ایمزٹی وی(اسلام آباد)چیئر مین پی آئی اے اعظم سہگل نے کہا ہے کہ طیارہ حادثے میں کوئی انسانی غلطی یا ٹیکنیکل ایرر دکھائی نہیں دیتا ،طیارے کا ایک انجن فیل ہوا جس کے باعث حادثہ پیش آیا۔

طیارہ حادثے کے بعد پریس کانفرنس کرتے ہوئے انہوں نے کہا کہ طیارے کو اے چیک کے بعد قابل پرواز ہونے کا سرٹیفکیٹ دیا گیا تھا ۔ان کا کہنا تھا کہ ائیر ٹریفک اب بھی سب سے زیادہ محفوظ سمجھا جاتا ہے ،ہم تسلیم کرتے ہیں ہمارا جہاز تھا ،ہمارے مسافر تھے لیکن حادثے میں انسانی غلطی کا کوئی امکان نظر نہیں آتا ۔چیئر مین پی آئی اے نے کہا کہ اے ٹی آر ایک فرانسیسی کمپنی کا بنا ہوا طیارہ ہے ،اس کی مینو فیکچرنگ میں کوئی خرابی نہیں ہے ،حادثے کا شکار طیارے کا بلیک باکس مل گیا ہے جسے ایس آئی بی کو بھجوائیں گے جہاں سے وہ ڈی کوڈ ہو کر واپس آئے گا ۔انہوں نے کہا کہ جب طیارے کی جانب سے مے ڈے کال دی گئی تو اس سے اندازہ ہوتا ہے کہ طیارے کا انجن فیل ہوا ہے ۔

ان کا کہنا تھا کہ حادثے کا شکار جہاز 2007میں تیار ہوا تھا اور اسی سال پی آئی اے میں شامل ہوا تھا ،جہازوں میں خرابیاں ہوتی رہتی ہیں اور انہیں دور بھی کیا جاتا ہے ،پی آئی اے سے یہ توقع نہ رکھی جائے کہ وہ خراب طیارے کو استعمال کرے گی ۔اعظم سہگل نے مزید کہا کہ اے ٹی آر طیارے سفر کے لیے انتہائی محفوظ سمجھے جاتے ہیں ،ہم پر امید تھے کہ ایک انجن پر طیارہ محفوظ لینڈنگ کر لے گا لیکن بد قسمتی سے ایسا نہ ہو سکا ۔

loading...

ایمز ٹی وی(صحت) خشک میوے خصوصاً بادام، اخروٹ، کاجو اور دیگرکئی امراض کو دور رکھنے کی حیرت انگیز صلاحیت رکھتے ہیں اور ان میں موجود فائبر، اینٹی آکسیڈنٹس، معدنیات اور دیگر اجزا زندگی کو طویل کرنے میں مددگار ہوتے ہیں۔

ماہرین نے اسی خاصیت کی بنا پر انہیں ’’سپرفوڈ‘‘ کا درجہ دیا ہے۔ اس ضمن میں امپیریل کالج لندن اور نارویئن یونیورسٹی آف سائنس اینڈ ٹیکنالوجی نے 29 اہم سروے، مطالعات اور تحقیقات کا بغور جائزہ لیا ہے۔ برٹش میڈیکل جرنل میڈیسن میں شائع ہونے والی حالیہ تحقیق کے مطابق خشک میوے امراضِ قلب، کینسر اور قبل از وقت موت کو دور کرنے میں مددگار ہوتے ہیں۔

ماہرین کے مطابق اگر کوئی باقاعدگی سے خشک میوہ جات کا استعمال کرتا ہے تو امکان ہے کہ وہ کینسر اور دل کی بیماریوں سے 22 فیصد تک بچ سکتا ہے۔ ماہرین نے مشورہ دیا ہے کہ اگر آپ صرف 20 گرام خشک میوے روزانہ کھاتے ہیں تو تمام اقسام کے کینسر کا خطرہ 15 فیصد ، دل کے امراض 30 فیصد اور سانس کے امراض میں 52 فیصد تک کمی واقع ہوسکتی ہے۔ اسی طرح انفیکشن سے پھیلنے والے امراض سے بھی 75 فیصد تک محفوظ رہا جاسکتا ہے۔ اس کی وجہ یہ ہے کہ میوے بلڈ پریشر قابو میں رکھتے ہیں، کولیسٹرول کو روکتے ہیں اس میں اینٹی آکسیڈنٹس کینسر سے بچاتے ہیں۔

ایمزٹی وی(اسلام آباد)حکومت نے سیکریٹری خارجہ اعزاز چوہدری کو امریکہ میں پاکستانی سفیر تعینات کرنے کی منظوری دے دی ۔

ذرائع کے مطابق حکومت نے اعزاز چوہدری کو امریکہ میں پاکستانی سفیر تعینات کرنے کی منظوری دے دی ہے جو اس وقت سیکریٹری خارجہ کے فرائض سرانجام دے رہے ہیں ۔
اعزاز چوہدری نے اقوام متحدہ میں چھ سال پاکستان کی نمائندگی کی ہے اور وہ بہت منجھے ہوئے سفارتکار سمجھے جاتے ہیں ۔

واضح رہے کہ امریکہ میں تعینات پاکستانی سفیر جلیل عباس جیلانی کی مدت ملازمت کچھ دنوں بعد پوری ہو جائے گی جس کے بعد اعزاز چوہدری جلد ہی اپنی ذمہ داریاں سنبھال لیں گے ۔مبصرین کا خیال ہے کہ امریکی ایڈمنسٹریشن کی تبدیلی کے بعد پاکستان کو بھی بہت سے ایشوز پر امریکہ سے ایک نئے سرے سے بات شروع کرنا ہو گی اور بات چیت کے ذریعے باہمی اختلافات کو دور کرنا ہو گا ۔

ان کا کہنا ہے کہ ٹرمپ ایڈمنسٹریشن کے ساتھ کام کرنے کے لیے اعزاز چوہدری کا کردار بہت اہمیت کا حامل ہے ۔

ایمزٹی وی(اسلام آباد) پاکستان انٹرنیشنل ایئر لائنز انتظامیہ نے طیارہ حادثے میں جاں بحق ہونے والے مسافروں کے ورثاءکو مالی امداد دینے کا اعلان کر دیا ۔
ذرائع کے مطابق پی آئی اے نے جاں بحق ہونے والے مسافروں کے لواحقین کو 5,5لاکھ روپے امداد دینے کا اعلان کر دیا ہے جبکہ انشورنش کے 50,50لاکھ روپے بعد میں دیے جائیں گے ۔

چیئرمین پی آئی اے اعظم سہگل نے اس حوالے سے اپنے بیان میں کہا ہے کہ پانچ لاکھ روپے میتوں کی تدفین کے سلسلے میں دے رہے ہیں تاہم مسافروں کی انشورنس کی مد میں 50،50لاکھ روپے بعد میں لواحقین کے حوالے کیے جائیں گے ۔

انہوں نے مزید کہا کہ پی آئی اے میتوں کے اخراجات بھی خود کریگی اور امدادی رقم جاں بحق افراد کے ورثاءکے گھروں میں جا کر دی جائے گی ۔
یاد رہے طیارہ حادثہ میں مذہبی اسکالر جنید جمشید اور انکی اہلیہ سمیت 48 مسافر جاں بحق ہوئے ہیں جن میں ڈپٹی کمشنر چترال ، انکی بیوی اور بیٹی بھی شامل ہیں ۔

ایمز ٹی وی(مانیٹرنگ ڈیسک) روبورٹس کو اب تک چلنے، پلٹنے، جھپٹنے اور دوڑنے تک کے قابل تو بنایا جاچکا ہے لیکن یہ پہلا موقعہ ہے کہ جب انجینئروں نے ایک ایسا روبوٹ بنالیا ہے جو نہ صرف چھلانگ لگاسکتا ہے بلکہ ہوا میں قلابازی بھی کھا سکتا ہے۔
یہ روبوٹ جسے ’’سالٹو‘‘ (SALTO) کا مختصر نام دیا گیا ہے، چھلانگ لگانے سے پہلے یہ کسی ایتھلیٹ کی طرح اپنی ٹانگیں سکیڑتا ہے اور پھر انہیں بڑی تیزی سے کھولتے ہوئے اونچی چھلانگ لگادیتا ہے۔

اس تجرباتی روبوٹ کا وزن صرف 100 گرام ہے جب کہ مکمل پھیلی ہوئی حالت میں اس کی لمبائی 10.2 انچ (26 سینٹی میٹر) ہے لیکن یہ اپنی موٹروں کی طاقت استعمال کرتے ہوئے 3.3 فٹ تک (ایک میٹر سے کچھ زیادہ) اونچی چھلانگ لگاسکتا ہے، یعنی یہ اپنے قد کے مقابلے میں تقریباً 4 گنا بلند چھلانگ لگانے کے قابل ہے۔ جب یہ ’’وال جمپنگ‘‘ کرتا ہے، یعنی اچھلتے دوران دیوار سے ٹکرا کر پلٹتا ہے تو اس کی چھلانگ اور بھی زیادہ اونچی ہو کر تقریباً 4 فٹ (1.21 میٹر) تک ہوجاتی ہے۔

یونیورسٹی آف کیلیفورنیا برکلے کے انجینئروں نے چھلانگیں لگانے والے مختلف جانوروں اور کیڑے مکوڑوں کا تفصیلی مشاہدہ کرنے کے بعد (اور ان ہی کی نقل کرتے ہوئے) یہ روبوٹ تیار کیا ہے۔ ان کا کہنا ہے کہ اس روبوٹ کے دھاتی عضلات اپنے اندر تناؤ کے طور پر توانائی محفوظ کرنے اور اسے تیزی کے ساتھ خارج کرتے ہوئے اونچی چھلانگ لگانے کے قابل ہیں جن کی بدولت اتنی طاقت پیدا ہوتی ہے جو صرف پٹھوں سے پیدا ہونے والی حرکی طاقت کے مقابلے میں 15 گنا زیادہ ہوتی ہے۔ ’’سالٹو‘‘ کے کرتبوں اور ہوا میں قلابازیوں پر مشتمل ایک ویڈیو بھی یونیورسٹی آف کیلیفورنیا برکلے نے جاری کی ہے۔

بنیادی طور پر اس روبوٹ کا مقصد زمین کے دشوار گزار راستوں پر تیزی سے حرکت کرنے والے عملی روبوٹس تیار کرنا ہے لیکن مستقبل میں مریخ اور دوسرے سیاروں پر بھیجے جانے والے خودکار مشنز میں بھی ایسے ہی بڑے روبوٹس سے استفادہ کیا جاسکے گا۔

ایمزٹی وی(تعلیم/ کراچی)وفاقی اردو یونیورسٹی کے ناظم امتحانات غیاث الدین احمد کے مطابق بی اے ، بی کام، معادلہ(مدارس اورہومیو پیتھک)پرائیویٹ کے امتحانی فارم جمع کرانے کی تاریخ میں 7دسمبرسے13دسمبر 2016تک توسیع کردی گئی ہے۔

امتحانی فارم الائیڈ بینک یونیورسٹی روڈگلشن اقبال اور عسکری بینک بوہرہ پیر روڈبرانچوںسے حاصل اور جمع کرائے جاسکتے ہیں۔ بی اے،بی کام(سال اول و دوم) مدارس اور ہومیو پیتھک کی امتحانی فیس2سو روپے ڈاک خرچ کے ساتھ 3ہزار5سو روپے جبکہ بی اے ، بی کام (مشترکہ) کی امتحانی فیس5ہزار2سو روپے اور امتحانی فارم کی قیمت 200 روپے مقرر کی گئی ہے

ایمزٹی وی(تعلیم) گورنر سندھ و چانسلر جسٹس (ر) سعید الزماں صدیقی نے سینئر پروفیسر ڈاکٹر خالد عراقی کو جامعہ کراچی میں دوسری مدت کے لئے ڈین فیکلٹی آف مینجمنٹ اینڈ ایڈمنسٹریٹو سائنسز مقررکردیا ہے۔ پروفیسر خالد عراقی کی بطور ڈین فیکلٹی آف مینجمنٹ کی مدت 5دسمبر 2016کو ختم ہو گئی تھی ۔

واضح رہے کہ صوبہ کی جامعات میں ڈین کی مدت تین برس ہوتی ہے ۔ یاد رہے کی ڈاکٹر خالد عراقی جامعہ کراچی کے وائس چانسلر کے عہدے کے لئے بھی امیدوار ہیں اور تلاش کمیٹی نے جامعہ کراچی کے وائس چانسلر کے عہدے کے لئے جن تین امیدواروں کا انتخاب کیا ہے اس میں ڈاکٹر عراقی کا پہلا نمبر ہے

ایمزٹی وی(تعلیم/ کراچی)اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے انٹرمیڈیٹ آرٹس ریگولر، آرٹس پرائیویٹ اور خصوصی امیدواروں کے سال اول کے سالانہ امتحانات برائے 2016ء کے نتائج کا اعلان کردیا ہے۔

نتائج کی تفصیلات بتاتے ہوئے محمد عمران خان چشتی نے کہا کہ ان امتحانات میں تقریباً اٹھارہ ہزار امیدواروں نے شرکت کی جبکہ تمام پرچوں میں کامیاب ہونے والے امیدواروں کی کامیابی کا تناسب تقریباً 32فیصد رہا۔

ایمزٹی وی(تعلیم/ اسلام آباد) امریکا کی بین الاقوامی شہرت یافتہ یونیورسٹی میں مسلمان ممالک سے تعلق رکھنے والی خواتین کے لیے بے نظیر بھٹو لیڈر شپ پروگرام کا آغاز کیا گیا ہے۔

غیر ملکی نشریاتی ادارے کے مطابق امریکا کی ہارورڈ یونیورسٹی میں بینظیر بھٹو کے ہم جماعت افراد کی تنظیم ’’کلاس اچیونگ چینج ٹو گیدر‘‘ نے مادر علمی میں مسلمان ممالک میں اعلیٰ عہدوں پر فائز ہونے والے افراد کے لیے خصوصی پروگرام تشکیل دیا ہے جس کا نام ’’بینظیر بھٹو لیڈرشپ پروگرام‘‘ رکھا گیا ہے، اس پروگرام میں 2018 سے لوگ شریک ہوں گے۔

کلاس اچیونگ چینج کا کہنا ہے کہ پروگرام کا مقصد خواتین کو بااختیار بنانا ہے اور اس میں مسلمان ممالک سے تعلق رکھنے والی خواتین کو ترجیح دی جائے گی۔ اس پروگرام کی تکمیل کے بعد ان خواتین سے توقع کی جائے گی کہ وہ اپنے ملک واپس جائیں اور پروگرام کے دوران سیکھی گئی باتوں سے سیاست یا سرکاری و نجی اداروں میں تبدیلی لائیں۔

ایمزٹی وی(چترال) چترال سے اسلام آباد آنے والی پی کے661حادثے کے شکار ہوگئی جس میں پاکستان کے معروف نعت خواں جنید جمشید بھی شامل تھے۔ 

 جنید جمشید نے سماجی ویب سائٹ پر اپنے آخری پیغام دیا جس میں ان کا کہنا تھا کہ " اللہ کی راہ میں اپنے دوستوں کے ساتھ ہوں" اور اپنے دوستوں کے پراہ تصاویر بھی جاری کیں۔

Heaven on Earth Chitral.
With my friends in the Path of Allah . Snowpacked Tirchmir right behind us pic.twitter.com/ZajcWEKlrG

— Junaid Jamshed (@JunaidJamshedPK) December 4, 2016