ایمز ٹی وی (مانیٹرنگ ڈیسک) انڈیا کے دارالحکومت دہلی کی فضا کو صاف کرنے کے لیے امریکہ انڈیا اور سنگاپور کے سائنسداں ایک نادر تجربہ کر رہے ہیں۔

امریکہ کی معروف یونیورسٹی ایم آئی ٹی میں ایروناٹیکل انجینیئر اور فضائي آلودگی کے سائنسداں موشے المارو نے  بتایا کہ اس تجربے سے دنیا بھر میں سموگ میں کمی لانے کی نئی ٹیکنالوجی کامیابی کے ساتھ رائج کی جا سکتی ہے۔
انھوں نے بتایا کہ اس میں ناکارہ یا ریٹائرڈ طیاروں اور جیٹوں کے انجن کا استعمال کیا جائے گا اور اس سے دوسرے بہتیرے اخراج کرنے والے نظام میں بہتری لائی جا سکے گی۔

دہلی اس تجربے کے لیے مناسب جگہ ہو سکتی ہے جہاں تقاریب اور تہواروں میں پٹاخوں کا کثرت سے استعمال ہوتا ہے، شہر کے غریب کوڑے کرکٹ جلاتے ہیں، شہر کے مضافات میں فصلوں کی جڑوں کو جلایا جاتا ہے، گاڑیوں کے اخراج اور تعمیرات کے دھول گرد ہیں جس سے دہلی کی فضا گدلی نظر آتی ہے۔

جاڑوں میں تو حالات مزید خراب ہو جاتے ہیں۔ گذشتہ ماہ تو حالات بہت خراب ہو گئے تھے، سموگ کی وجہ سے اسکول بند کر دیے گئے، تعمیرات پر پابندی لگا دی گئی، لوگ ماسک پہننے پر مجبور ہو گئے اور بعض جگہ تو انھیں گھر سے ہی کام کرنے کے لیے کہا گيا۔

ایسے اقدامات اس لیے کیے گئے کہ پھیپھڑوں کو متاثر کرنے والے ذرات پی ایم 2۔5 عالمی صحت کی تنظیم کے معیار سے 90 گنا اور انڈیا کی وفاقی حکومت کے معیار سے 15 گنا زیادہ ہو گئی تھی۔

یہ تجربہ دہلی میں کوئلے سے چلنے والے بجلی گھر میں کیا جائے گا اور ایک ریٹائرڈ جیٹ انجن کو وہاں ٹریلر پر رکھا جائے گا۔ اس تجربے کے اخراج کا منہ آسمان کی جانب ہو گا اور انجن دھواں نکلنے کے پاس رکھ کر چلایا جائے گا۔

انجن کے چلنے سے اخراج کی رفتار 400 میٹر فی سیکنڈ ہو گی جو کہ تقریباً آواز کی رفتارکے برابر ہو گئی۔

اس ترکیب سے بجلی گھر کے اخراج کو زیادہ اونچائی پر پہنچایا جا سکے گا۔ اتنی اونچائی پر کہ وہ ٹھنڈا ہو کر سموگ نہ بن سکے۔

یہ ایگزاسٹ انجن ایک چمنی کی طرح کام کرے گا اور سموگ کو کھینچ کر اسے یہاں کی فضا سے باہر کر دے گا۔

خیال رہے کہ دہلی دنیا کے ان چند شہروں میں ہے جس کی فضا زہریلی قرار دی گئی ہے۔ ریاست کے وزیراعلیٰ نے تو اسے 'گیس چیمبر' سے تعبیر کیا تھا۔
اطلاعات کے مطابق ایک طیارے کے جیٹ انجن کے ذریعے ایک ہزار میگا واٹ والے بجلی گھر کے اخراج سے نمٹا جا سکتا ہے۔

ایمز ٹی وی(انٹرٹینمنٹ) مشہور گلو کار فرحان سعید اور معروف اداکارہ اور وی جے عروہ حسین کی شادی کی تقریبات شروع ہو گئیں ،پہلی ڈھولکی کی تقریب کی تصویروں نے سوشل میڈ یا پر دھوم مچادی ۔

یہ مشہور جوڑی 18دسمبر کو شادی کے بندھن میں بندھنے جارہی ہے ،پہلی ڈھولکی کی تقریب کی تصویریں عروہ حسین نے اپنے سوشل میڈ یا اکاﺅنٹ پر شیئرکیں جنہیں مداحوں کی جانب سے خوب پسند کیا گیا ۔تصویروں میں عروہ حسین کے بہن ماورا حسین اور فرحان سعید موجود ہیں جو کافی خوشگوار موڈ میں دکھائی دے رہے ہیں ۔

گزشتہ روز ان کے دوستوں نے شادی سے قبل ڈھولکی کی محفل سجائی اور شادی کے گیت گا کر اپنی خوشی کو بھرپور انداز میں منایا۔

گلوکاری کے میدان میں قدم رکھنے والی عروہ حسین کی شادی کا دعوت نامہ بھی گزشتہ دنوں منظر عام پر آیا اور دونوں کی جانب سے مدعو کئے گئے افراد کو اس دلکش کارڈ کے ساتھ چاکلیٹس بھی بھیجی گئیں۔

واضح رہے کہ گزشتہ ماہ کی 21تاریخ کو فرحان سعید نے عروہ کو پیرس کے مشہور ایفل ٹاور کے سامنے خاصے رومانوی انداز میں ہیرے کی انگوٹھی پیش کرتے ہوئے شادی کی پیشکش کی تھی جسے عروہ نے بخوشی قبول کیا ۔

ایمزٹی وی(اسلام آباد) ورلڈ بینک نے سندھ طاس معاہدے پر پاکستان اور بھارت کی طرف سے دائر درخواستوں پر عمل درآمد روکنے کا اعلان کرتے ہوئے کہا ہے کہ دونوں ممالک جنوری کے اختتام تک کسی طریقہ کار پر متفق ہو جائیں۔

بھارت سندھ طاس معاہدے کی خلاف ورزی کرتے ہوئے دریائے سندھ پر کشن گنگا اور رتلی ڈیم تعمیر کررہا ہے، پاکستان کی جانب سے اس معاملے پر کئی مذاکراتی ادوار ہوچکے ہیں، رواں برس مذاکرات ناکام ہونے کے بعد پاکستان نے عالمی بینک سے ثالثی عدالت جب کہ بھارت نے غیر جانبدار ماہر کے تقرر کی درخواست کی تھی تاہم عالمی بینک نے دونوں درخواستوں پر عمل درآمد روک دیا ہے۔

ورلڈ بینک کی جانب سے جاری بیان کے مطابق بھارت کی طرف سے غیر جانبدار ماہر کی تقرری کی درخواست خارج جب کہ پاکستان کی ثالثی عدالت کے چئیرمین کی مداخلت کی درخواست پر بھی عارضی پابندی عائد کر دی گئی ہے۔

ورلڈ بنک نے کہا ہے کہ ادارے کی جانب سے عارضی اقدامات سندھ طاس معاہدے کے تحفظ کے لیے اٹھائے گئے ہیں تاکہ دونوں ممالک معاہدے کے تحت متنازع معاملات کا پرامن حل نکالیں، امید ہےپاکستان بھارت اس معاملے پر جنوری تک متفق ہوجائیں گے۔

ورلڈ بینک کے صدر جم یونگ کنگ کا کہنا ہے کہ امید ہے دونوں ممالک جنوری کے اختتام تک کسی طریقہ کار پر متفق ہو جائیں گے کیونکہ اگر دونوں ملکوں کی جانب سے معاہدے سے ہٹ کر متبادل حل کی کوشش کی گئی تو سندھ طاس معاہدہ غیر فعال ہوسکتا ہے۔
واضح رہے کہ پاکستان اور بھارت کے درمیان طے پانے والے سندھ طاس معاہدے میں عالمی بینک ثالث ہے۔

ایمزٹی وی(اسلام آباد) مشیر خارجہ سرتاج عزیز کا کہنا ہے کہ گوادر پورٹ سے بلوچستان میں ترقی کا دروازہ کھلے گا اور سی پیک سے بلوچستان کی ترقی اور وہاں اقتصادی سرگرمیوں میں اضافہ ہوگا۔

اسلام آباد میں سی پیک کے موضوع پر منعقدہ تقریب سے خطاب کرتے ہوئے مشیر خارجہ سرتاج عزیز نے کہا کہ پاکستان کا سی پیک میں کردار اپنی ترجیحات کے مطابق ہے، سی پیک کے راستہ خودکفالت سے ہمیں سستی توانائی میسر ہوگی اور انفراسٹرکچر سمیت کے کے ایچ کی بحالی میں بھی مدد ملے گی، گوادر پورٹ سے بلوچستان میں ترقی کا دروازہ کھلے گا اور سی پیک سے بلوچستان کی ترقی اور وہاں اقتصادی سرگرمیوں میں اضافہ ہوگا۔ ان کا کہنا تھا کہ ہر صوبے کو سی پیک سے متعلق تجارتی زون قائم کرنے کا کہا گیا، اس منصوبے سے لاکھوں افراد کا روزگار وابستہ ہوگا اور ہر سال 5 سے 6 ارب ڈالر کی اضافی سرمایہ کاری کی توقع ہے۔

سرتاج عزیز نے کہا کہ سی پیک صرف چین نہیں دیگر کئی ممالک کو منسلک کریگی، سی پیک تزویراتی اعتبار سے چین اور یورپ کے فاصلے کو کم کرے گا جب کہ چین اور روس یورو ایشیا کے قدیم روڈ کی بحالی کے بھی خواہشمند ہیں۔ انہوں نے کہا کہ سی پیک میں 36 ارب ڈالرز کے منصوبے سافٹ قرضے ہیں، کچھ چینی کمپنیاں بجلی و توانائی کے پلانٹ بھی لگائیں گی جب کہ ٹیکسٹائل کے علاوہ ہماری برآمدی صنعت زیادہ فعال نہیں لہذا سی پیک سے ہماری برآمدی صنعت پر مثبت اثر مرتب ہو گا۔

سرتاج عزیز نے کہا کہ سی پیک سے فائدہ اٹھانے کے لیے چند اصلاحات کرنا ہوں گی، ہمیں انڈسٹریل پارک بنا کر بھی فائدہ اٹھانا ہے، ہمیں اس بات پر انحصار نہیں کرنا چاہیے کہ چینی یہاں آ کر کام کریں لہذا اداروں کو متحرک کرنا ہے تاکہ وہ ماہرافرادی قوت تیار کریں۔

ایمزٹی وی(اسپورٹس) بھارت نے انگلینڈ کو ممبئی ٹیسٹ میں اننگز اور 36 رنز سے شکست دے کر 5 میچوں کے سیریز 0-3 سے اپنے نام کرلی۔
بھارت نے ممبئی ٹیسٹ میں انگلینڈ کو اننگز اور 36 رنز سے شکست دے کر 5 ٹیسٹ میچوں کی سیزیز 0-3 سے اپنے نام کرلی جب کہ ایک ٹیسٹ میچ اب بھی باقی ہے جو 16 دسمبر کو چنئی میں کھیلا جائے گا، دونوں ٹیموں کے درمیان راجکوٹ میں کھیلا گیا تیسرا میچ بغیر کسی نتیجے کے ختم ہوگیا تھا۔

ممبئی ٹیسٹ میں انگلش کپتان السٹر کک نے ٹاس جیت کر پہلے بیٹنگ کا فیصلہ کیا اور پہلی اننگز میں اوپنر کیٹن جیننگز کی سنچری کی بدولت انگلش ٹیم نے 400 رنز بنائے جس کے جواب میں بھارتی ٹیم نے کپتان ویرات کوہلی کے 235 ، مرلی وجے اور جیانت یادیو کی سنچریز کی بدولت 631 رنز بنائے اور انگلینڈ پر 231 رنز کی برتری حاصل کی جو وہ پورا نہ کرسکے، انگلینڈ کی پوری ٹیم دوسری اننگز میں 195 رنز پر پویلین لوٹ گئی، بھارت کی جانب سے اسپنر ایشون نے 6 وکٹیں حاصل کیں جب کہ ویرات کوہلی کو ڈبل سنچری بنانے پر مین آف دی میچ سے نوازا گیا۔
واضح رہے کہ انگلینڈ اس وقت بھارت کے دورے پر ہے جہاں وہ 5 ٹیسٹ میچز کے علاوہ 3 ایک روزہ اور 3 ہی ٹی ٹوئنٹی میچز کھیلے گی۔

ایمز ٹی وی( صحت)موسم سرما میں ہماری جلد کو بے شمار مسائل کا سامنا کرنا پڑتا ہے۔ سرد اور خشک ہوائیں جلد کو کھردرا اور خشک بنا دیتی ہیں ۔ موسم سرما میں خشک سردی کے باعث خواتین اپنی اسکن کے لیے فکرمند ہوجاتی ہیں، خشک سردی سے بچنے کے لیے انہیں کیا کیا جتن کرنے پڑتے ہیں۔

سردی کے موسم میں اکثر خواتین کو جلد خشک ہونے کی شکایت ہوتی ہے جس سے جلد بری طرح متاثر ہوتی ہے۔

ماہرین نے اس کی وجہ رات کو میک اپ صاف کیے بغیر سوجانا یا پھر غیرمعیاری کاسمیٹکس کا استعمال بتایا ہے۔

فیشن ماڈلز کا کہنا ہے کہ شوبز سے وابستگی کی وجہ چہرے پر ہر وقت میک اپ رہتا ہے اور کام ختم ہونے کے بعد میک اپ واش کرنے کے لیے بھی مختلف چیزیں استعمال کی جاتی ہیں جو جلد پر اثرانداز ہوتی ہیں۔

سردیوں میں جلد خشک ہونے کی ایک وجہ پانی کا کم استعمال بھی ہے، میک اپ آرٹسٹ ایسے میں گلوس میک اپ کو ترجیح دیتے ہیں۔

کبھی کبھار حساس جلد پر یہ خشکی اس قدر ہوتی ہے کہ جلد کی سطح پر اس کی خشک تہہ سی ہوتی ہے جو جھڑنے لگتی ہے۔ نتیجتاً جلد پر خراشوں اور جھریاں بننے کا عمل تیز ی سے بڑھنے لگتا ہے، جلد کی ایسی خراب اور حساس صورت حال میں کسی بھی قسم کا میک اپ کرنا غیر ضروری ہو جاتا ہے۔ اس لیے میک اپ سے پہلے اس بات کا خصوصی خیال رکھیں کہ جلد صحت مند ہو، تاکہ میک اپ کے بعد وہ اچھا تاثر قائم کرے۔

ایمزٹی وی(اسپورٹس) ہسپانوی فٹبال کلب رئیل میڈرڈ کے پرتگالی فٹبالر کرسٹیانو رونالڈو نے چوتھی بار بہترین فٹبالر کا اعزاز اپنے نام کرلیا ہے۔

غیرملکی خبررساں ادارے کے مطابق منفرد اسٹائل کے ذریعے فٹبال شائقین کو متوجہ کرنے والے معروف فٹبالر کرسٹینا رونالڈو نے چوتھی بار بیلن ڈی اور ایوارڈ اپنے نام کرلیا ہے۔ رونالڈو نے سخت مقابلے کے بعد اپنے روایتی حریف ارجنٹینا کے لیونل میسی کو مات دے کر یہ اعزاز اپنے نام کیا ہے، لیونل میسی بیلن ڈی اور ایوارڈ 5 بار جیت چکے ہیں اور گزشتہ برس بھی یہ اعزاز ان کے نام ہی رہا تھا تاہم اس بار بیلن اور ایوارڈ کے لئے دنیا بھر کے 173 صحافیوں نے 31 سالہ پرتگالی کھلاڑی رونالڈو کو اس ایوارڈ کا حق دار قرار دیا۔

کرسٹیانو رونالڈو نے گزشتہ سیزن کے چیمپئنز لیگ میں اپنے کلب ریئل میڈرڈ کو کامیابی دلانے میں اہم کردار ادا کیا تھا اور اپنے ملک پرتگال کی یورو 2016 کی فتح میں بھی 3 گول کرکے کلیدی کردار ادا کیا تھا۔

واضح رہے کہ بیلن ڈی اور ایوارڈ 1956 سے ہر سال دیا جاتا رہا ہے لیکن گزشتہ 6 برسوں سے اس کا اشتراک فیفا کے ساتھ تھا اور 2009 میں اس ایوارڈ کو متعارف کرائے جانے کے بعد سے لے کر اب تک ارجنٹینا کے لیونل میسی اور پرتگال کے کرسٹیانو رونالڈو کے علاوہ کوئی بھی دنیا کا تیسرا کھلاڑی یہ ایوارڈ حاصل نہیں کرسکا۔ کرسٹینا رونالڈو یہ ایوارڈ 2008، 2013 ، 2014 اور 2016 میں اپنے نام کرنے میں کامیاب رہے ہیں۔

ایمزٹی وی(پشاور) آرمی چیف جنرل قمر جاوید باجوہ کا کہنا ہے کہ دہشت گردوں اور ان کے سہولت کاروں میں گٹھ جوڑ ہر صورت ختم کریں گے

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے کور ہیڈ کوارٹرز پشاور کا دورہ کیا جہاں کورکمانڈر پشاور لیفٹیننٹ جنرل ہدایت الرحمان نے ان کا استقبال کیا جب کہ پاک فوج کے سربراہ نے کور ہیڈ کوارٹر پشاور میں پورا دن گزارا۔

اس موقع پر انہیں فاٹا، خیبرپختونخوا اور مالاکنڈ ڈویژن میں سیکیورٹی آپریشن پربریفنگ دی گئی۔ ترجمان کے مطابق آرمی چیف نے بارڈر مینجمنٹ پر پیشرفت کا جائزہ لیا جب کہ تعمیراتی کاموں، سرحد پرایف سی کی کارکردگی کی تعریف کی اور ایف سی کی صلاحیتوں میں بہتری لانے کی ہدایت کی۔
ترجمان پاک فوج کا کہنا تھا کہ آرمی چیف نے اب تک کے آپریشن میں حاصل کامیابیوں کو سراہتے ہوئے کہا کہ علاقے میں قیام امن ، ترقیاتی کاموں کے لیے پاک فوج ، قبائل شانہ بشانہ رہیں گے جب کہ پاک فوج فاٹا بھر میں ترقیاتی کاموں سے متعلق قبائلی عوام کے ساتھ ہے۔ جنرل قمر جاوید باجوہ نے انٹیلی جنس بنیادوں پر کومبنگ آپریشنز جاری رکھنے کی ہدایت کرتے ہوئے کہا کہ دہشت گردوں کے درمیان روابط ختم کرنے کے لیے بہتر بارڈر مینجمنٹ ضروری ہے جب کہ دہشت گردوں اور ان کے سہولت کاروں میں گٹھ جوڑ ہر صورت ختم کریں گے۔

آرمی چیف نے پاک افغان بارڈر پر دہشت گردوں کی غیرقانونی نقل وحرکت کو روکنے اور چوکیوں کی تعمیر کا کام تیز کرنے کی ہدایت دیتے ہوئے کہا کہ قیام امن کے لیے پاک افغان بارڈر کے دوسری جانب دہشت گردوں کی سرگرمیوں پر نظر رکھنا ہوگی۔ انہوں نے کہا کہ قبائلی علاقوں کے متاثرین کی باعزت اور بروقت واپسی اور متاثرین کی بحالی کے لیے سماجی انفراسٹرکچرمیں بہتری کو یقینی بنایا جائے کیوں کہ فاٹا میں قیام امن اور خوشحالی سے پورے خطے کو فائدہ ہوگا۔

ایمزٹی وی(اسلام آباد) حادثے کا شکار طیارے کی تحقیقات کے لئے فرانسیسی ٹیم اسلام آباد پہنچ گئی ہے۔
ذرائع کے مطابق فرانس کی تحقیقاتی ٹیم حادثے کا شکار ہونے والے طیارے کی تحقیقات کےلئے اسلام آباد پہنچ گئی ہے۔ تحقیقاتی ٹیم 4 رکنی وفد پر مشتمل ہے جو آج حویلیاں کا دورہ کریں گے۔
تباہ ہونے والے اے ٹی آر طیارے کا بلیک باکس اور وائس ریکارڈ فرانس بھیجے جانے کا امکان ہے جہاں بلیک باکس کو ڈی کوڈ کیا جائے گا اور اس سے حاصل ہونے والے مواد کو اینی میشن کی شکل میں ڈھالا جائے گا۔ بلیک باکس اور وائس ریکارڈ کا ڈیٹا حاصل میچ کرکے حتمی رپورٹ تیار کی جائے گی
واضح رہے کہ گزشتہ ہفتے چترال سے اسلام آباد آنے والا پی آئی اے کا اے ٹی آر طیارہ حویلیاں کے قریب گر کر تباہ ہوگیا تھا جس کے نتیجے میں عملے سمیت 47 افراد جاں بحق ہوگئے تھے۔

ایمز ٹی وی ( انٹرٹینمنٹ) اگر تو آپ فاسٹ اینڈ فیوریس فلم سیریز کے پرستار ہیں تو اچھی خبر ہے کہ اس کی اگلی فلم کا پہلا مکمل ٹریلر ریلیز کردیا گیا ہے جو دلوں کی دھڑکنیں تیز کردے گا۔

جیسا گزشتہ دنوں یہ بات سامنے آئی تھی کہ فاسٹ اینڈ فیوریس سیریز کی 8 ویں فلم کو فیٹ آف دی فیوریس کا نام دیا گیا ہے جس کی شوٹنگ نیویارک میں ہوئی۔

ویسے تو کسی فلم کا 8 واں حصہ آرہا ہو تو لوگوں کے اندر اس کے لیے تھرل نہیں ہوتا جبکہ اسٹار پاور بھی ماند پڑتی نظر آتی ہے مگر فاسٹ اینڈ فیوریس سیریز کے معاملے میں ایسا نہیں۔

اب مکمل ٹریلر میں اس کی کہانی کی جھلک بھی سامنے آئی ہے جس کو دیکھ کر لگتا ہے کہ جیسے اس بار ڈوم (ون ڈیزل) ولن جیسے کردار میں نظر آئیں گے۔

اس فلم میں ڈوم کے دیگر ساتھی ایک پراسرار خاتون (آسکر ایوارڈ یافتہ چارلیز تھیرون) کے مدمقابل آئیں گے جبکہ ون ڈیزل اپنے ہی دوستوں کا سامنا کریں گے۔

فلم کے آفیشل پلاٹ کے مطابق ایک پراسرار خاتون ون ڈیزل کو جرائم کی دنیا میں لے کر آتی ہے اور اسے باہر نکلنے کا راستہ نہیں ملتا، جبکہ ڈوم کی دغا بازی کے باعث دیگر ساتھیوں کو ایسی آزمائش کا سامنا ہوتا ہے جو پہلے کبھی سامنے نہیں آئی تھی۔

یہ فلم 14 اپریل 2017 کو دنیا بھر میں ریلیز کی جائے گی، جس میں چارلیز تھیرون اور ون ڈیزل کے ساتھ ساتھ ڈیوائن دی راک جانسن اور جیسن اسٹاٹم اہم کرداروں میں نظر آئیں گے۔

خیال رہے کہ فاسٹ اینڈ فیوریس 7 نے دنیا بھر میں ڈیڑھ ارب ڈالرز سے زائد کا بزنس کیا تھا۔