دورہ پاکستان میں آسٹریلیوی ٹیم کے بھارتی اسپن بولنگ کوچ پاکستان نہیں آئیں گے۔

میڈیا رپورٹس کے مطابق آسٹریلین کرکٹ ٹیم کو دورہ پاکستان میں اسپیشلسٹ اسپن بولنگ کوچ کی خدمات حاصل نہیں ہوں گی اور بھارت سے تعلق رکھنے والے کوچ سری دھرن سری رام ٹیم کے ہمراہ پاکستان نہیں آئیں گے۔

میڈیا رپورٹس کےمطابق آسٹریلیا کی ٹیم اسپن بولنگ کوچ کے بغیر ہی پاکستان آئے گی۔

اس سلسلے میں کرکٹ آسٹریلیا کا کہنا ہےکہ نیوزی لینڈ کے ڈینیل ویٹوری سے بات جیت جاری ہے تاہم وقت کی کمی کی وجہ سے ممکن نہیں کہ معاملات طے پا سکیں۔

نئی دہلی: بھارتی ریاست کرناٹک میں حجاب اتارنے کے حکم نہ ماننے پر کالج انتظامیہ نے 58 طالبات کی رجسٹریشن معطل کردی۔

بھارتی میڈیا کے مطابق ریاست کرناٹک کے 5 سے زائد اضلاع کے تعلیمی اداروں میں حجاب پر پابندی کے خلاف احتجاج کا سلسلہ تاحال جاری ہے جس میں تیزی اس وقت آگئی جب ایک کالج کی انتظامیہ نے حجاب نہ اتارنے پر 58 طالبات کو کالج سے نکال دیا۔

طالبات نے کالج سے باہر شدید احتجاج کیا جس پر کالج انتظامیہ نے ان طالبات کی رجسٹریشن معطل کردی اور رجسٹریشن کی بحالی تک کالج میں داخل ہونے پر پابندی ہوگی۔

کرناٹک میں دو ماہ سے حجاب پر پابندی کے باعث تعلیمی مدارس بند تھے تاہم تدریسی عمل شروع ہونے کے بعد بھی یہ تنازع اپنی جگہ کھڑا ہے۔ کرناٹک کی طالبات نے ہائی کورٹ سے رجوع کیا ہے جس پر اب تک فیصلہ نہیں آسکا ہے۔

عدالت میں حجاب پر پابندی کے خلاف درخواست دائر ہونے کے بعد باحجاب طالبات کے لیے علیحدہ کلاسوں کے انتظام کا کہا گیا تھا جس پر چند کالجز میں عمل بھی ہوا تاہم انتہا پسند ہندوؤں کے دباؤ پر یہ سلسلہ بند کردیا گیا۔

دوسری جانب حجاب پر پابندی اب کرناٹک سے نکل کر مدھیہ پردیش اور اترپردیش سمیت کئی ریاستوں میں پھیل گیا ہے۔

تعلیمی اداروں میں حجاب پر پابندی کی مہم بی جے پی نے چلائی ہے جو کرناٹک میں ہونے والے انتخابات میں ہندو ووٹرز کی حمایت حاصل کرنے کے لیے اوچھے ہتھکنڈے استعمال کر رہی ہے۔

سان فرانسسکو: پیغام رسانی کی موبائل ایپلی کیشن واٹس ایپ نے گروپ چیٹ کےحوالےسےایک بہترین فیچر کو آزمائشی طور پر متعارف کرا دیا۔

واٹس ایپ کی خبروں پر نظر رکھنے والی ویب سائٹ ڈبلیو اے بیٹا انفو کے مطابق نئے فیچر کا نام ‘کمیونیٹیز’ ہے جس کے ذریعے مختلف گروپس کو ایک ساتھ آپریٹ کرنے کی سہولت ہوگی۔

صارفین کمیونیٹیز فیچر میں ایک سے زائد گروپس کو ایڈ کرسکیں گے جس کے بعد ممکنہ طور پر ایڈمن یا گروپ میں پیغامات بھیجنے کی رسائی رکھنے والے ممبرز بہ یک وقت تمام گروپس میں میسج کرسکیں گے۔ اس اقدام سے ایک ساتھ تمام گروپ کو ہینڈل کرنے میں حائل پریشانی دور ہوجائے گی۔

کمپنی نے اس فیچر پر گزشتہ سال سے کام شروع کیا اور اب اسے آزمائشی طور پر متعارف کرایا گیا ہے نئی سہولت کی تصویر بھی منظر عام پر آچکی ہے۔

فیچر کی تصویر میں دیکھا جاسکتا ہے صارفین کو دو آپشنز دیے گئے ہیں ایک میں موجودہ گروپس کو ایک جگہ اکٹھا کرنے جبکہ دوسرے میں تمام گروپس کو ایک ساتھ پیغامات بھیجنے کی سہولت ہے۔

خیال رہے کہ چیٹ سے متعلق اس نئے فیچر کے بارے میں زیادہ معلومات سامنے نہیں آئیں تاہم امکان ظاہر کیا گیا ہے کہ یہ سہولت جلد تمام صارفین کو فراہم کردی جائے گی۔

لاہور:وزیر تعلیم پنجاب مراد راس نے صوبے بھرکےتعلیمی اداروں میں کلچرڈےمنانےکافیصلہ کیاہے۔

تفصیلات کے مطابق پنجاب کلچرڈے کے حوالے سے صوبائی وزیر تعلیم ڈاکٹرمرادراس اور صوبائی وزیر ثقافت وکلونیزخیال احمد کاسترو کے مابین پنجاب کلچر ڈے کی سرگرمیوں کے انعقاد کے حوالے سے مفاہمتی یاداشت پر دستخط کئے ہیں۔

معاہدے کے مطابق ہر سال 14 مارچ کو صوبے بھر میں پنجاب کلچر ڈے منایاجاتا ہےجس کا بنیادی مقصدثقافتی ورثے کوآگےبڑھاناہے۔

صوبے بھر کے تمام سرکاری اسکولوں میں کلچر ڈے کے موقع پر ثقافت کے فروغ کے حوالے سے سرگرمیوں کا باقاعدہ انعقاد کیاجائےگا۔اس موقع کی مناسبت سے تمام طلبا و اساتذہ مخصوص علاقائی لباس زیب تن کریں گے۔

وزیر تعلیم کا کہنا ہے کہ ہماری ثقافت اور ورثے کے فروغ کےلئے کلچر ڈے کاانعقاد انتہائی اہمیت کاحامل ہے پنجاب ایک قدیم ثقافتی مرکز اور لوک ورثے کی اعتبار سے مالامال صوبہ ہے۔ انہوں نے مزید کہا کہ پنجاب کی زمین ادبی وثقافتی لحاظ سے بےحد زرخیز ہے۔

کراچی : جامعہ کراچی شعبہ فعلیات کے زیر اہتمام تیسری تین روزہ پروب کانفرنس کی افتتاحی تقریب 21 فروری کو ہوگی ۔

جامعہ کراچی کے شعبہ فعلیات(فزیالوجی) کے زیر اہتمام تیسری تین روزہ پروب 2022 ء کانفرنس کی افتتاحی تقریب پیر21 فروری2022 ء کو دوپہر 2:30 بجے کلیہ فنون وسماجی علوم جامعہ کراچی کی سماعت گاہ میں منعقد ہوگی۔

شیخ الجامعہ پروفیسر ڈاکٹر خالد محمودعراقی صدارت کریں گے جبکہ صدرشعبہ فعلیات جامعہ کراچی پروفیسر ڈاکٹر تاثیر احمد خان خطبہ استقبالیہ پیش کریں گے۔

شعبہ پیتھالوجی اینڈ لیبارٹری میڈیسن کی پروفیسر اور رکن پی ایم سی ڈاکٹر رومانیہ حسن کلیدی خطاب کریں گی۔

افتتاحی تقریب سے صدرساؤتھ ایشین ایسوسی ایشن آف فزیالوجسٹ پروفیسر کوشل کے داس اوررئیسہ کلیہ علوم جامعہ کراچی پروفیسر ڈاکٹر ناصرہ خاتون بھی خطاب کریں گے جبکہ کانفرنس کی سیکریٹری ڈاکٹر غزالہ یاسمین کلمات تشکر اداکریں گی۔

کراچی: دائود یونیورسٹی آف انجینئرنگ اینڈ ٹیکنالوجی کا9واں جلسہ تقسیم اسنادمنعقدکیا گیا۔

وائس چانسلر پروفیسر ڈاکٹر فیض اللہ عباسی نے کہا کہ 2013ء سے پہلے یہاں باقاعدہ کلاسز کا انعقاد ہی مشکل تھا ہم 9سال کے عرصے میں نظم و ضبط ، قواعد اور بہترین ماحول کے ایسے اقدامات کئے ہیں کہ اب طالبات کی بڑی تعداد یہاں سے انجینئرز بن رہی ہے بلکہ ٹاپ پوزیشن بھی حاصل کررہی ہے ۔ داؤد یونیورسٹی کے بہترین ماحول اور قابل دید اقدامات اور انتھک کاوشوں کے پیچھے میری قابل ٹیم ، فیکلٹی و ملازمین ہیں ۔

جلسہ تقسیم اسناد کی صدارت یونیورسٹی کے چانسلر اور گورنر سندھ جناب عمران اسماعیل نے کی جبکہ سینیٹر تاج حیدر ، یو ایس ایڈ کی ڈپٹی ڈائریکٹر برائے پاکستان ڈاکٹر ثمرین حسین ، ارکان سینیٹ اور سینڈیکٹ بھی موجود تھے۔

داؤد انجینئرنگ یونیورسٹی میں شعبہ انجینئرنگ کے اٹھارویں اور شعبہ آرکٹیکٹ کےسترہویں بیچزکے 390؍ طلبہ و طالبات کو ڈگریاں تفویض کی گئیںاور امتیازی نمبر حاصل کرنیوالوں کو گولڈ اور سلور کے تمغے دیئے گئے۔جبکہ جلسہ تقسیم اسناد میں داؤد انجینئرنگ یونیورسٹی میں ایم ایس پروگرام کے 52طلبہ و طالبات کو بھی ڈگریاں دی گئیں ۔

چیئرمین ہائر ایجوکیشن کمیشن ڈاکٹر طارق بنوری نے انکشاف کیا ہے وزیراعظم ہاؤس یونیورسٹی کے لیے ایچ ای سی سے 45 ارب روپے کی رقم کا مطالبہ کیا گیا۔

ڈاکٹر طارق بنوری نےایک نجی چینل سے گفتگو کرتے ہوئےکہا کہ وزیر اعظم ہاؤس یونیورسٹی کے لیے اس خطیر رقم کا مطالبہ کیا گیا حالانکہ ہائر ایجوکیشن کمیشن کا کل ترقیاتی بجٹ 30 ارب روپے سے کم ہے۔

ڈاکٹر طارق بنوری نے یہ انکشاف بھی کیا کہ خیبر پختونخوا کی وہ سب یونیورسٹیاں جو 2013 میں ٹھیک چل رہی تھیں وہ سب اب دیوالیہ ہو چکی ہیں۔

لاہور: قذافی اسٹیڈیم میں کھیلے جانے والے دوسرے میچ میں کوئٹہ گلیڈی ایٹرز کا سامنا کراچی کنگز ٹکرائیں گے۔

سرفراز الیون کی کارکردگی میں تسلسل نہیں،اسی وجہ سے 9میں سے صرف3 میچز میں ہی فتح پائی،ٹیم کو ایونٹ میں بہتر کارکردگی کا مظاہرہ کرنے والے عمراکمل سے امیدیں وابستہ ہیں، ول اسمیڈ ،جیسن روئےاور افتخار احمد جارحانہ بیٹنگ کی صلاحیت رکھتے ہیں،البتہ ٹیم کو بطور بیٹنگ یونٹ کارکردگی بہتر بنانے کی ضرورت ہے۔بولنگ میں نسیم شاہ اور محمد عرفان کو توقعات کا بوجھ اٹھانا ہوگا،سہیل تنویر اورنوراحمد برْے دور سے گزر رہے ہیں۔

حریف ٹیم کراچی کنگز نے 8شکستوں کے بعد پہلی فتح سمیٹی، لاہور قلندرز کیخلاف لواسکورنگ میچ میں بابر اعظم کے سوا کوئی زیادہ مزاحمت نہیں کرپایا مگر شرجیل خان اور جو کلارک چھکے چھڑانے کی صلاحیت رکھتے ہیں،پیسرز میر حمزہ اور کرس جورڈن کا ساتھ دینے کیلیے عماد وسیم بھی موجود ہوں گے۔

لاہور: ایچ بی ایل پی ایس ایل 7میں آج 2 میچز کھیلے جائیں گے پہلا میچ اسلام آباد یونائیٹڈاور ملتان سلطانزکے درمیان ہوگا۔

قذافی اسٹیڈیم لاہورمیں اتوار کو اسلام آباد یونائیٹڈ کی ٹیم مضبوط حریف ملتان سلطانز پر قابو پانے کی کوشش کرے گی، ٹاپ اسٹارز کی رخصتی،فٹنس اور فارم کے مسائل سے گھری ٹیم کے کپتان شاداب خان سمیت کئی اہم کھلاڑیوں کی دستیابی یقینی نہیں،اس نے 9میں سے4 میچز جیتے ہیںاس صورتحال میں بیٹنگ کا بوجھ اعظم خان اور رحمان اللہ گرباز کو اٹھانا ہوگا، آصف علی بڑا اسکور نہیں کرپارہے جب کہ فہیم اشرف بیٹ اور بال سے کارآمد ثابت ہوسکتے ہیں۔

بولرز میں وقاص مقصود اچھی فارم میں ہیں،البتہ اسپنرز سمیت دیگر کو کارکردگی میں بہتری لانا ہوگی۔

دوسری جانب حریف ٹیم ملتان سلطانز کو 9میچز میں صرف ایک میچ میں شکست کا سامنا کرنا پڑے گا،بیٹرز محمد رضوان،شان مسعود، رائیلی روسو، خوشدل شاہ اور ٹم ڈیوڈ زبردست فارم میں ہیں، شاہنواز دھانی، ڈیوڈ ویلی اور آصف آفریدی وکٹیں اڑارہے ہیں،اسپنرز عمران طاہر اور خوشدل شاہ بھی حریفوں کے لیے مشکلات پیدا کرنے کے اہل ہیں۔

لاہور : پاکستان کرکٹ ٹیم کےسابق کپتان اورسابق چیف سلیکٹر انضمام الحق نےآسٹریلوی کرکٹرجیمزفالکنرکےرویےکی سخت الفاظ میں مذمت کی ہے۔

اس حوالے سےانضمام الحق نے کہا کہ ہر اس کھلاڑی کے خلاف سخت ایکشن لینا چاہیے جو اس قسم کی الزام تراشی میں ملوث ہے۔

انہوں نے کہا کہ جیمز فالکنر نے بہت غلط حرکت کی، پاکستان کرکٹ بورڈ کو جیمز فالکنر کی اس حرکت سے سختی سے نمٹنا چاہیے کیونکہ اس قسم کی چیزیں ملک کے وقار اور عزت کے لیے انتہائی اہم ہوتی ہیں۔

سابق کپتان کا کہنا تھا کہ اگر کوئی پاکستانی کھلاڑی کسی دوسرے ملک میں ایسا کرتا تو اس کے خلاف سخت ایکشن ہوتا۔

اس موقع پر انضمام الحق نے پاکستان کرکٹ کے سابق ہیڈ کوچ باب وولمر کے واقعے کو یاد کیا اور کہا کہ انہوں نے 2007 کے ورلڈ کپ میں آئرلینڈ کے خلاف پاکستان کی ہار کو اپنے دل پر لیا اور خودکشی کر لی، اس کے بعد پاکستان کے خلاف مکمل تحقیقات کی گئی تھیں۔