ایمزٹی وی(جکارتہ)انڈونیشیا کے جزیرے سماٹرا میں 6.5 شدت کے زلزلے سے کم از کم 25 افراد ہلاک اور متعدد زخمی ہو گئے جب کہ کئی عمارتیں ملبے کا ڈھیر بن گئیں۔

امریکی جیولوجیکل سروے کے مطابق انڈونیشیا کے صوبے آچے کے جزیزے سماٹرا میں زیر زمین آنے والے زلزلے کی شدت ریکٹر اسکیل پر 6.5 ریکارڈ کی گئی جب کہ زمین میں اس کی گہرائی 17 کلو میٹر تھی۔ حکام کے مطابق زلزلے کے بعد آفٹر شاکس کا سلسلہ بھی جاری ہے جو کئی گھنٹوں تک جاری رہ سکتا ہے تاہم سونامی کی وارننگ جاری نہیں کی گئی۔

زلزلے کے باعث سب سے زیادہ متاثر ہونے والے ضلع پیدے جیا کے ڈپٹی چیف کا کہنا ہے کہ اسپتال سے حاصل کئے گئے اعداد و شمار کے مطابق اب تک 18 افراد کی ہلاکت کی تصدیق ہو چکی ہے جب کہ درجنوں زخمی ہیں جنہیں طبی سہولیات فراہم کی جا رہی ہیں۔ دوسری جانب انڈونیشیا کے نیشنل ڈیزاسٹر منیجمنٹ کے مطابق زلزلے کے باعث متعدد دکانیں اور عمارتیں تباہ ہوگئیں جس کے باعث درجنوں افراد پھنس گئے جنہیں ہیوی مشینری کی مدد سے باہر نکالا جا رہا ہے۔سوشل میڈیا پر جاری کئی گئی تصاویر میں دیکھا جا سکتا ہے کہ زلزلے کے باعث کئی عمارتیں، دکانیں، مندر اور بجلی کے کھمبے ملبے کا ڈھیر بن گئے ہیں۔

واضح رہے کہ 2004 میں انڈونیشیا کے جزیرے سماٹرا میں 9.2 شدت کے زلزلے کے نتیجے میں آنے والے سونامی نے ہر طرف تباہی مچا دی تھی اور صرف آچے صوبے میں ایک لاکھ 20 ہزار افراد ہلاک ہوئے تھے۔

ایمز ٹی وی( مانیٹرنگ ڈیسک) گوگل کا براﺅزر 'کروم' 2008 میں متعارف کرایا گیا تھا اور یہ بہت جلد ہی دنیا میں انٹرنیٹ کی سرفنگ کے لیے سب سے زیادہ استعمال ہونے والا پروگرام بن گیا جس نے فائر فوکس اور انٹرنیٹ ایکسپلورر کو بھی پیچھے چھوڑ دیا۔

مگر متعدد افراد اس میں چھپے چند اہم فیچرز سے واقف نہیں۔

درحقیقت متعدد ایسی ایکسٹینشنز اور پروگرامز موجود ہیں جو کروم کا استعمال زیادہ بہتر اور پرلطف بناتے ہیں۔

ان کے ذریعے آپ مضامین کو کہیں بھی پڑھنے کے لیے محفوظ کرسکتے ہیں، نئی زبان سیکھ سکتے ہیں اوراس کے علاوہ بھی بہت کچھ کرسکتے ہیں۔

اور ہاں اصل چیز تو یہ ہے کہ اس کے لیے آپ کو اضافی وقت یا رقم کی ضرورت بھی نہیں ہوتی۔

مضامین کو محفوظ کریں
پاکٹ کسی بھی مضمون کو محفوظ کرکے بعد میں پڑھنے کا سب سے آسان راستہ ہے، جسے فون، ٹیبلیٹ یا کمپیوٹر کہیں بھی پڑھا جاسکتا ہے، مثال کے طور پر آپ کسی ویب سائٹ یا مضمون کو اوپن کرتے ہیں مگر پڑھنے کا وقت نہیں تو پاکٹ ایکسٹیشن پر کلک کردیں، یہ اس کی لسٹ میں چلا جائے گا جس تک رسائی کسی بھی ڈیوائس سے ممکن ہوگی۔

نئی زبان سیکھیں
لینگویج امرسین ایک بہترین ایکسٹینشن ہے جو کہ انگلش کے الفاظ اور جملوں کو آپ کی منتخب کردہ زبان میں ترجمہ کرتا رہتا ہے، اس کی مدد سے آپ بغیر کسی مشکل کے نئی زبان کو سیکھنے کی مشق کرسکتے ہیں، چاہے اس وقت دفتر کا کوئی اہم کام ہی کیوں نہ کررہے ہوں۔

پینک بٹن
اگر آپ کے ارگرد کوئی ایسا فرد ہے جس کو آپ اپنے اوپن کردہ پیجز نہیں دکھانا چاہتے تو کروم بند کرنے کی بجائے پینک بٹن پر ہٹ کردیں، یہ ایک مفید ایکسٹیشن ہے جو کہ نہ صرف آپ کے کام کو دیگر افراد کی نگاہوں سے بچاتی ہے بلکہ یہ ان سائٹس کو ایک علیحدہ فولڈر میں بھی محفوظ کردیتی ہے جو آپ نے اوپن کررکھی ہوتی ہیں، جنھیں آپ بعد میں کسی بھی وقت اوپن کرسکتے ہیں۔

جی میل کی ای میلز پر نظر
گوگل میل چیکر اُن افراد کے فائدہ مند ہے جو روزانہ کافی مقدار میں ای میلز کرنے کے عادی ہوں، یہ ایکسٹیشن بہت سادہ اور استعمال میں آسان ہے جو جی میل کو اوپن کیے بغیر بتا دیتی ہے کہ آپ کو کتنی ای میلز موصول ہوچکی ہیں۔

اشتہارات کو بلاک کریں
ایڈبلاکر اشتہارات کو بلاک کرنے کے لیے مقبول ترین ایکسٹیشنز میں سے ایک ہے، یہ بینر اشتہارات اور پوپ اپ ونڈوز کو بلاک کرتی ہے اور یہ صارف کی مرضی ہوتی ہے کہ وہ کس حد تک اس طرح کا تجربہ برداشت کرسکتا ہے۔

بہت زیادہ ٹیبز کا درد سر
ون ٹیب ہر اس فرد کے لیے مفید ایکسٹیشن ہے جو بیک وقت متعدد ٹیبز اوپن کرتے ہیں، جس میں اپنے مطلوبہ پیج کو ڈھونڈنا مسئلہ بن جاتا ہے، مگر ون ٹیب انہیں ایک لسٹ کی شکل دے دیتی ہے اور انہیں وقت اور تاریخ کے لیے لحاظ سے منظم کرتی ہے، جبکہ اس سے کمپیوٹر کی میموری بھی زیادہ متاثر نہیں ہوتی۔

کروم ریموٹ ڈیسک ٹاپ
کروم ریموٹ ڈیسک ٹاپ جادوئی ایکسٹیشن قرار دی جاسکتی ہے جو آپ کو اپنے کمپیوٹر کے اندر دیگر کمپیوٹرز تک رسائی دیتی ہے، جیسے کوئی فائل دفتر بھول آئے ہیں تو ریموٹ ڈیسک سے کنکٹ کرکے اسے حاصل کرلیں۔

تصاویر کی شناخت
سرچ بائی امیج سے آپ آن لائن تصاویر کو آسانی سے شناخت کرسکتے ہیں، بنیادی طور پر یہ یہ گوگل امیجز جیسی ہی ایکسٹینشن ہے جو آپ کو کسی بھی تصویر کو گوگل سرچ کرنے میں مدد دیتی ہے، یہ مقامات کی شناخت یا گمنام جگہوں کے بارے میں جاننے کے لیے مفید ہے۔

موبائل کروم
کروم ٹو موبائل آپ کو کسی بھی جگہ دفتر کا کام کرنے میں مدد دیتی ہے، یہ ایکسٹیشن آپ کے ڈیسک ٹاپ براﺅزر کے تجربے کو اسمارٹ فون میں لائیو ویب پیجز اور ورک کی بدولت منتقل کرتی ہے، یہ آف لائن بھی کام کرتی ہے تو انٹرنیٹ کے بغیر بھی کارآمد ہے۔

گرامر کی غلطیوں سے بچیں
اگر آپ کو لگتا ہے کہ کچھ تحریر کرتے ہوئے گرامر کی کافی غلطیاں ہوسکتی ہیں تو گرامرلی نامی ایکسٹیشن آپ کے لیے ہے، یہ اسپیلنگ اور تحریر کے معیار کو بہتر بناتی ہے، یہ نہ صرف جی میل بلکہ سوشل میڈیا پر بھی کام کرتی ہے۔

ایمزٹی وی(اسلام آباد)پاکستان تحریک انصاف (پی ٹی آئی) کے رہنماءشاہ محمود قریشی نے کہا ہے کہ بہت جلد دودھ کا دودھ اور پانی کا پانی ہونے والا ہے۔

تفصیلات کے مطابق سپریم کورٹ میں پانامہ لیکس کی سماعت کیلئے آتے ہوئے صحافی نے عمران خان سے سوال کیا کہ سپریم کورٹ کی جانب سے پوچھے جانے والے 3 سوالات کی کیا اہمیت ہے جس پر عمران خان نے صرف اتنا ہی کہا کہ 3 سوالات کے علاوہ اور بھی سوالات ہیں۔

اس موقع پر صحافی نے عمران خان کے ہمراہ موجود شاہ محمود قریشی سے وہی سوال دہرایا تو انہوں نے کہا کہ سپریم کورٹ کے 3 سوالوں نے قلعی کھول دی ہے اور بہت جلد دودھ کا دودھ اور پانی کا پانی ہونے والا ہے

ایمز ٹی وی ( تجارت) فیڈرل بورڈ آف ریونیو (ایف بی آر) کی جانب سے انکم ٹیکس ترمیمی ایکٹ2016 بھی نافذالعمل ہوگیا۔ ایف بی آرکواس ایمنسٹی اسکیم سے بھاری وصولیاں ہونے کی توقع ہے۔

تفصیلات کے مطابق انکم ٹیکس ترمیمی ایکٹ 2016 نافذالعمل ہوگیا۔ پارلیمنٹ نے چندروزقبل منظوری دی تھی جس کے بعدصدرنے دستخط کردیے ہیں۔

مذکورہ ترمیمی ایکٹ کے نفاذسے چونکہ ریئل اسٹیٹ سیکٹرکیلیے کالے دھن کو سفید کرنے کے لیے ایمنسٹی اسکیم کا نفاذ ہوچکا ہے جس کے تحت غیر منقولہ جائیدادکی فروخت پر3 فیصد ٹیکس اداکرکے اسے قانونی حیثیت دلوائی جاسکتی ہے۔

یہ 3 فیصد ٹیکس فروخت ہونیوالی غیرمنقولہ جائیداد پراس کے ڈی سی ریٹ اورایف بی آر کی مقررکردہ قیمت کے درمیان پائے جانے والے فرق کی رقم پر اداکرناہوگا اوراس اسکیم سے جوکالا دھن سفیدکرایا جائیگا ۔

ایف بی آر نہیں پوچھے گا کہ یہ پیسہ پاس کہاں سے آیا۔ اسکیم کے نفاذسے ایف بی آر کو بھاری ریونیو اکٹھا ہونے کی توقع ہے۔ اس ایکٹ کے تحت شہدا کے خاندانوں کو ایک مرتبہ کیپیٹل گین ٹیکس میں رعایت دی گئی ہے۔

ایمزٹی وی(اسلام آباد) قومی اسمبلی میں قائد حزب اختلاف خورشید شاہ نے کہا ہے کہ پیپلز پارٹی کے 4 مطالبات ذاتی یا سیاسی فائدے کیلئے نہیں ہیں، حکمرانوں کو کشمیر کے معاملے پر واضح پالیسی دینی

تفصیلات کے مطابق خورشید شاہ نے کہا کہ پیپلز پارٹی کے 4 مطالبات ذاتی یا سیاسی فائدے کیلئے نہیں ہیں، ہم پارلیمینٹ میں پانامہ سمیت تمام مسائل حل کرنا چاہتے ہیں
۔
انہوں نے کہا کہ ہم جنگ نہیں چاہتے اور مسئلہ کشمیر کا حل کشمیریوں کی رائے کے مطابق نکالا جائے جبکہ حکمرانوں کو کشمیر کے معاملے پر واضح پالیسی دینی چاہئے۔

ایمزٹی وی(اسلام آباد) وزیر مملکت برائے پانی و بجلی عابد شیر علی کا کہنا ہے کہ پی ٹی آئی کا جھوٹ پوری قوم نے دیکھا جب کہ پی ٹی آئی اورشیخ رشید کی جھوٹی سیاست کا جنازہ سپریم کورٹ سے نکلے گا۔
سپریم کورٹ کے باہر میڈیا سے بات کرتے ہوئے وزیر مملکت برائے پانی و بجلی عابد شیر علی کا کہنا تھا کہ پاناما کیس کی روزانہ کی بنیاد پرسماعت کرنے کی درخواست کردی ہے جب کہ عدالت میں ہم نے واضح کیا کہ مریم نواز کا کسی چیز سے تعلق نہیں۔

عابد شیر علی کا کہنا تھا کہ سپریم کورٹ اخباری تراشوں پر کوئی فیصلہ نہیں کرے گی، پی ٹی آئی کا جھوٹ پوری قوم نے دیکھا کیونکہ انہوں نے کہا تھا ہمارے پاس ثبوت ہیں تو وہ ثبوت کہاں ہیں تاہم پی ٹی آئی اورشیخ رشید کی جھوٹی سیاست کا سپریم کورٹ میں جنازہ نکلے گا۔

ایمز ٹی وی(صحت) وزن گھٹانے اور موٹاپا کم کرنے کی خواہش اپنی جگہ لیکن اسے عملی جامہ پہنانا اکثر لوگوں کے لیے اتنا مشکل بلکہ ناممکن ثابت ہوتا ہے کہ وزن اور موٹاپا کم کرنا ان کی زندگی بھر کی حسرت بن کر رہ جاتا ہے۔

البتہ اگر آپ صرف ایک ہفتے کے لیے خود پر جبر، غیر صحت بخش اور غیر ضروری غذاؤں سے پرہیز کے ساتھ ساتھ ذیل میں دیئے گئے ڈائیٹ پلان پر سختی سے عمل کرسکیں تو صرف 7 دنوں میں آپ کا وزن 12 پونڈ تک کم ہوجائے گا۔

یہ ڈائیٹ پلان جس کا بڑا حصہ انڈوں پر مشتمل ہے بظاہر کچھ خاص دکھائی نہیں دیتا لیکن اس پر عمل کرکے آپ کو کمزوری بھی محسوس نہیں ہوگی کیونکہ یہ پروٹین، وٹامن اور دوسرے اہم غذائی اجزاء سے بھرپور ہے جن کی بدولت آپ سارا دن ہشاش بشاش رہتے ہوئے اپنا وزن کم کرسکیں گے۔ اور ہاں! اگر اسی ڈائیٹ پلان کے ساتھ روزانہ 30 منٹ سے ایک گھنٹے تک کی چہل قدمی کو بھی معمول کا حصہ بنالیں گے تو اس سے بھی زیادہ وزن گھٹانے میں کامیاب ہوجائیں گے۔

پہلے دن کا ڈائیٹ پلان:
ناشتہ: 2 ابلے ہوئے انڈے، 2 سنگترے، ایک کپ کم چکنائی والا دودھ
دوپہر کا کھانا: 6 اونس (170 گرام) ابلی ہوئی مرغی (صرف گوشت، ہڈیوں کے بغیر)، ایک کپ دہی (245 گرام)
رات کا کھانا: ایک ابلا ہوا انڈا، 5 اونس (142 گرام) ابلی ہوئی مرغی (صرف گوشت، ہڈیوں کے بغیر)، ایک سنگترا
دوسرا دن:
ناشتہ: 2 ابلے ہوئے انڈے اور ایک لیموں کا رس (مناسب مقدار والے پانی میں حل شدہ)
دوپہر کا کھانا: 5 اونس (142 گرام) اُبلی ہوئی مچھلی، ایک چکوترہ (گریپ فروٹ)
رات کا کھانا: 3 انڈے (ہارڈ بوائلڈ یعنی اچھی طرح ابالے ہوئے)
تیسرا دن:

ناشتہ: 2 انڈے (اچھی طرح ابالے ہوئے)، ایک کپ (تقریباً 230 ملی لیٹر) نیم گرم پانی میں ایک لیموں کا رس
دوپہر کا کھانا: 6 اونس (170 گرام) ابلا ہوا گوشت (گائے یا بچھیا کا)، ایک چکوترہ (گریپ فروٹ)
رات کا کھانا: 3 انڈے (اچھی طرح ابالے ہوئے)
چوتھا دن:
ناشتہ: 3 ابلے ہوئے انڈوں کے ساتھ پیاز اور اجوائن کا آمیزہ (کچلا ہوا)
دوپہر کا کھانا: سلاد کے ساتھ 5 اونس (142 گرام) پکی ہوئی مرغی
رات کا کھانا: ایک انڈا (اچھی طرح ابالا ہوا)، 2 سنگترے
پانچواں دن:
ناشتہ: 2 گاجریں، 2 انڈے (اچھی طرح ابالے ہوئے)، ایک کھانے کا چمچہ دہی (یا خمیر اٹھائی ہوئی کریم)
دوپہر کا کھانا: 2 گاجریں، تازہ سنگترے کا رس ایک کپ (250 ملی لیٹر)
رات کا کھانا: 3 اونس (85 گرام) ابلی ہوئی مچھلی، ایک ابلا ہوا انڈا
چھٹا دن:
ناشتہ: 5 اونس (142 گرام) کم چکنائی والی دہی، ایک تازہ لیموں یا سنگترے کا رس
دوپہر کا کھانا: 2 ابلے ہوئے انڈے، 2 چکوترے (گریپ فروٹس)
رات کا کھانا: ایک گلاس (250 ملی لیٹر) پانی کے ساتھ ایک لیموں کا رس
ساتواں دن:
ناشتہ: 2 ابلے ہوئے انڈے، آدھا چکوترا (گریپ فروٹ)
دوپہر کا کھانا: 6 اونس (170 گرام) ابلا ہوا گوشت (گائے یا بچھیا کا)، ایک سنگترہ
رات کا کھانا: ایک گلاس (250 ملی لیٹر) پانی کے ساتھ ایک لیموں کا رس۔

احتیاط:
یہ ڈائیٹ پلان صرف ان لوگوں کے لیے ہے جو موٹاپے یا زائد وزن کا شکار ہیں اور سنجیدگی سے اپنا وزن کم کرنا چاہتے ہیں۔ اگر آپ کا وزن پہلے ہی معمول پر ہے تو آپ کو اس ڈائیٹ پلان پر عمل کرنے کی کوئی ضرورت نہیں کیونکہ ایسی صورت میں آپ کو فائدے کے بجائے نقصان اٹھانا پڑ سکتا ہے۔
یہ بھی واضح رہے کہ اس ڈائیٹ پلان پر مسلسل صرف ایک ہفتے تک عمل کیا جائے یعنی دوسرے ہفتے میں بھی یہی معمول نہ دُوہرایا جائے بلکہ درمیان میں ایک ہفتے کا وقفہ کرنے کے بعد اسی ڈائیٹ پلان پر ایک بار پھر عمل کیا جائے۔

ایمزٹی وی (راولپنڈی) آرمی چیف جنرل قمر جاوید باجوہ نے دہشت گردوں کے خلاف بلا امتیاز آپریشن جاری رکھنے کی ہدایت کرتے ہوئے کہا کہ دہشت گردی کوکسی صورت برداشت نہیں کیا جائے گا جب کہ قیام امن کے لیے صوبائی حکومت سے ہرممکن تعاون کیا جائے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے کورہیڈ کوارٹر سدرن کمانڈ کا دورہ کیا جہاں کورکمانڈر سدرن کمانڈ لیفٹیننٹ جنرل عامر ریاض نے آرمی چیف کا استقبال کیا جب کہ جنرل قمر جاوید باجوہ نے یادگار شہدا پر حاضری دی اور پھول چڑھائے۔ ترجمان کے مطابق آرمی چیف کو بلوچستان کی سیکیورٹی صورتحال پر بریفنگ دی گئی جب کہ انہوں نے قانون نافذ کرنے والے اداروں کی کارکردگی کو سراہا۔

پاک فوج کے سربراہ نے دہشت گردوں کے خلاف بلا امتیاز آپریشن جاری رکھنے کی ہدایت کرتے ہوئے کہا کہ دہشت گردی کوکسی صورت برداشت نہیں کیا جائے گا جب کہ دہشت گردوں کے خلاف آپریشن میں انٹیلیجنس اور سیکیورٹی اداروں سے تعاون کیا جائے۔ انہوں نے کہا کہ بلوچوں نے امن وامان کی بہتری کے لیے قربانیاں دی ہیں، سیکیورٹی اداروں ، عوام کی قربانیاں رائیگاں نہیں جائیں گی جب کہ صوبے میں امن کی بحالی کے لیے صوبائی حکومت کو ہرممکن مدد فراہم کی جائے گی۔

آرمی چیف نے بلوچستان میں جاری ترقیاتی منصوبوں کو جلد مکمل کرنے کی ہدایت کرتے ہوئے کہا کہ اقتصادی راہداری منصوبوں کو فول پروف سیکیورٹی دی جائے اور پسماندہ علاقوں میں جاری ترقیاتی منصوبوں کو بھی مکمل سیکیورٹی فراہم کی جائے گی۔

ایمزٹی وی(اسپورٹس) لیگ سپنر یاسر شاہ پریکٹس سیشن کے دوران کمر کی تکلیف کا شکار ہو گئے ہیں۔ تفصیلات کے مطابق یاسر شاہ پریکٹس سیشن کے دوران کمر کی تکلیف کا شکار ہو گئے ہیں اور ڈاکٹرز نے انہیں 2 دن آرام کا مشورہ دیا ہے۔

ذرائع کے مطابق یاسر شاہ انجری کے باعث وارم اپ میچ سے باہر ہو گئے ہیں تاہم امید ہے کہ وہ آسٹریلیا کے خلاف ٹیسٹ سیریز سے قبل صحت یاب ہو جائیں گے اور میچ میں شریک ہوں گے۔ واضح رہے کہ پاکستان اور آسٹریلیا کے درمیان پہلا ٹیسٹ میچ 15 دسمبر سے شروع ہو رہا ہے۔

ایمزٹی وی(تعلیم)جامعہ کراچی کے ناظم امتحانات پروفیسر ڈاکٹر ارشد اعظمی کے اعلامیہ کے مطابق ایل ایل ایم سال آخر سالانہ امتحانات برائے 2016 ء کیلئے فیس جمع کرانے کی آخری تاریخ میں بغیر لیٹ فیس کے 15جنوری 2017ء تک توسیع کردی گئی ہے،جبکہ اس کے بعد5000/= روپے لیٹ فیس کے ساتھ 31 جنوری 2017 ء تک جمع کرائے جاسکتے ہیں