ایمز ٹی وی(انٹرٹینمنٹ) سال 2016 بات کی جائے تو دنیا بھر کے لیے کچھ خاص خوشگوار ثابت نہیں ہوا، اور کچھ ایسے نوجوان بھی ہیں جنہوں نے اس سال کے چند ناخوشگوار واقعات کو ملانے کا فیصلہ کیا اور اسے ایک اصل فلم کی شکل دے دی۔
فرینڈ ڈاگ نامی اسٹوڈیو کے برائن ہوتھر، بین اوگزیار اور سیتھ میچی نے کلاسک ہارر فلموں کے طریقے کار کو اپناتے ہوئے 2016 کے لیے ایک ٹریلر تیار کیا، جسے دیکھ کر یقیناً کوئی بھی ڈر سکتا ہے۔
اس ٹریلر میں 2016 میں ہونے والے کئی ناخوشگوار ایونٹس کو شامل کیا گیا، جن میں امریکا کے شہر سنسناٹی کے چڑیا گھر میں نایاب نسل کے گوریلا کو گولی مارنے سے ڈونلڈ ٹرمپ کے امریکا کے صدر منتخب ہونے تک کے واقعات شامل ہیں۔
اس ٹریلر کی شروعات ایک جوڑے اور چند دوستوں سے ہوئی، جو نئے سال یعنی 2016 کے آغاز کا جشن منا رہے ہوتے ہیں، تاہم ساتھ ساتھ ایسا بھی پیش کیا جاتا ہے، جیسے ان کی یہ خوشی زیادہ وقت کے لیے برقرار نہیں رہتی۔
ٹریلر میں مزید دکھایا گیا کہ ایک کمرے میں مقبول اداکار جین وائلڈر، گلوکار پرنس، گلوکار ڈیوڈ بووئی اور باکسنگ لیجنڈ محمد علی کی تصاویر دیوار پر اس انداز سے لگی ہیں، جیسے کوئی اپنے ’اہداف‘ کی تصاویر لگاتا ہے، واضح رہے کہ ان تمام شخصیات کا انتقال اسی سال ہوا ہے۔
فلم میں موجود کرداروں کو جلد ہی اس بات کا احساس ہونے لگا، جیسے ان کے ساتھ کچھ غلط ہورہا ہے، اس دوران وہ کسی کو مدد کے لیے کال بھی نہیں کرسکتے کیونکہ ان کے فون میں ان کے ہاتھوں میں ہی دھماکا ہوجاتا ہے، واضح رہے کہ رواں سال سام سنگ فونز میں صارفین کو اس قسم کے مسائل کا سامنا کرنا پڑا تھا۔