ایمزٹی وی(تعلیم/کراچی ) پاکستانی طلبہ کا ایک وفد جاپان روانہ ہوگیا قبل ازیں اس سلسلے میں قونصل خانہ جاپان، کراچی کے توسط سے تقریب آگہی کا اہتمام کیا گیا۔ وفد میں 15 طالبِ علم اور ایک نگران شامل ہیں جن میں سے 12 طالبِ علموں کا تعلق سندھ جبکہ 3 کا بلوچستان کی جامعات سے ہے۔ اِس مرتبہ دورے کا موضوع ’’ ٹیلی کمیونیکیشن ‘‘ ہے اورپاکستانی طالبِ علم نہ صرف مقامی فیملیز کے ساتھ رہائش کے تجربات سے وہاں کی طرز ِ زندگی اور ثقافت کا قریبی مشاہدہ کر سکیں گے بلکہ جاپانی ٹیکنالوجی سیکھنے کی غرض سے انہیں مختلف کمپنیز اور اِداروں کا دورہ بھی کرایا جائے گا۔ شرکاء سے خطاب کرتے ہوئے کراچی میں تعینات جاپانی قونصل جنرل توشی کازو اِسومورا نے کہا کہ موجودہ دور میں اِس نوعیت کے تبادلوں کی ضرورت پہلے سے بڑھ چکی ہے۔ جاپانی عوام سے براہِ راست رابطے کے باعث اِن شرکاء کی جاپان کے بارے میں معلومات میں اضافہ ہوگا ۔