ایمز ٹی وی (لاہور) وزیراعلیٰ پنجاب شہباز شریف نے کہا ہے کہ بے بنیاد الزامات لگانے والوں کوعوامی خدمت سے کوئی سروکار نہیں ، جھوٹ کی منفی سیاست عوام میں اپنی ساکھ کھو چکی ہے۔ منگل کوجاری اپنےبیان میں وزیراعلیٰ پنجاب نے کہا کہ مسلم لیگ ن نے ہر دور میں عوام کے مسائل ترجیحی بنیادوں پر حل کرنے کیلئے عملی اقدامات کئے ہیں ،یہی وجہ ہے کہ ن لیگی دور حکومت کے ترقیاتی منصوبے شفافیت اور معیار کے لحاظ سے اپنی مثال آپ ہیں۔

انہوں نے کہا کہ شکست خوردہ عناصر نے ملک وقوم کے روشن مستقبل کو کھوٹا کرنے کی کوئی کسر نہیں چھوڑی۔ شہباز شریف نے بھارتی پنجاب کے وزیر اعلیٰ کیپٹن (ر) امریندر سنگھ کے نام خط لکھ دیاجس میں انہوں نے امریندر سنگھ کو دعوت دی ہے کہ سموگ اور ماحولیاتی آلودگی کے مسائل سے نبردآزما ہونے کے لیے علاقائی تعاون کے اقدامات کیے جائیں۔ شہباز شریف نے اپنے خط میں کہا ہے کہ گزشتہ برس پاکستانی اوربھارتی پنجاب کو سموگ کے مسلے کاسامنا کرنا پڑا،تاہم رواں سال یہ مسئلہ زیادہ شدت اختیار کر گیا اوراس کاپھیلاؤ بھی زیادہ رہا ۔ انہوں نے اِس مسئلے نے علاقائی صورت اختیار کر لی ہے جس سے نئی دلی تا لاہور اور دیگر علاقے متاثر ہوئے ہیں۔ یہ مسئلہ بنیادی طور پر سائنسی اور معاشی نوعیت کا حامل ہے جس سے کسی دوسرے طریقے سے نبٹا نہیں جا سکتا ۔

شہبازشریف کی زیرصدارت اعلیٰ سطح کا اجلاس منعقد ہوا جس میں ’’خادم پنجاب سکولز پروگرام‘‘ کے تحت سکولوں میں اضافی کمروں کی تعمیرکے منصوبے پر پیش رفت کا جائزہ لیاگیا-وزیر اعلیٰ نے اجلاس سے خطاب کرتے ہوئے کہا کہ صوبے کے ہزاروں سکولوں میں اربوں روپوں سے 36ہزار اضافی کمروں کی تعمیر کے پروگرام پر عملدرآمد جاری ہے اورسکولوں میں اضافی کمروں کی تعمیر سے طلبا ء و طالبات کو بہترین تعلیمی سہولتیں ملیں گی۔ شہبازشریف سے نیدرلینڈ کی سفیر آر ڈی سٹوئس بریکن نے ملاقات کی۔ ملاقات میں باہمی دلچسپی کے امور ،دوطرفہ تعلقات کے فروغ اور مختلف شعبوں میں تعاون بڑھانے پر تبادلہ خیال کیا گیا۔ وزیراعلی محمد شہبازشریف نے اس موقع پر گفتگو کرتے ہوئے کہاکہ پاکستان او رنیدرلینڈ کے مابین اچھے دوستانہ تعلقات موجو د ہیں اورنیدر لینڈ کو زراعت ، لائیوسٹاک، ڈیری فارمنگ اور واٹر مینجمنٹ کے شعبو ںمیں خاص مہارت حاصل ہے۔

انہوں نے کہاکہ توانائی کے شعبے میں بھی نیدرلینڈ کے ساتھ تعاون بڑھانے کے خواہاں ہیں- دونوںممالک کو معاشی تعاون بڑھانے کی ضرورت ہے۔انہوںنے کہاکہ مسلم لیگ( ن )کی حکومت نے ہزاروں میگا واٹ کے توانائی کے منصوبے ریکارڈ مدت میں مکمل کئے ہیں اور ان منصوبوں کی تکمیل سے لوڈشیڈنگ کا خاتمہ ہوا ہے-

نیدرلینڈ کی سفیرنے اس موقع پر گفتگو کرتے ہوئے کہاکہ پنجاب کے زرعی شعبے میں تعاون کے بہت مواقع موجود ہیں اورہم پنجاب کے ساتھ لائیوسٹاک اورڈیری ڈویلپمنٹ کے شعبوں میں بھی اشتراک کار کو فروغ دینا چاہتے ہیں۔ علاوہ ازیں وزیر اعلیٰ نے لاہور جنرل ہسپتال میں ڈینگی کے فوکل پرسن ڈاکٹراسلام ظفر کے خلاف پیڈاا یکٹ کے تحت کارروائی کا حکم دے دیا ہے جس کیلئے پرنسپل علامہ اقبال میڈیکل کالج پروفیسر ڈاکٹر راشد ضیاء کو انکوائری افسر مقرر کر دیا ہے ۔