ایمز ٹی وی( صحت) کمشنر راولپنڈی طلعت محمود گوندل نے ہدایت کی ہے کہ انسداد پولیو مہم کو معاشرتی ذمہ داری سمجھتے ہوئے تمام محکمے اور پولیو ورکرز ذمہ داری سے اپنے فرائض سرانجام دیں کیونکہ آئندہ نسلوں کو صحتمند مستقبل فراہم کرنے کیلئے ملک بھر سے پولیو کا خاتمہ ناگزیر ہے۔ 30

اکتوبر سے شروع ہونیوالی انسداد پولیو مہم میں مقررہ 5سال سے کم عمر 8لاکھ 18ہزار 590بچوں کو حفاظتی قطرے پلوانے کا ہدف مکمل کرنے کیلئے تمام تر انتظامات کئے جائیں اور روزانہ کی بنیا د پر کارکردگی رپورٹ ڈی سی آفس بھجوائی جائے۔

وہ گزشتہ روز ڈپٹی کمشنر آفس میں جائزہ اجلاس سے خطاب کر رہے تھے جس میں چیف ایگزیکٹو آفیسر ہیلتھ ڈاکٹر فیاض بٹ، ڈسٹرکٹ آفیسر ہیلتھ ڈاکٹر عبدالجبار، چوہدری محمد حسین، الائیڈ ڈیپارٹمنٹس اور دیگر متعلقہ افسران نے شرکت کی۔ طلعت محمود گوندل نے کہا کہ پانچ روزہ انسداد پولیو مہم کیلئے 217یوسی ایم اوز سپروائزر‘ 448ایریا انچارج‘ 2181موبائل ٹیمیں‘ 287ہیلتھ فسیلٹیز سنٹر اور 137ٹرانزٹ پوائنٹس مقرر کئے گئے ہیں۔