مہمند: گورنمنٹ ہائر سکینڈری اسکول غلنئ کے15 طلباء میں اومیکرون کی تصدیق ہوئی ہے

جس کے بعد اسکول بند کرنے کا فیصلہ کیا گیا ہے۔

غلنئی پہلا ہائر سکنڈری اسکول ہے جس میں سب سے زیادہ طلبا امیکرون سے متاثر ہوئے ہیں۔

15 طلبا میں اومی کرون کی تصدیق کے بعدضلع کے ڈسٹرکٹ ہیلتھ آفیسررفیق حیات نے اومیکرون سے بچنےکےلئے ضلعی انتظامیہ کو اسکول بند کر نے کا لیٹر جاری کر دیا۔

لاہور: یونیک گروپ آف اسٹیٹیوشنز اور ایوان اقبال کیمپس کے اشتراک سے مادری زبان کے عالمی دن کے حوالے سے تقریب منعقد کی گئی۔

تقریب سے خطاب کرتے ہوئےصوبائی وزیر انسانی حقوق و اقلیتی امور اعجاز عالم آکسٹن کا کہنا ہے کہ یہ بات افسوس ناک ہے کہ پنجابی زبان بولنے والےہی اپنی زبان کا استعمال کرنے سےہچکچاہٹ محسوس کرتے ہیں۔ ان کا مزید کہنا تھا کہ پنجابی زبان کو نصاب میں شامل کرنے کے لیے ہر ممکن کوشش کی جائے گی ۔پنجابی کو سندھی اور پشتو کی طرح نصاب میں شامل کرنے کے لیے اقدامات اٹھائے جائیں گے

چیرمین یونیک گروپ پروفیسرعبدل منان خرم نے کہا کہ پنجابی زبان مٹھاس سے بھرپور ہےاور ہمیں اس کی ترویج کی لیے اقدامات اٹھانا ہوں گے۔

پنجابی زبان کے انقلابی شاعر نےخطاب کرتے ہوئے کہا کہ ہم دنیا کے کسی بھی خطے میں رہیں ہمیں پنجابی کے فروغ کے لیے کوشاں رہنا ہوگا۔

پنجابی رہنما سعیدہ دیپ نے کہا پنجابی زبان کے فروغ کے لیے عوامی نمائندگان خصوصی کردار ادا کریں اورپنجابی کےفروغ کے لیےاپنی اواز یں بلند کریں۔پنجابی ریڈیو براڈ کاسٹر مسعود ملہی نے کہا کہ پنجابی زبان کینیڈا،آسٹریلیااور دیگر ترقی پزیر ممالک میں فروغ پا رہی ہے لیکن ہمارے یہاں کوئی اقدامات نہیں اٹھائے جا رہے۔

اسلام آباد: پی ٹی اے نے ملک بھرمیں انٹرنیٹ سروس متاثر ہونےکاخدشہ ظاہر کردیا۔

ملک بھر میں انٹرنیٹ کی رفتار سست ہونے پر پاکستان ٹیلی کمیونیکشن اتھارٹی کاکہنا ہے کہ ٹرانس ورلڈ سب میرین کیبل سسٹم میں ایک کیبل کٹ گئی ہے جس کے باعث انٹرنیٹ کی رفتار میں کمی ہوسکتی ہے۔

پی ٹی اے کے ترجمان کا کہنا ہے کہ پاکستان کے سمندری ساحلوں سےتقریباً400کلومیٹرکےفاصلےپرکیبل کٹی ہے۔خرابی کی جگہ اور انٹرنیٹ کی بحالی کےلئے  کوششیں کی جارہی ہیں

پی ٹی اے کا مزید کہنا ہے کہ کنسورشیم انٹرنیٹ کی فراہمی کےلئے ایڈہاک بینڈ وڈتھ کابندوبست کیاجارہاہے۔

کراچی: سرسید یونیورسٹی آف انجینئرنگ و ٹیکنالوجی ،کراچی کے مرکزِ مشاورت و رہنمائی کے زیر اہتمام جاب فیئر 2022ء کا انعقاد کیا جارہا ہے

جاب فیئر میں شہر کی مشہور شخصیات اور ممتاز بین الاقوامی ادارے بھی شرکت کریں گے ۔

جاب فیئرکاانعقاد24فروری 2022 صبح 9:00 بجے سے شام 5:00 تک جاری رہے گا۔

کراچی: انسٹیٹیوٹ آف بزنس ایڈمنسٹریشن کراچی کےرجسٹرارنے استعفیٰ دےدیا

ذرائع کے مطابق انسٹیٹیوٹ آف بزنس ایڈمنسٹریشن کے رجسٹرار ڈاکٹر اسد الیاس اینٹی ہراسمنٹ کمیٹی کی رپورٹ پر احتجاج کرتے ہوئے استعفی دیا ہے۔انہوں نے ادارے کے نام اپنی ای میل میں موقف اختیارکیا ہے کہ ماضی کے فیصلے میں مجھے ہی نشانہ بنایا گیا جس کے باعث مستعفی ہونے کا فیصلہ کیا۔ اس ضمن میں ڈائریکٹر آئی بی اے سے رابطے کی کوشش کی گئی تاہم حسب سابق وہ رابطے سے گریز کرتے رہے۔

خیال رہے کہ اس اہم معاملے پر طالب علم جبرئیل کی جانب سے آئی بی اے کے رجسٹرار ڈاکٹراسد الیاس کے خلاف دائرشکایتی درخواست کی تحقیقات کرنے والی اینٹی ہراسمنٹ کمیٹی نے ڈاکٹر اسد الیاس کو دوہفتوں کے لیے عہدے سے معطل کرنے کی سفارش کرکھی ہے تاہم وہ احتجاجاً مستعفی ہوگئے۔

کمیٹی نے اپنی تحقیقات میں یہ بھی سفارش کی ہے کہ اسد الیاس اپنے عمل پر طالب علم سے آئی بی اے کایگزیکیوٹیووڈائریکٹر کی موجودگی میں معافی مانگے۔

یاد رہے کہ آئی بی اے کراچی نے اپنے طالبعلم جبرئیل کو ماضی میں داخلہ منسوخ کرتے ہوئے ادارے سے بے دخل کردیا تھا بعد ازاں جبرئیل نے سوشل میڈیا پر آئی بی اے کی ایک خاتون ملازم کو ہراساں کیے جانے اور انتظامیہ کی جانب سے اس معاملے کا نوٹس نہ لینے پر احتجاج کیا تھا۔

آئی سی سی بی ایس جامعہ کراچی کے تحت’نیچرل پروڈکٹ کیسٹری‘ کے موضوع پر 4 روزہ15ویں بین الاقوامی سمپوزیم کی افتتاحی تقریب سے خطاب کرتے ہوئے شیخ الجامعہ کراچی پروفیسر ڈاکٹر خالد محمود عراقی نے کہا ہے کہ اعلیٰ سرکاری نمائندگان کو سرکاری جامعات اور اعلیٰ تحقیقی اداروں کی معاونت میں کردار ادا کرنا چاہیے نہ کہ کوئی ایسا کام کیا جائے جس سے تعلیمی اداروں کو نقصان پہنچے۔

وزیر اعظم پاکستان کی قائم کردہ ٹاسک فورس برائے سائینس اور ٹیکنالوجی کے چیئرمین پروفیسرڈاکٹر عطا الرحمن، آئی سی سی بی ایس جامعہ کراچی کے سربراہ اور کامسٹیک کے کوارڈینیٹر جنرل پروفیسر ڈاکٹر محمد اقبال چوہدری، حسین ابراہیم جمال فاونڈیشن کے سربراہ عزیز لطیف جمال، ڈاکٹر پنجوانی میموریل ٹرسٹ کی چیئرپرسن محترمہ نادرہ پنجوانی اور پروفیسر ڈاکٹر سید غلام مشرف نے بھی افتتاحی تقریب سے خطاب کیا۔

اس سمپوزیم میں تقریباً20 ممالک کے 60 سائنسدان جبکہ صرف پاکستان سے تقریباً400 محققین شرکت کررہے ہیں۔ تقریب میں کراچی میں انڈونیشیا کے کونسلیٹ جنرل، ترکی کے ڈپلومیٹس اور دیگر ملکی و غیر ملکی اکابرین نے بھی شرکت کی۔

پروفیسرڈاکٹر عطا الرحمن نے ملکی اور غیر ملکی محقیقین کو بین الاقوامی سمپوزیم میں خوش آمدید کہا۔ بین الاقوامی مرکز کے ابتدا ئی ایام کے متعلق انہوں نے بتایا کہ انہوں نے 1977 ء میں ’ کوڈائریکٹر‘ کی حیثیت سے اس ادارے میں شمولیت اختیار کی تھی جو بعد میں ٹیم ورک کے نتیجے میں نیچرل پروڈکٹ کیمسٹری کے شعبے میں دنیا کا معتبر ادارہ بن گیاانہوں نے کہا یہ ادارہ اب یونیسکو سینٹرآف ایکسلنس بھی ہے، ڈبلیو ایچ او کولابوریٹنگ سینٹر بھی ہے اور او آی سی سینٹر آف ایکسلینس بھی ہے۔

پروفیسر اقبال چوہدری نے کہا یہ کانفرنس نیچرل پروڈکٹ کیمسٹری سے متعلق ہے جس کا انسانی زندگی میں کلیدی کردار ہے، انہوں نے کہا گزشتہ چند سال میں بین الاقوامی مرکز جامعہ کراچی نے گرانقدر کامیابیاں حاصل کی ہیں، بین الاقوامی مرکز اعلیٰ تحقیق کے عنوان سے عالمی پہچان رکھتا ہے۔

انہوں نے کہا یہاں بیرونِ ملک سے اسکالر تربیت کے لئے آتے ہیں، یہاں صنعتی تجزیاتی مرکز، سی بی ایس سی آر اور سندھ فرانزک ڈی این اے لیبارٹری کی مدد سے فارما، کیمیائی اور فوڈ انڈسٹریز کو تجزیاتی سہولیات فراہم کی جاتی ہیں۔
۔ انہوں نے کہا سندھ حکومت کی درخواست پر سندھ کی کیمکو بیکٹریل لیبارٹری کو اعلیٰ تجربہ گاہ بنانے میں بھی بین الاقوامی مرکز نے بنیادی کردار ادا کیا ہے۔

عزیز لطیف جمال نے کہا ایچ ای جے انسٹی ٹیوٹ ملک میں سائینس و تحقیق میں صلاحیتوں میں اضافے کے عنوان سے اہم کرادار ادا کر رہا ہے۔ محترمہ نادرہ پنجوانی نے کہا ڈاکٹر پنجوانی سینٹر نے کرونا عالمی وبا کے دوران سندھ میں اہم کردار ادا کیا ہے اس ادارے نے کرونا کی کوالٹی ٹیسٹنگ کی سہولت صوبے کو فراہم کی۔ آخر میں پروفیسر ڈاکٹر سید غلام مشرف نے کلمہئ سپاس پیش کیا۔

کراچی: ملتان سلطانز نےپی ایس ایل 7 میں 9 میچز میں فتح حاصل کر کے نیا ریکارڈ قائم کرلیا۔

پاکستان سپرلیگ کے 29ویں میچ میں ملتان سلطانز نے اسلام آباد یونائیٹڈ کو شکست دے کر لیگ میں نویں فتح حاصل کرنے کا ریکارڈ بنایا جبکہ شکست کے باوجود بھی اسلام آباد یونائیٹڈ نے پلے آف کے لیے کوالیفائی کرلیا۔

ایچ بی ایل پی ایس ایل 7 میں ملتان سلطانز نے اپنے کُل 10 میچز میں سے 9 میں فتح حاصل کی اور اُسے صرف ایک میچ میں لاہور قلندرز سے شکست کا سامنا کرنا پڑا تھا۔

اسلام آباد: محکمہ موسمیات نے ملک کے بالائی اور وسطی علاقوں میں آندھی، تیز ہواؤں اور گرج چمک کے ساتھ بارش کی پیشگوئی کی ہے۔

ذرائع کےمطابق محکمہ موسمیات نے منگل سے جمعرات کے دوران ایک بار پھر ملک کے بالائی اور وسطی علاقوں میں آندھی، تیز ہواؤں اور گرج چمک کے ساتھ بارش کا امکان ظاہر کیا ہے، اور خدشہ ظاہر کیا ہے کہ آندھی تیز ہواؤں اور ژالہ باری کے باعث خیبر پختونخوا، بالائی پنجاب اور کشمیر میں کھڑی فصلوں و اسٹرکچرز کو نقصان ہوسکتا ہے۔

محکمہ موسمیات کا کہنا ہے کہ پیر اور منگل کو بلوچستان، جنوبی پنجاب اور سندھ کے علاقوں میں آندھی، تیز ہوائیں اور جھکڑ چلنے سے اسٹرکچر اور کھڑی فصلوں کو نقصان کا خدشہ ہے، جب کہ مری گلیات، نتھیا گلی، ناران، کاغان، دیر، سوات، شانگلہ، بونیر، نیلم ویلی، اسکردو، استور اور ہنزہ میں درمیانی اور شدید برفباری سے رابطہ سڑکیں بند ہونے کا خطرہ ہے۔ محکمہ موسمیات نے تمام متعلقہ اداروں کو الرٹ رہنے کی ہدایت کردی ہے۔

کراچی : پاکستان سپر لیگ سیزن 7 میں شامل ٹیم کراچی کنگزکاٹورنامنٹ میں سفرمسلسل شکستوں کے باعث پلےآف مرحلےسے قبل ہی اختتام پزیر ہوچکا ہے۔

انسٹاگرام پر کراچی کنگز کے کپتان بابر اعظم نےایک پیغام جاری کیاہے جس میں انہوں نے اپنی ٹیم کے کھلاڑیوں کے ہمراہ تصویر شیئر کرتے ہوئے ایک پوسٹ تحریر کی ہے۔

بابر نے پوسٹ میں لکھا کہ ہم اختتام کو نہیں روک سکے، پی ایس ایل سیزن 7 کے پورے تجربے میں سیکھنے اور مستقبل میں بہترین کرنے کے لیے بہت کچھ ہے۔

کراچی کنگز کے کپتان نے مداحوں کو یقین دلاتے ہوئے لکھا کہ ہم ان شاءاللہ مضبوط بن کر پلٹیں گے، بابر اعظم نے اپنی پوسٹ میں تعاون کرنے والے مداحوں کا شکریہ بھی ادا کیا۔

یاد رہےایچ بی ایل پی ایس ایل کے پلے آف مرحلے کے لیےلاہور قلندرز، ملتان سلطانز، پشاور زلمی اور اسلام آباد یونائٹیڈ کی ٹیمیں کوالیفائی کر چکی ہیں جبکہ کوئٹہ گلیڈی ایٹرز اور کراچی کنگز پلے آف کی دوڑسے باہر ہوگئی ہیں

کراچی: سندھ بھرمیں میٹک اور انٹرمیڈیٹ کے سالانہ امتحانات کےحوالےسےمحکمہ تعلیم سندھ نےکل اسٹیئرنگ کمیٹی کااجلاس طلب کرلیا۔

صوبائی وزیر تعلیم سردار شاہ کی زیر صدارت اسٹیئرنگ کمیٹی کے ہونے والے اجلاس میں صوبے میں نئے تعلیمی سیشن 2022 اور میٹرک و انٹر کے امتحانات کی تاریخوں کاتعین کیا جائےگااس حوالے سے تعلیمی افسران اور چیئرمین بورڈز سمیت دیگر کو اجلاس کا ایجنڈا بھی بھجوا دیا گیا ہے

ذرائع کاکہنا ہے کہ سندھ میں میٹرک کے امتحانات 17 مئی اور انٹرمیڈیٹ کے یکم جون سے لینے کی تجویز سامنے آئی جس کی منظوری کے لیے اسٹیئرنگ کمیٹی کا اجلاس کل طلب کرلیا گیاہے۔

محکمہ تعلیم سندھ نے صوبے میں نئے تعلیمی سیشن 2022 اور میٹرک و انٹر کے امتحانات کی تاریخوں کے تعین کے لیے اسٹیئرنگ کمیٹی کا اجلاس منگل 22 فروری کو طلب کرلیا

اجلاس کے ایجنڈے کے مطابق سندھ میں میٹرک کے امتحانات منگل 17 مئی اور انٹر کے امتحانات بدھ یکم جون سے شروع کرنے کی سفارش کی گئی ہے مزید براں پورے صوبے میں نئے تعلیمی سیشن 2022 کا آغاز یکم اگست سے کرنے کی تجوہز دی گئی ہے۔

واضح رہے کہ صوبائی وزیر تعلیم سردار شاہ کی زیر صدارت ہونے والے اسٹیئرنگ کمیٹی کے اجلاس میں 2022 کے تعلیمی کیلینڈر کی منظوری بھی دی جائے گی جس کے تحت موسم گرما کی تعطیلات جون و جولائی جبکہ موسم سرما کی تعطیلات 22 دسمبر سے 31 دسمبر 2022 تک ہوں گی