ایمزٹی وی(ریاض)سعودی عرب نے ایک ہزار فلسطینی شہداء اور قیدیوں کے اہل خانہ کو سرکاری اخراجات پر حج کرانے کا انتظام کیا ہے۔
عرب میڈیا کی رپورٹ کے مطابق سعودی شاہ سلمان کی خصوصی ہدایت پر فلسطینیوں کے ساتھ جذبہ خیرسگالی کے تحت فلسطینی شہداء اور اسیران کے ایک ہزار لواحقین حج کے لیے انتظامات مکمل کرلیے گئے ہیں۔
شاہ سلمان کے خصوصی حج پروگرام کے سیکرٹری جنرل عبداللہ المدلج نے میڈیا سے گفتگو کرتے ہوئے بتایا کہ سعودی حکومت نے رواں سال ایک ہزار فلسطینی شہداء اور قیدیوں کے اہل خانہ کو سرکاری اخراجات پر فریضہ حج ادا کرانے کا اہتمام کیا ہے۔ شاہ سلمان کی طرف سے حج امور کے ذمہ داران کو ہدایت کی گئی ہے کہ وہ فلسطینی شہداء اور اسیران کے اہل خانہ کو ہرممکن سہولت فراہم کریں اور ان کے لیے بہترین رہائش ، ٹرانسپورٹ اور دیگر ضروریات مہیا کی جائیں۔
عبداللہ المدلج کا کہنا تھا کہ خادم الحرمین کی طرف سے خصوصی حج اسکیم شروع کیے جانے کے بعد اب تک 15000 فلسطینی سعودی عرب کی میزبانی میں فریضہ حج ادا کرچکے ہیں۔