور کریں گے۔سینیٹر رحمان ملک کا کہنا تھا کہ الیکشن کمیشن نے اعتراف کیا کہ ہے کہ 9.3 ملین بیلٹ پیپرز باہر سے پرنٹ کرائے گئے لیکن اس کا کوئی جواز نہیں تھا تاہم اسے اس کا جواب دینا ہوگا اور نئے چیف الیکشن کمشنر کو اسے دیکھنا ہوگا، نئے چیف الیکشن کمشنر سردار محمد رضا سپریم کورٹ کے جج رہے ہیں ان کی ایمانداری پر کوئی سوال نہیں اٹھا سکتا اور امید ہے کہ وہ الیکشن کمیشن کی خامیوں کو دور کریں گے۔سینیٹر رحمان ملک کا کہنا تھا کہ جماعت اسلامی کے امیر سراج الحق نے بتایا کہ عمران خان حکومت سے بات کرنے کو تیار ہیں اگر ایسا ہے تو حکومت کو چاہیے کہ وہ فوری طور پر تحریک انصاف سے بات کرے، پیپلزپارٹی مسلم لیگ ن کے ساتھ نہیں بلکہ ملک میں جمہوریت کی حامی ہے۔

ایمزٹی وی (تجارت) انٹرنیشنل شنگھائی اپیرل فیبرکس ایگزبیشن میں شرکت کرنے والے نمائش کنندگان نے تمام سابقہ ریکارڈ توڑ دیئے ہیں۔ میسےفرینکفرٹ کے جاری کردہ اعلامیے کے مطابق اس مرتبہ انٹر ٹیکسٹائل شنگھائی اپیرل فیبرکس میں 3 ہزار 844 کمپنیوں نے شرکت کی۔ ان کمپنیوں کا تعلق 30 ممالک سے ہے جب کہ 93 مختلف ممالک کے 71 ہزار 138 افراد نے نمائش کا دورہ کرکے ایک نیا ریکارڈ قائم کیا ہے۔ اس ٹریڈ فیئر میں شرکت کے لحاظ سے پہلے 10 ممالک میں امریکا، تائیوان، روس، انڈونیشیا، برطانیہ، جاپان، ہانگ کانگ، کوریا، چین اور انڈیا شامل ہیں۔ پاکستان سے اس نمائش میں فیبرکس، ڈینم یا انکی 42 کمپنیوں نے شرکت کی۔ ڈینم میں شرکت کرنے والوں کی تعداد پہلے کی نسبت زیادہ رہی۔ مقامی کمپنی کے نیرعالم کا کہنا ہے کہ ڈینم کو پہلے کی نسبت خریدار بھی زیادہ ملے۔ ہمیں یورپ امریکا سے اعلیٰ معیار کے خریدار ملے ہیں۔ ایک دوسری کمپنی کے عامر حسین کا کہنا ہے کہ ڈینم کے لئے علیحدہ ہال کا تجربہ اچھا رہا ہے۔

ایمزٹی وی (فارن ڈسک) پاکستانی سفارت خانے کے زیراہتمام چاولوں کی ایک نمائش کا اہتمام کیا گیا، اس نمائش کے انعقاد کا مقصد فرانسیسی مارکیٹ میں پاکستانی چاول کو فروغ دینا تھا۔ سفارت خانے کے احاطے میں ہونے والی اس نمائش کو خوبصورتی سے آراستہ کیا گیا تھا جسمیں ایک ممتاز فرانسیسی شیف الیان اسرال نے باسمتی چاول سے تین مختلف فرانسیسی ڈشیں تیار کیں۔ پاکستان کی روایتی ڈشیں بریانی، زردہ اور کھیر وغیرہ بھی پیش کی گئیں جنہیں پاکستانی شیف نے تیار کیا تھا۔ اس موقع پر باسمتی اوردیگر چاولوں کی مختلف اقسام بھی اس نمائش میں رکھی گئیں۔ ایک گلوکار نے مہمانوں کیلئے کلاسیکی اور فوک گانے بھی گائے۔ نمائش میں شرکت اور پاکستانی ایکسپورٹرز سے ملاقات کیلئے متعدد فرانسیسی اور پاکستانی درآمد کنندگان کو مدعو کیا گیا تھا۔ قبل ازیں سفارت خانے نے چاول کے درآمد و برآمد کنندگان کے درمیان کاروباری تجاویز پر تبادلہ خیال کیلئے ملاقاتوں کا اہتمام بھی کیا۔ پاکستان سے فرانس کیلئے چاول کی درآمدات جنوری تا ستمبر 2014 کے دوران 31.72 ملین ڈالر رہیں ۔

 ایمز ٹی وی (اسلام آباد) وزارت داخلہ نے دہشتگردی سے ہونے والے نقصان سے متعلق قومی اسمبلی میں اپنی رپورٹ پیش کردی جس کے مطابق دہشتگردی کیخلاف 10 سالہ جنگ کے دوران 50 ہزار پاکستانی شہریوں نے جان کی قربانی دی جب کہ اس دوران ملک کو 80 ارب ڈالر کا نقصان ہوا۔اسپیکر قومی اسمبلی ایاز صادق کی زیر صدارت قومی اسمبلی کے اجلاس کے دوراناسحاق ڈارنے دہشتگردی سے ہونے والے نقصانات اورمعاوضے کی تفصیلات ایوان میں پیش کی جس کے مطابق دہشتگردی کیخلاف 10سالہ جنگ میں 50 ہزارشہریوں نےجان کی قربانی دی جب کہ اس دوران ملک کو80ارب ڈالرکانقصان ہوا۔ 2008 سے 2012 کے دوران خیبرپختونخوا میں 968،بلوچستان میں 369اور فاٹا میں 647 افراد دہشتگردی میں جاں بحق ہوئے جبکہ زیارت ریزیڈنسی حملے میں 142 ملین روپے کا نقصان ہوا۔رپورٹ کے مطابق سندھ میں شہیداورزخمی ہونیوالوں کیلیے28.9 ملین روپے معاوضہ منظورکیاگیا جبکہ خیبرپختونخوا میں نقصانات کیلیے45.33 ملین روپے، بلوچستان میں جاں بحق افراد کے لواحقین کو 481 ملین، فاٹا میں شہید اور زخمیوں کیلئے495.06 ملین روپے کا معاوضہ منظور کیا جبکہ نقصانات کے ازالے کے لئے 17 ہزار 364 ملین روپے معاوضہ منظور کیا گیا۔