ایمز ٹی وی (بزنس)پاکستان فلور ملز ایسوسی ایشن (پنجاب) نے گندم مصنوعات کی برآمد پر 150 ڈالر کے ریبیٹ کا مطالبہ کر دیا ہے ۔ایسوسی ایشن کے چیئرمین چودھری افتخار احمد مٹونے کہا ہے کہ مقامی اور عالمی مارکیٹ میں نمایاں فرق کے باعث گندم کی ایکسپورٹ میں مشکلات کا سامنا ہے ۔گزشتہ روز وفاقی سیکرٹری فوڈ اینڈ سکیورٹی عابد جاوید سے انکے دفتر میں ملاقات کے دوران ان کا کہنا تھا کہ گندم کے نرخ پوری دنیا میں زیادہ ہونے کی وجہ سے انڈسٹری کو متعدد مسائل کا سامنا ہے لہذا حکومت 90ڈالر کی بجائے 150ڈالر ریبیٹ دے تاکہ اضافی گندم کے ذخائر کا نکاس ممکن ہو سکے ۔اس موقع پر گروپ لیڈر عاصم رضا نے کہا کہ حکومت کو چاہیے کہ فوری طور پر گندم اور گندم کی مصنوعات کے حوالے سے اپنی ایکسپورٹ پالیسی کا اعلان کرے ۔ وفاقی سیکرٹری فوڈ اینڈ سکیورٹی عابد جاوید نے انہیں یقین دلایا کہ انکی تجاویزبارے حکومت پہلے سے آگاہ ہے اور بہت جلد مثبت اقدامات سامنے آئیں گے ۔