لاہور : پنجاب کے3تعلیمی بورڈ کےتحت پنجاب پولیس میں بھرتی کےلئےتحریری امتحانات کاشیڈول جاری کردیا گیا ہے۔

انٹرمیڈیٹ بورڈ کے مطابق پنجاب پولیس میں لیڈی کانسٹیبل ،پنجاب ہائی وے پیڑول ،اسپیشل پروٹیکشن یونٹ ٹیلی کمیونیکشن پنجاب وائرلیس آپریڑ اور موٹ ٹرانسپورٹ پنجاب کی بھرتی کےلیے فزیکل ٹیسٹ پاس کرنے والے امیدواران کا تحریری امتحان13 مارچ2022کو بورڈ آفس انٹرمیڈیٹ اینڈ سیکنڈری ایجوکیشن،لاہور ،گجرانوالہ اور بہاولپور کے زیر اہتمام کیا جائے گا ۔

شیڈول کے مطابق سرگودھا ،ساہیوال ، اور لاہور ڈویژن کے امیدواران کے امتحان لاہور ، ڈیرہ غازی خان ،ملتان اور بہاولپور ڈویژن کے امیدواران کے بہاولپور ،راولپنڈی ،فیصل آباد اور گوجرانوالہ ڈویژن کے امیدواران کے امتحان گوجرانوالہ میں ہونگے

لاہور: پاکستان سپر لیگ 7 کے کمنٹری پینل نے ٹیم آف ٹورنامنٹ کاانتخاب کرلیاجس کاکپتان وکٹ کیپر بیٹرمحمدرضوان کومقررکیاگیاہے۔

پلیئر آف پی ایس ایل 7 کا ایوارڈ جیتنے والے محمد رضوان ملتان سلطانز کے ان چار کھلاڑیوں میں شامل ہیں جنہیں ٹیم آف ایچ بی ایل پی ایس ایل 7 کا حصہ بنایا گیا ہے۔

ان کے علاوہ رائیلی روسو، ٹم ڈیوڈ اور خوشدل شاہ کو بھی ٹیم آف پی ایس ایل 7 میں شامل کیا گیا ہے۔

ٹورنامنٹ کی چیمپئن ٹیم لاہور قلندرز کے بھی چار کھلاڑیوں کو ٹیم آف ٹورنامنٹ کا حصہ بنایا گیا ہے، ان میں شاہین آفریدی، زمان خان، فخر زمان اور راشد خان بھی شامل ہیں جب کہ پشاور زلمی کے شعیب ملک، اسلام آباد یونائیٹڈ کے شاداب خان اور کوئٹہ گلیڈی ایٹرز کےنسیم شاہ بھی پی ایس ایل کا حصہ ہیں۔

کراچی : کل یکم مارچ کو شب معراج کے پیش نظرصوبےمیں تعلیمی ادارے بند رہیں گے۔

محکمہ تعلیم سندھ کے سیکریٹری غلام اکبر لغاری کاکہنا ہے کہ یکم مارچ کو شب معراج کے پیش نظر صوبے کے تمام تعلیمی اداروں میں چھٹی ہوگی اور تعلیمی ادارے بند رہیں گے۔

انہوں نے کہا کہ محکمہ تعلیم کی طرف سے طئے کردہ سالانہ سرکاری چھٹیوں کی منظوری اسٹیئرنگ کمیٹی کے حالیہ اجلاس میں بھی دےدی گئی تھی۔

بنگلور: کرناٹک کے ایک اور کالج کے پرنسپل نےمسلم طالبات کوحجاب پہننےپرکالج سےباہر نکال دیا۔

عالمی خبر رساں ادارے کے مطابق بھارت میں مسلم طالبات کی مشکلات میں کمی نہیں آئی۔ حجاب پہننے کو جرم بنا کر اُن پر تعلیمی اداروں کے دروازے بند کردیئے گئے۔

ایسا ہی ایک اور واقعہ ریاست کرناٹک کے علاقے اوڈوپی کے ایم جی ایم کالج میں پیش آیا جہاں پرنسپل نے حجاب پہنی مسلمان طالبات کو کالج سے باہر نکال دیا۔کالج پرنسپل کے اس رویے پر طالبات نے شدید احتجاج کیا۔ طالبات کا کہنا تھا کہ کالج انتظامیہ کا یہ اقدام ہائی کورٹ کے فیصلے کی بھی خلاف ورزی ہے۔

طالبات نے اس خدشے کا بھی اظہار کیا گیا کہ کل سے شروع ہونے والے امتحان میں ہمیں شریک ہونے سے روکا جائے گا۔

واضح رہے کہ ہائی کورٹ نے حجاب پر پابندی کے خلاف کیس کا فیصلہ آنے تک تمام کالجوں کی انتظامیہ کو حجاب میں آنے والی طالبات کے لیے علیحدہ کلاسوں کے انتظام کا حکم دیا تھا۔

اسلام آباد: آسٹریلوی کرکٹ ٹیم 24 سال بعدآج گئےرات خصوصی طیارے سےپاکستان پہنچ گئی ہے۔

اسلام آباد میں آسٹریلوی کرکٹ ٹیم کی 24سال بعدآمدپرپاکستان کرکٹ بورڈ کے حکام نے پرتپاک استقبال کیا۔

2 روزتک آسٹریلوی ٹیم بائیوسیکیورببل میں رہے گی، کھلاڑیوں کے 2 روز بعد کورونا ٹیسٹ کیےجائیں گے جب کہ آسٹریلوی کرکٹرزکورونا ٹیسٹ منفی آنے پر پریکٹس کریں گے۔

آسٹریلیا کے کھلاڑیوں میں کپتان اسٹیو اسمتھ، پیٹ کمنز،مچل اسٹارک ، مارنوس لبوشین، مچل مارش، عثمان خواجہ، جوش ہیزل ووڈ، ناتھن لیون اور دیگر کھلاڑی شامل ہیں۔

آسٹریلوی ٹیم پاکستان میں 3 ٹیسٹ،3 ون ڈے، ایک ٹی20میچ کھیلے گی جب کہ پاکستان اور آسٹریلیا کا پہلا ٹیسٹ 4 مارچ سے کھیلا جانا ہے۔

لاہور: پاکستان سپر لیگ سیزن 7 کے فائنل میں جیتنے والی ٹیم صرف ٹرافی ہی نہیں بلکہ 8 کروڑ روپے کی حقدار ٹھہرے گی۔

میڈیا ذرائع کے مطابق پاکستان سپر لیگ کی رنر اپ ٹیم کے حصے میں 3 کروڑ 20 لاکھ روپے آئیں گے جبکہ پلیئرآف دی ٹورنامنٹ کے 30 لاکھ روپے کا چیک دیا جائے گا۔

پی ایس ایل کے ساتویں ایڈیشن میں بہترین بیٹر اور سب سے زیادہ وکٹیں لینے والا بولر، بہترین فیلڈر، کیپر، ایمرجنگ، آل راؤنڈر اور امپائر آف دی لیگ کو بھی 35،35 لاکھ روپے کے چیک پیش کیے جائیں گے۔

پاکستان کرکٹ بورڈ کی جانب سے اسپرٹ آف کرکٹ ایوارڈ بھی دیا جائے گا جس کی مالیت بھی 35 لاکھ روپے ہوگی۔

یاد رہے کہ گزشتہ سیزن میں ٹرافی جیتنے والی ٹیم کو ساڑھے 7 کروڑ روپے جبکہ ٹورنامنٹ آف دی پلئیر کو 30لاکھ، بہترین بلےباز، بہترین بولر، بہترین وکٹ کیپر اور بہترین فیلڈر کو 8،8 لاکھ روپے دیئے گئے تھے۔

پاکستان سپر لیگ 7 کا فائنل کل ملتان سلطانز اور لاہور قلندرز کے درمیان کھیلا جائے گا۔ ایونٹ کا فائنل پاکستانی وقت کے مطابق شام 7:30 بجے قذافی اسٹیڈیم میں کھیلا جائے گا۔

اس سے قبل دونوں ٹیمیں پی ایس ایل 7 میں 2 مرتبہ ایک دوسرے کے مدمقابل آچکی ہے ان مقابلوں میں ایک میچ لاہور قندرز اور دوسرا ملتان سلطانز نے جیتا۔

لاہور: ایچ بی ایل پی ایس ایل سیون کے فائنل میں صدر پاکستان عارف علوی، وزیر اعظم عمران خان اور وزیر اعلیٰ پنجاب عثمان بزدار کی متوقع آمد کے پیش نظر سیکیورٹی کے انتظامات کو مزید سخت کیا جارہا ہے۔

ذرائع کے مطابق قذافی اسٹیڈیم کے اطراف میں ڈیوٹی کرنے والے اہلکاروں کی تعداد میں اضافہ کرنے کی ہدایات دی گئی ہیں، ہیلی کاپٹر سے فضائی نگرانی بھی کی جائے گی۔ مہمان خصوصی کی طرف سے میچ کے اختتام پر مختصر خطاب کی بھی اطلاعات ہیں۔

پی سی بی حکام اور ضلعی انتظامیہ ہر پہلو سے تسلی بخش انتظامات کرنے کے لیے سارا دن کوشاں رہی۔ فائنل کو یادگار بنانے کے لیے پی سی بی نے دوسرے مختلف پروگرام بھی ترتیب دیے ہیں جن میں ہمیشہ کی طرح اس بار بھی آتش بازی کا شاندار مظاہرہ شامل ہے،بارش نے رنگ میں بھنگ نہ ڈالا تو مشروب ساز ادارے کے تعاون سے پی ایس ایل ٹرافی کو اچھوتے انداز سے گراؤنڈ میں لانے کی حکمت عملی بھی ترتیب دی گئی ہے۔

فائنل میچ کے لیے لاہور پولیس نے سیکیورٹی اور ٹریفک انتظامات کو حتمی شکل دیدی،سیکیورٹی کے لیے 8 ہزار سے زائد نفری تعینات ہوگی۔ڈی آئی جی آپریشنز ڈاکٹر محمد عابد خان نے “ایکسپریس “سے گفتگو میں بتایا کہ شہر بھر میں سرچ اینڈ سویپ آپریشنز،داخلی راستوں پر چیکنگ مزید سخت،حساس ایریاز میں عارضی ناکہ جات لگائے گئے ہیں۔

ایس پی سیکیورٹی راشد ہدایت نے کہا کہ شہریوں کو چیکنگ اور واک تھرو گیٹس سے گزرنے کے بعد اسٹیڈیم میں داخلے کی اجازت ہوگی۔سی ٹی او منتظر مہدی نے کہا کہ میچ کے دوران تمام شاہراہیں ٹریفک کے لیے کھلی رہیں گی صرف ٹیموں کی موومنٹ کے درمیان بند کیا جائے گا، جونہی ٹیم گزر جائے گی فوری ٹریفک کا نظام بحال ہوگا۔

ویب ڈیسک : سوشل میڈیا ایپلی کیشن میٹا (فیس بک) نےریلزکے فیچر کی مقبولیت کےبعداسے عالمی سطح پر 150 سے زائد ممالک میں متعارف کرادیا ہے۔

یہ فیچر دراصل مختصر ویڈیوز کا فیچر ہے جس کے تحت صارفین کے لیے ایک ہی جگہ متعدد ویڈیوز دیکھنے کی سہولت موجود ہوتی ہے۔
کمپنی کی ریسرچ کے مطابق سوشل میڈیا صارفین اپنے دن کا آدھے سے زیادہ وقت ریلز دیکھ کر گزارتے ہیں جس میں بچے، نوجوان اور خواتین اپنی اپنی پسند کی ریلز دیکھتی ہیں۔

ریلز کا فیچر فیس بک پر امریکا میں 2021 میں متعارف کرایا گیا تھا جب کہ اب اسے دیگر ممالک کے لیے بھی پیش کردیا گیا ہے۔

اس سے قبل 2020 میں اسے انسٹاگرام پر متعارف کرایا گیا تھا چونکہ مختصر ویڈیوز ٹک ٹاک پر کافی مقبول تھیں اسی لیے کمپنی نے اسے دیگر سوشل میڈیا سائٹس کے لیے لانچ کرنے کا سوچا۔

اس فیچر کی خاص بات یہ ہے کہ کانٹینٹ کریئیٹرز ریلز سے پیسے کماسکتے ہیں، کمپنی کا کہنا ہے کہ 'ریلز پلے بونس پروگرام کے تحت باصلاحیت کریئیٹرز کو ان کی ریلیز پر ویوز کی بنیاد پر ماہانہ 35 ہزار ڈالرز تک رقم دی جائے گی، یعنی جس شخص کی ریلز کے جتنے زیادہ ویوز ہوں گے اسے یہ رقم دی جائے گی۔

اسلام آباد: آپریشن سوئفٹ ریٹارٹ کے تین سال مکمل ہونےپرپاک فضائیہ نے نغمہ ’’دنیا میں سربلند‘‘ جاری کیا ہے۔

پاکستان ایئر فورس نے اپنے آفیشل ٹوئٹر اکاؤنٹ پر نغمہ کا لنک شیئر کرتے ہوئے بتایا کہ پاک فضائیہ نے آپریشن سوئفٹ ریٹارٹ کے تین سال مکمل ہونے پر اس نغمہ کے ذریعے پاک فوج کے جوانوں اور آپریشن کے ہیروز کو خراج تحسین پیش کیا ہے۔

واضح رہے کہ 3 سال قبل 27 فروری 2019 کو آج ہی کے دن پاک فضائیہ کے شاہینوں کے ہاتھوں مگ21 جہاز کی تباہی کے بعد بھارتی ونگ کمانڈر ابھی نندن کو گرفتار کرلیا گیا تھا اور پھر اسے چائے پلا ئی گئی جو کہ ’’فنٹاسٹک ٹی‘‘ کے نام سے مشہور ہوئی۔ بعد ازاں ابھی نندن کو جذبہ خیر سگالی کے تحت کر رخصت کردیا گیاتھا۔

بھارتی ونگ کمانڈر کی وردی، جہاز کی باقیات اور چائے کا کپ پی اے ایف میوزیم کراچی کی آپریشن سوئفٹ ریٹارٹ گیلری میں محفوظ ہیں۔

کیف: یوکرین سے درجنوں پاکستانی طلباء کوپولینڈ منتقل کردیا گیا

طلباکو لانے کے لیے پی آئی اے کی پروازیں کل روانہ ہوں گی۔

ذرائع کے مطابق پاکستانی سفارتخانہ یوکرین نے 35 پاکستانی طلباء کو پولینڈ منتقل کردیا۔ طلباء پولینڈ میں سرحد کے قریب قائم کیمپ میں پہنچ گئے۔طلبا کی آمد کے بعد سے پولینڈ میں پاکستان کا سفارتخانہ طلباء کو اب وارسا پہنچانے کے انتظامات کر رہا ہے۔

اسی ضمن میں پی آئی اے نے یوکرین میں پھنسے پاکستانیوں کے لیے فضائی آپریشن ترتیب دے دیا ہے۔ اتوار کے روز دو پروازیں پاکستان سے پولینڈ روانہ کرنے کی تیاری مکمل کرلی گئی ہے۔

بڑے جہازوں کے آپریشن کے لیے یوکرین پولینڈ سرحد کے قریب شہروں خصوصا لبلن ائیرپورٹ پر انتظامات ناکافی ہیں اس لیے پروازیں ممکنہ طور پر پولینڈ کے دارالحکومت وارسا پہنچیں گی تاہم پروازوں کی حتمی روانگی لوگوں کے پولینڈ پہنچنے کے بعد ہوگی۔
پی آئی اے انتظامیہ کے مطابق پاکستانی سفارت خانہ تمام ایسے افراد سے رابطہ کررہا ہے اور انہیں معلومات مہیا کررہا ہے، پی آئی اے کی انتظامیہ، وزارت خارجہ اور پاکستانی سفارتی عملے سے مکمل رابطے میں ہے۔

یکرین میں تعینات پاکستان کے سفیر نوئیل اسرائیل کھوکھر نے کہا ہے کہ یوکرین میں پاکستان کے تقریبا تین ہزار طلباء موجود تھے، زیادہ تر طلباء یوکرین سے جاچکے ہیں اور صرف پانچ یا چھ سو طلباء ابھی یوکرین میں موجودہیں۔

انہوں نے کہا کہ یوکرین سے انخلاء کے عمل میں بہت سی مشکلات ہیں، یوکرین میں فلائٹس بند ہیں، پمپس پر پٹرول دستیاب نہیں، بینکنگ سسٹم بیٹھ چکا ہے، فائرنگ اور میزائل حملے ہو رہے ہیں پھر بھی طلباء سمیت تمام پاکستانیوں کے انخلاء کا عمل جاری ہے، بہت جلد تمام پاکستانیوں کو یوکرین سے نکال لیا جائے گا۔