ایمز ٹی وی(اسلام آباد) مشیر خارجہ سرتاج عزیز کا کہنا ہے کہ بھارت کو غلط فہمی ہے کہ وہ ہتھیاروں کی دوڑ میں شامل ہوکر محفوظ رہے گا۔

سینٹ کے اجلاس کے دوران بھارت کی جانب سے نیوکلئیر سپلائرز گروپ میں شامل ہونے کی درخواست کے حوالے سے پیش کی گئی تحریک التوا پر اظہار خیال کرتے ہوئے سرتاج عزیز نے کہا کہ بھارت کی جانب سے ہونے والے حالیہ میزائل تجربے پر پاکستان کو تشویش ہے، ان میزائل تجربے سے خطے میں عدم استحکام پھیلا ہے، بھارت بحیرہ ہند کو ایٹمی ہتھیاروں کی دور میں جھونک رہا ہے، اسے غلط فہمی ہے کہ وہ ہتھیاروں کی دوڑ میں شامل ہوکر محفوظ رہے گا۔

مشیر خارجہ نے کہا کہ پاکستان کی ایٹمی صلاحیت بین الاقوامی طور پر تسلیم شدہ ہے، ہم خطے میں امن چاہتے ہیں لیکن ہماری امن پسندی کو کمزوری نہ سمجھا جائے، ہم اپنے دفاع سے غافل نہیں، ہم اپنی دفاعی ضروریات اور تقاضوں سے پوری طرح آگاہ ہیں اور ہتھیاروں کی دوڑ میں شامل ہوئے بغیر ہی دفاعی ضرورت پوری کریں گے۔

نیو کلئیر سپلائی گروپ کے حوالے سرتاج عزیز نے کہا کہ بھارت کو نیوکلئیر سپلائیرز گروپ کا رکن بنانے میں کوئی رعایت نہیں دی جاسکتی، پاکستان نیوکلیئر سپلائر گروپ کے 49 ممالک کے ساتھ رابطے میں ہے اور پاکستان نیوکلیئر سپلائی گروپ کے 49 ممالک میں فعال طریقے سے لابنگ کر رہا ہے، نیوکلیئر سپلائی گروپ کے 22 جون کو ہونے والے اجلاس میں ہم کامیاب ہوں گے،اس کے علاوہ بھارت کی بحیرہ ہند میں ایٹمی سرگرمیوں پر پابندی کی قرارداد جنرل اسمبلی میں پیش کی جائے گی