ایمز ٹی وی( تجارت) ملک میں اشیائے خوردو نوش دالوں، چاول، اور چینی کی گرتی ہوئی قیمتوں کے باوجود اوپن مارکیٹ میں چیزوں کی قیمتیں زیادہ ہیں۔ مہنگائی کے جن کو قابو کر نے کے حکومتی دعوے دھرے کے دھرے رہ گئے۔

حکومتی نرخ ناموں میں اشیائے خور دونوش کی قیمتیں بازار کی قیمتوں سے بالکل مختلف، دالیں ہوں سبزیاں گوشت یا پھل ہر چیز کی قیمت حکومت کی طے کردی قیمت سے زیادہ ہے۔

محکمہ نظامت زراعت پنجاب کی حالیہ رپورٹ کی کچھ اشیا کا موازنہ کریں تو دال ماش 184 روپے فی کلو جبکہ اوپن مارکیٹ میں 250 روپے، 20 کلو آٹے کا تھیلا 655 روپے جبکہ عام مارکیٹ میں 745 روپے، عالمی مارکیٹ میں چینی کی قیمت49 روپے جبکہ پاکستان میں سیزن کے باوجود چینی 70 سے 72روپے فی کلو تک فروخت ہو رہی ہے۔

دکانداروں نے سرکاری نرخنامہ رکھ دیے بالائے لیکن ان پر عمل نہیں کیا۔ مہنگائی کی ماری عوام کا کہنا ہے کہ مارکیٹ میں زیادہ تر دوکانوں پر حکومتی ریٹ لسٹ آویزاں ہی نہیں ہے۔

دوکاندار من مانی قیمت وصول کرتے ہیں، پرائس کنٹرول کمیٹی کہاں ہے؟ اور عام آدمی کو قیمتیں کم ہونے کا کیا فائدہ ہے۔

ایمزٹی وی(اسلام آباد)پاناما لیکس کیس میں جسٹس عظمت سعید نے کہا ہے کہ مریم نواز کے زیر کفالت ہونے کا معاملہ ابھی حل نہیں ہوا ہے ۔ذرائع کے مطابق سپریم کورٹ میں چیف جسٹس انور ظہیر جمالی کی سربراہی میں پانچ رکنی بینچ نے پاناما لیکس کیس کی سماعت کی ۔اس دوران جسٹس عظمت سعید نے وزیراعظم کے وکیل سلمان بٹ سے سوال کیا کہ وزیراعظم نے بیٹی کے لیے زمین کس سال خریدی ؟جس پر انہوں نے کہا کہ زمین 19اپریل 2011کو خریدی گئی ۔اس پر جسٹس عظمت نے کہا کہ ہمیں بھی پتہ ہے کہ اس زمین کے لیے ٹرانزیکشن میں کیا ہوا ،وزیراعظم نے تحفے میں رقم بیٹی کو دی ،عام طور پرسب ایسا ہی کرتے ہیں ۔انہوں نے کہا کہ وزیراعظم کی بیٹی نے زمین کے عوض یہ رقم وزیراعظم کو واپس کردی لیکن زیر کفالت ہونے کا معاملہ ابھی حل نہیں ہوا ۔

جسٹس عظمت سعید نے سوال کیا کہ مریم نواز کہاں رہتی ہیں جس پر سلمان بٹ نے کہا کہ مریم نواز جاتی عمرہ والے گھر میں رہتی ہیں جہاں اور بھی کئی خاندان رہتے ہیں ۔اس پر جسٹس عظمت نے استفسار کیا کہ کیا یہ زمین مریم نواز کے نام ہے ،مریم نواز کے رہن سہن کے اخراجات کہاں سے آتے ہیں ۔
اس پر وزیراعظم کے وکیل نے کہا کہ مریم نواز والد کے گھر رہتی ہیں مگر کفالت میں نہیں آتیں ،وہ قانونی طور پر شوہر کی کفالت میں ہیں ۔انہوں نے مزید کہا کہ مریم نواز کے شوہر کیپٹن ریٹائرڈ صفدر کے پاس 160کینال زرعی اراضی ہے ۔

ایمز ٹی وی (صحت) مشہور محاورہ ہے کہ ’ایک انار سو بیمار‘، دِکھنے میں یاقوت جیسے سرخ اور خوبصورت، رس بھرے انار دانوں کے ذائقے کا کوئی جواب نہیں۔

کھٹے میٹھے انار کے ان جگمگاتے دانوں کا یونانی اور ایرانی کھانوں میں استعمال عام ہے، ترکی کے لوگ انار کے رس کو سلاد میں ذائقہ بڑھانے کے لیے بھی استعمال کرتے ہیں اور گوشت کو بھی اس کے رس میں میرینیٹ کرکے پکایا جاتا ہے۔

پاکستانی کھانوں میں کھٹاس کا عنصر نمایاں کرنے کے لیے انار کے خشک دانوں یا ’اناردانہ‘ کا استعمال بھی طویل عرصے سے جاری ہے جبکہ تازہ انار کو فروٹ چاٹ میں شامل کیا جاتا یا پھر ایسے ہی اس کا لطف اٹھایا جاتا ہے۔

لیکن مختلف ذائقہ اور کِھلتا رنگ رکھنے والا یہ پھل سال کے چند مہینے ہی دستیاب ہوتا ہے اور شاید یہی وجہ ہے کہ کوکنگ کے شوقین افراد نے مختلف ڈشز میں انار دانے کو شامل کرنے کا کبھی نہیں سوچا۔

بیکنگ کی شوقین سحر حبیب نے اس ذائقے دار پھل کو نظرانداز نہیں کیا اور تین منفرد تراکیب میں انار کو شامل کرنے کا کامیاب تجربہ کیا ہے۔

یاد رہے کہ وٹامن سی کے اس ذریعے سے فائدہ اٹھاتے ہوئے ہاضمے کے لیے مفید اس کے بیجوں میں موجود فائبر کو کبھی نظرانداز نہ کریں۔

کیلے اور انار کی اسموتھی:

اجزا:

½ کپ انار کا رس

1 عدد کیلا

1 کھانے کا چمچ چینی

1 چٹکی نمک

½ کپ دہی

1 مٹھی برف

ترکیب:

تمام اجزا کو ایک ساتھ بلینڈ کریں اور پیش کریں۔

یہ اسموتھی 1 شخص کے لیے کافی ہے۔

چنے، فیٹا چیز اور انار کی سلاد:

اجزا:

400 گرام چنوں کا ایک کین (دھلے اور خشک کیے ہوئے)

1 کھیرا باریک چوکور ٹکڑوں میں کٹا ہوا

2 سے 4 کھانے کے چمچ فیٹا پنیر

⅓ سے ½ کپ انار کے دانے

¼ کالی مرچ پاؤڈر

¼ خشک اوریگانو

نمک حسبِ ذائقہ

ایک چائے کا چمچ لیموں کا رس

ایک کھانے کا چمچ زیتون کا تیل

ترکیب:

سرونگ ڈش میں چنوں کی تہہ بچھائیں، اس کے اوپر کھیرا، فیٹا پنیر اور انار کے دانوں کو پھیلادیں۔

کالی مرچ، نمک، اوریگانو، لیموں کا رس اور زیتون کا تیل شامل کریں اور سرو کریں۔

نوٹ: فیٹا چیز ذائقے میں نمکین ہوتی ہے اس لیے سلاد کو چکھنے کے بعد ہی اس میں نمک شامل کریں۔

یہ سلاد 2 سے 4 افراد کے لیے کافی ہے۔

چاکلیٹ اور انار بارز:

اجزا:

200 گرام ڈارک چاکلیٹ

⅓ کپ انار کے دانے

ترکیب:

ایک بڑی ٹرے پر فوائل یا ویکس پیپر کو بچھادیں۔

چاکلیٹ کو چھوٹے ٹکڑوں میں توڑ کر ایک بڑے گلاس کے پیالے میں ڈالیں اور اس پیالے کو گرم پانی سے بھرے پین پر رکھ دیں، اس بات کا خیال رکھیں کے چاکلیٹ والا پیالہ پانی سے نہ ٹکرائے۔

جب چاکلیٹ پگھل جائے تو اسے ٹرے پر ڈال کر 6 انچ کے اسکوائر تک پھیلادیں۔

چاکلیٹ تھوڑی ٹھنڈی ہوجائے تو اس پر انار کے دانے بکھیر دیں اور ہلکا سے پریس کریں۔

ٹرے کو فریج میں ٹھنڈا ہونے رکھ دیں۔

چاکلیٹ جم جائے تو اسے ٹکڑوں میں توڑ لیں۔

یہ ترکیب 4 افراد کے لیے کافی ہے۔

ایمزٹی وی(تعلیم/ کراچی) وزیرمملکت برائے تعلیم وپیشہ وارانہ تربیت محمدبلیغ الرحمن نے کہاہے کہ حکومت ملک میں تعلیم کے شعبے میں انقلابی اقدامات اٹھارہی ہے اورملک کے تمام تعلیمی اداروں میں قرآن پاک کی باترجمہ تعلیم لازمی قراردی گئی ہے۔

حکومت کی کوشش ہے کہ تعلیم کے شعبے میں مزیدبہتری لائی جائے اورتعلیمی اداروں کے فنڈزمیں مزیداضافہ کیاجائے ۔ان خیالات کااظہارانہوں نے ہمدردنونہال اسمبلی کے ماہانہ اجلاس سے خطا ب کرتے ہوئے کیا۔،صدارت قومی صدرنونہا ل اسمبلی سعدیہ راشدنے کی۔

ایمزٹی وی(برلن) جرمن چانسلر اینجلا مرکل نے حجاب کی مخالفت کرتے ہوئے کہا ہے کہ یہ جرمن معاشرے کے مطابق نہیں لہٰذا قانونی طور پر حجاب پر پابندی عائد کریں گے۔

جرمنی کے مغربی شہر ایسن میں اپنی جماعت کی سالانہ کانفرنس کے موقع پر اینجلا مرکل نے کہا کہ جرمن قوانین ہی سب سے بڑھ کر ہیں، جہاں تک قانونی طور پر ممکن ہو پورے چہرے کے حجاب پر پابندی عائد ہونی چاہیے۔ انہوں نے کہا کہ اس قانون کی رو سے عوامی مقامات، اسکولوں، جامعات اور سرکاری اداروں میں برقعے پر پابندی عائد کی جائے گی۔

اینجلا مرکل کے دستِ راست اور وزیرِ داخلہ تھامس ڈی میازیرے نے بھی رواں سال اگست کو برقعے پر مکمل پابندی کا سب سے پہلا اعلان کیا تھا۔ ان کا کہنا تھا کہ نہ صرف برقعہ بلکہ صرف آنکھوں کو ظاہر کرنے والے ہر قسم کے حجاب پر مکمل پابندی عائد ہونی چاہیے کیونکہ یہ جرمن معاشرتی اقدار کے خلاف ہے

تھامس ڈی میازیرے نے کہا کہ چہرہ ظاہر کرنا رابطے، معاشرتی میل جول اور باہمی وجود کے لیے ضروری ہے اور اسی لیے ہم ہر ایک سے کہہ رہے ہیں کہ وہ اپنا چہرہ ظاہر کریں، اس ضمن میں ایک قانون لایا جارہا ہے اور جو بھی اسے قانون کو توڑے گا اسے نتائج بھگتنا ہوں گے۔
واضح رہے کہ اینجلا مرکل گزشتہ 11 برس سے جرمنی کی چانسلر ہیں اور ان کا کرسچیئن ڈیموکریٹک یونین (سی ڈی یو) کی دوبارہ سربراہ منتخب ہونے کا امکان ظاہر کیا جارہا ہے۔

ایمز ٹی وی ( تجارت) کراچی میں تعینات امریکی قونصل جنرل مس گریس ڈبلیو شیلٹن نے کہا کہ میں امریکا اور پاکستان کے درمیان اقتصادی تعلقات کو مزید گہرا اور مضبوط دیکھنا چاہتی ہوں۔

کراچی چیمبرکے امریکا کے ساتھ دیرینہ تعلقات ہیں اور کے سی سی آئی نے دوطرفہ تجارتی تعلقات کومستحکم بنانے میں اہم کردار ادا کیا،یہ بات انہوں نےگزشتہ روز کو کراچی چیمبرکے دورے کے موقع پراجلاس میں تبادلہ خیال کرتے ہوئے کہی ۔

امریکی قونصل جنرل نے یقین دہانی کرائی کہ امریکی قونصلیٹ پاکستانی اور امریکی کمپنیوں کوسرمایہ کاری اور دیرپا تعلقات قائم کرنے کیلئے اپنا کردار ادا کرتا رہے گا۔

انہوں نے کہاکہ پاکستان سے زرعی تجارتی وفد اٹلانٹا میں منعقد ہونے والی ایک بڑی نمائش میں شرکت کیلئے بھیجاجائے گا جس کا موضوع‘‘ زراعت میں جدت’’ رکھا گیاہے ،کراچی چیمبر اس نما ئش میں شرکت کر کے زراعت کے کاروبار میں ہونے والی جدید ترقی کاجائزہ لے۔

ایمزٹی وی(آسٹریلیا)مہاجرین کے حقوق کیلیے کھل کر آوازبلند کرنے والا الیگزینڈر فان ڈیئر بیلین آسٹریا کے نئے صدر منتخب ہو گئے، وہ خود ایک مہاجرین خاندان کا پس منظر رکھتے ہیں۔

گزشتہ روز آسٹریا میں ہونے والے صدارتی انتخابات کے دوسرے اور حتمی مرحلے میں گرین پارٹی کے سابقہ رہنما اور ان انتخابات میں بہ طور آزاد امیدوار حصہ لینے والے الیگزانڈر فان ڈیئر بیلین کامیاب ہوگئے۔ بیلن اور ان کے عوامیت پسند حریف نوربیرٹ ہوفر کے درمیان متعدد دیگر امور کے علاوہ سب سے اہم فرق مہاجرین سے متعلق موقف میں تھا۔

نوربیرٹ مہاجرین کوقبضہ کرنے والے تک کہہ چکے ہیں اور مہاجرین کے حوالے سے سخت ترین پالیسیاں وضع کرنا چاہتے ہیں جب کہ دوسری جانب فان ڈیئر بیلین مہاجرین سے متعلق نرمی کی پالیسیوں کے داعی ہیں۔ماضی میں گرین پارٹی سے تعلق رکھنے والے اس سیاست دان کا اپنا پس منظر مہاجرت سے جڑا ہے۔

فان ڈیئر بیلین 1944ء میں پیدا ہوئے۔ ان کے والد روس جب کہ ان کی والدہ ایسٹونیا سے تعلق رکھتی تھیں، جب کہ فان ڈیئر بیلین کا ڈچ نام اس لیے ہے کیونکہ انکا خاندان اٹھارہویں صدی میں ہالینڈ سے روس منتقل ہوا تھا۔

ایمز ٹی وی(مانیٹرنگ ڈیسک) معروف کمپنی ہونڈا نے اپنی نئی کانسیپٹ گاڑی کی پہلی تصویر جاری کردی ہے۔

نیو وی نامی اس تجرباتی گاڑی کو اگلے سال کے آغاز میں لاس ویگاس میں ہونے والے ایک ایونٹ کے دوران باقاعدہ طور پر متعارف کرایا جائے گا۔

ہونڈا کے مطابق یہ گاڑی آٹو میٹڈ، الیکٹرک ہے اور اسے آرٹی فیشل انٹیلی جنس ٹیکنالوجی سے لیس کیا گیا ہے جسے ایموشن انجن کا نام دیا گیا ہے۔

کمپنی نے اس کے حوالے سے زیادہ تفصیلات تو جاری نہیں کیں تاہم اس کے بقول اموشن انجن ایسی ٹیکنالوجیز سے لیس ہے جو مشینوں کے 'جذبات' بناتی ہیں۔

یعنی یہ گاڑی کسی قسم کے مسئلے پر معاونت فراہم کرے گی اور بتائے گی کہ ٹینک میں ایندھن کتنا ہے وغیرہ وغیرہ۔

اسی طرح اینیمیٹڈ ڈیش بورڈ ٹریفک جام میں پھنسنے کی صورت میں ڈرائیور کو گاڑی کے اندر تفریح فراہم کرے گا۔

اب گاڑی کی تفصیلات تو اگلے ماہ سامنے آئیں گی تاہم تصویر کی جھلک نے لوگوں کو کافی متاثر کیا ہے اور وہ بے تابی سے اس کے سامنے آنے کے منتظر ہیں۔

جس کی وجہ گاڑی کا ڈیزائن کی انفرادیت ہے جو اسے مستقبل کی گاڑیوں کا روپ دیتا ہے۔

ایمزٹی وی(مانیٹرنگ ڈیسک) سام سنگ نے ایپل کے نقش قدم پر چلتے ہوئے اپنے اگلے فلیگ شپ اسمارٹ فون گلیکسی ایس ایٹ میں سے ہیڈ فون جیک کو نکالنے کا فیصلہ کیا ہے۔

سام سنگ سے متعلق رپورٹس سامنے لانے والی سائٹ سام موبائل کے مطابق اس فلیگ شپ فون میں نہ صرف ہیڈ فون جیک بلکہ ہوم بٹن کو بھی ختم کردیا جائے گا۔

ایپل نے بھی آئی فون سیون میں ہیڈ فون جیک کو نکال دیا تھا جو اقدام کافی متنازع بھی قرار پایا تھا جبکہ موٹرولا، ایچ ٹی سی وغیرہ نے اپنے اینڈرائیڈ فونز میں اس پورٹ کو ختم کیا۔

سام سنگ کو گلیکسی نوٹ 7 کی بیٹریاں پھٹنے کے مسئلے کے باعث اربوں ڈالرز کا نقصان ہوا جبکہ متعدد صارفین نے اس جنوبی کورین کمپنی سے بھی منہ موڑ لیا تھا۔

یہی وجہ ہے کہ گلیکسی ایس 8 کی کامیابی سام سنگ کے لیے بہت زیادہ اہمیت رکھتی ہے۔

اس فون میں یو ایس بی ٹائپ سی پورٹ چارجنگ اور موسیقی سننے کے لیے دی جاسکتی ہے جبکہ اسٹریو اسپیکرز بھی اس کا حصہ ہوسکتے ہیں۔

اسی طرح ہوم بٹن کو ہٹا کر فنگر پرنٹ سنسر امولیڈ ڈسپلے کا حصہ بن سکتے ہیں اور ایسا ہی کچھ ایپل اپنے اگلے سال کے آئی فون میں بھی کرنے کا سوچ رہی ہے۔

سام سنگ کی جانب سے فون کو پہلے سے پتلا اور بیٹری کو زیادہ طاقتور بھی بنایا جائے گا۔

عام طور پر گلیکسی ایس سیریز کے فون فروری میں بارسلونا میں ہونے والے ایونٹ موبائل ورلڈ کانگریس کے دوران متعارف کرائے جاتے ہیں تو یہ کہا جاسکتا ہے کہ یہ فون اب زیادہ دور نہیں۔

ایمزٹی وی (برازیل) برازیل میں شادی کے روز شوہر کو سرپرائز دینے والی خاتون ہیلی کاپٹر میں بیٹھ کر تقریب میں شرکت کرنا چاہتی تھی تاہم ہیلی کاپٹر تقریب گاہ سے کچھ دوری پر گر کر تباہ ہوگیا اور دلہن سمیت 4 افراد جان کی بازی ہار گئے۔

برازیل کے شہر ساؤ پاؤلو میں نیسمنٹو سلوا نامی خاتون اپنی شادی کے موقع پر ہیلی کاپٹر میں بیٹھ کر تقریب میں شرکت کرنے کی بچپن کی خواہش پوری کرنے کے ساتھ اپنے ہونے والے شوہر کو سرپرائز دینا چاہتی تھیں تاہم ہیلی کاپٹر شادی کی تقریب کے مقام سے کچھ دوری پر گر کر تباہ ہوگیا اور ہیلی کاپٹر میں سوال دلہن، اس کا بھائی، خاتون فوٹو گرافر اور پائلٹ ہلاک ہوگئے۔

خاتون کی شادی کی تقریب کا حصہ بننے والے 300 افراد میں سے صرف 6 لوگوں کو علم تھا کہ دلہن ہیلی کاپٹر کے ذریعے تقریب میں شرکت کریں گی تاہم تاخیر ہونے پر دلہا نے دلہن کو خود فون کیا تو کوئی جواب موصول نہ ہوا اور تشویش بڑھنے پر جب دلہن کے ہیلی کاپٹرسے آنے کا بھید کھلا تو معلوم ہوا کہ ہیلی کاپٹر تقریب کے مقام سے ایک میل کے فاصلے پر جنگل میں گر کر تباہ ہوگیا۔

حکام کے مطابق غالب امکان ہے کہ بارش اور دھند ہونے کے باعث ہیلی کاپٹر درخت سے ٹکرا کر گر کر تباہ ہوا تاہم نیشنل سول ایوی ایشن ایجنسی کا کہنا ہے کہ ہیلی کاپٹر کو یکم فروری 2017 تک استعمال کرنے کی اجازت تھی۔