اسلام آباد: علامہ اقبال اوپن یونیورسٹی کے تحت ملک بھر میں سمسٹر بہار 2022ء کے میٹرک، ایف اے اور آئی کام پروگراموں کے سالانہ امتحانات ایک ساتھ یکم ستمبر سے شروع ہوں گے جو 3اکتوبر تک جاری رہیں گے۔
کنٹرولر امتحانات، میاں محمد ریاض کے مطابق ڈیٹ شیٹ یونیورسٹی کی ویب سائٹ پر جبکہ رول نمبر سلپس طلبہ کے سی ایم ایس اکاؤنٹ پراپ لوڈ کردی گئی ہیں۔
رول نمبر سلپس طلبہ کے دئیے گئے پتوں پر بذریعہ ڈاک بھی ارسال کی جارہی ہیں۔ متعلقہ طلباء و طالبات کو بذریعہ موبائیل ایس ایم ایس بھی امتحانات کی اطلاع دے دی گئی ہے۔
انہوں نے بتایا کہ وائس چانسلرپروفیسر ڈاکٹر ضیاء القیوم نے طلبہ کورہائش گاہوں کے قریب ترین مقامات پر امتحانی سہولت فراہم کی ہدایات دی تھی جس کی بنیاد پر ملک بھر میں کم و بیش 850امتحانی مراکز قائم کئے گئے ہیں جن میں طلبہ کے لئے بنیادی سہولتوں کا خیال رکھا گیا ہے۔
امتحانات میں نقل کے رجحان کے خاتمہ کے لئے خصوصی ٹیمیں تشکیل دے دی گئی ہیں جو امتحانی مراکز کے سرپرائز وزٹ کریں گے۔